گه‌ڕان

Shadow Shadow
سیاسه‌تی

سێ ساڵ زیندانى لەهەولێر 

80 هەزار دۆلار..چیرۆکى کادیرێکى پارتى کە ’’دواى بوون بەیەکێتى رفێنرا’’

2021.09.16 - 11:57
App store icon Play store icon Play store icon
80 هەزار دۆلار..چیرۆکى کادیرێکى پارتى کە ’’دواى بوون بەیەکێتى رفێنرا’’

ناس کورد-

 

شەوکەت محەمەد هەشت ساڵ لەمەوبەر سەرپەرشتى کەمپینى هەڵبژاردنى پارتى کرد لەسنورى دهۆک، بەڵام ساڵى 2018 کەوتە زیندان، کاتێک بەهۆى بوونى کێشەوە لەگەڵ حزبەکەى بڕیاریدا ببێتە یەکێتى.

کەناڵی ناس کورد لە تێلیگرام جۆین بکە   

 

شەوکەت کە ئەندامى ناوچەى ئەتروشى پارتى و موختارى گوندى مەلکیشان بووە لەسنورى دهۆک ماوەى سێ ساڵە لەئاسایشى گشتى هەولێر زیندانیکراوە و کەسوکارەکەى دەڵێن تۆمەتەکەى ئەوەیە بەبێ ئاگادارى "دەزگاى پاراستن" چووەتە سلێمانى.

 

کەسوکارى ئەو کادیرەى پارتى لە یاداشتێکدا بۆ مەسعود بارزانى و مەسرور بارزانى داواى ئازادکردنى شەوکەت دەکەن و دەڵێن، لە بەشى پاراستن لە ئاسایشى گشتى هەولێر زیندانیکراوە بەتۆمەتى ئەوەى بێ ئاگادارى ئەوان چووەتە سلێمانى.

کەمال چۆمان نوسەر و رۆژنامەنوس کە بەدواداچوونى بۆ کەیسەکە کردووە نوسیویەتى "شەوكەت وەك مۆختاری گوندی مالیشان و كادری پارتی لە هەڵبژارنی ۲٠۱۳ بۆ ئەنجۆمەنی نوێنەرانی عێراق، یەکێک بو لە سەرپەرشتیارانی کەمپینی هەلبژاردنی پارتی لەو ناوچەیە، لە گیرفانی خۆی نزیكەی ۸٠ هەزار دۆلار سەرفکردبو بەڵام پارتی یەك دیناری بۆ نەگەڕاندوە".

 

دەشڵێت "دوای چەندین جار گلەییکردن  لای عەلی عەونی، جارێك فازل میرانی دەچێتە لقی شێخان و بەڵێنی دا هەرچی لە توانایاندا دا بێت هاوکاریی بكەن، بەڵام بەڵێنەكەیان نەبردەسەر. جارێكی دیكە هۆشیار زێباری هاتە دهۆك و لە هۆتێل ریكسۆز شەوکەت دەبینێ و پێیدەڵێت:  نێچیرڤان دێتە دهۆك لە هۆتێل ژیان لەگەڵی دابنیشە و ئەو هاوكاری ئێوە دەكات، بەڵام ئەو بەڵێنەش راست نەبو".

 

"بۆیە تا دوای ریفراندۆم شەوکەت چەندین جار داوا لە هەموو بەرپرسێكی پارتی دەکات تا هاوكارییان بکات و پارەکەی بۆ بگەڕێننەوە، کاتێک بێهیوا دەبێت، بڕیاردەدات ببێتە یەکێتی. كاتێك یەكێتی هەڵوێستی شەوکەت دەزانێت، جارێك سەعدی ئەحمەد پیرە لەگەڵ حاجۆ و فەخری شەرەفانی، كە دوو كەسایەتی یەكێتین لە ناوچەكە سەردانی دەکەن و شەوکەت بڕیاردەدات ببێتە یەکێتی".

بەوتەى چۆمانى، دواتر شەوکەت لە ٢٠١٨ سەردانی سلێمانی دەکات، دوای گەڕانەوەی، پاراستنی پارتی پێ دەزانێت و دەیڕفێنن. تا ئەو ماوەیە کەس نازانێت لە کوێیە، دواتر بنەماڵەکەی دەزانن هێشتا لە ژیاندا ماوە، داوای بینینی دەکەن بەڵام رێیان پێ نادرێت.