گه‌ڕان

Shadow Shadow
سیاسه‌تی

پەیامێک لە سەرۆکی هەرێمەوە

نێچیرڤان بارزانی بۆ هەموو لایەنە سیاسییەکان: ئەمەتان لەبیر بێت

2021.09.10 - 19:15
App store icon Play store icon Play store icon
نێچیرڤان بارزانی بۆ هەموو لایەنە سیاسییەکان: ئەمەتان لەبیر بێت

ناس کورد- 

نێچیرڤان بارزانی، سەرۆکی هەرێمی کوردستان پەیامێکی لەبارەی دەستپێکردنی بانگەشەی هەڵبژاردن بڵاوکردەوە و ڕایگەیاند، داوا له‌ هه‌موو لايه‌ك ده‌كات بانگه‌شه‌يه‌كى مه‌ده‌نيانه‌ى ئارام له‌ ئاستێكى به‌رزدا ئه‌نجام بده‌ن و نه‌بێته‌ هۆى بێزاركردنى هاووڵاتييان و له‌ هه‌موو پشێوى و يه‌كترشكاندن و ناوزڕاندنێك دوور بێت و به‌ هیچ شێوه‌یه‌ك له‌سه‌ر حيساب و له‌كه‌داركردنی كه‌سایه‌تيی كاندید‌، به‌تایبه‌تی كاندیدى ئافره‌ت نه‌بێت.

کەناڵی ناس کورد لە تێلیگرام جۆین بکە   

 

لە پەیامەکەیدا کە (هەینی 10ی ئەیلولی 2021) بڵاویکردووەتەوە ئاماژەی بەوەشکردووە، "هه‌موو حزب و لايه‌نه‌ سياسييه‌كان ده‌بێ ئه‌وه‌يان له‌ بير بێت كه‌ دوای هه‌ڵبژاردن هه‌موومان ئامانجمان ئه‌وه‌یه‌ له‌ به‌غدا پێكه‌وه‌ كار بكه‌ین بۆ پته‌وكردنى ديموكراسى، به‌رژه‌وه‌ندیيه‌كانی عێراق به‌گشتی و به‌ده‌ستهێنان و پاراستنی مافه‌ ده‌ستوورييه‌كانی هه‌رێمى كوردستان به‌تایبه‌تی." 

 

دەقی پەیامەکەی سەرۆکی هەرێمی کوردستان:

 

كوردستانييانى خۆشه‌ويست،

 

هاووڵاتيانى ئازيز له‌ هه‌رێمى كوردستان و عيراق

 

له‌ كاتێكدا بانگه‌شه‌ى هه‌ڵبژاردنه‌كانى (10)ى ئۆكتۆبه‌رى داهاتوو له‌ عيراق و هه‌رێمى كوردستان به‌ڕێوه‌ ده‌چێت، داوا له‌ هه‌موو لايه‌ك ده‌كه‌م بانگه‌شه‌يه‌كى مه‌ده‌نيانه‌ى ئارام له‌ ئاستێكى به‌رزدا ئه‌نجام بده‌ن. نه‌بێته‌ هۆى بێزاركردنى هاووڵاتييان و له‌ هه‌موو پشێوى و يه‌كترشكاندن و ناوزڕاندنێك دوور بێت. به‌ هیچ شێوه‌یه‌ك له‌سه‌ر حيساب و له‌كه‌داركردنی كه‌سایه‌تيی كاندید‌، به‌تایبه‌تی كاندیدى ئافره‌ت نه‌بێت.

 

هه‌موو لايه‌ن و داموده‌زگا ئیداری و ئه‌منیيه‌كان و ميديا و كۆمه‌ڵگای مه‌ده‌نی، هاوكار بن بۆ سه‌ركه‌وتنی پرۆسه‌ی به‌ڕێوه‌بردنی بانگه‌شه‌ى هه‌ڵبژاردن له‌ چوارچێوه‌ى ياسادا. به‌ ته‌واوى ئازاد بێت و ده‌رفه‌تی یه‌كسان و وه‌ك يه‌ك بۆ هه‌موو لايه‌ن و كاندیده‌كان فه‌راهه‌م بێت.

 

هه‌موو حزب و لايه‌نه‌ سياسييه‌كان ده‌بێ ئه‌وه‌يان له‌ بير بێت كه‌ دوای هه‌ڵبژاردن هه‌موومان ئامانجمان ئه‌وه‌یه‌ له‌ به‌غدا پێكه‌وه‌ كار بكه‌ین بۆ پته‌وكردنى ديموكراسى، به‌رژه‌وه‌ندیيه‌كانی عێراق به‌گشتی و به‌ده‌ستهێنان و پاراستنی مافه‌ ده‌ستوورييه‌كانی هه‌رێمى كوردستان به‌تایبه‌تی. له‌ بانگه‌شه‌ى هه‌ڵبژاردندا ده‌بێ كارێكى وا نه‌كرێت هه‌ماهه‌نگی و هاريكارى و پێكه‌وه‌يى و كاری هاوبه‌شى داهاتوو له‌ به‌غدا سه‌ختتر بكات.

 

ده‌نگدان ماف و ئه‌رك و به‌رپرسياريه‌تييه‌، ده‌بێ په‌يامى هه‌موومان ئه‌وه‌ بێت كه‌ هاووڵاتييان ئه‌و مافه‌يان به‌ كار بهێنن، ئه‌رك و به‌رپرسياريه‌تى هه‌ڵبگرن و به‌ به‌شداريى كارايان له ده‌نگداندا، هه‌مووان پێكه‌وه‌ له‌ گۆڕانگارى و هه‌وڵه‌كانى بنياتنانى داهاتوويه‌كى باشتردا به‌شدار بن. ئه‌م هه‌ڵبژاردنه‌ بۆ عيراقييه‌كان گرنگه‌، كۆمه‌ڵگه‌ى نێوده‌وڵه‌تيش به‌ بايه‌خه‌وه‌ لێى ده‌ڕوانێت، بۆيه‌ نه‌ته‌وه‌ يه‌كگرتووه‌كان و يه‌كێتيى ئه‌ورووپا تيمه‌كانيان ده‌نێرن و له‌ نزيكه‌وه‌ چاودێرى ده‌كه‌ن.

 

هيواى بانگه‌شه‌يه‌كى‌ سه‌ركه‌وتوو بۆ هه‌موو لايه‌ك و هه‌ڵبژاردنێكى پاك و بێگه‌رد ده‌خوازم كه‌ جێى متمانه‌ى هه‌مووان بێت.

 

نێچيرڤان بارزانى