گه‌ڕان

Shadow Shadow
سیاسه‌تی

نوێ

یەکێتی پیاوان هەڵوێستی خۆی لەسەر کەمپینی ’’ناوی من ناوی دایکمە’’ ڕاگەیاند

2021.09.02 - 22:23
App store icon Play store icon Play store icon
یەکێتی پیاوان هەڵوێستی خۆی لەسەر کەمپینی ’’ناوی من ناوی دایکمە’’ ڕاگەیاند

ناس کورد- 

یەکێتی پیاوانی کوردستان لەسەر کەمپینی "ناوی من ناوی دایکمە" هاتەدەنگ و سکرتێری یەکێتییەکە دەڵێت، ئەو جۆرە کارانە بۆ لەبیربردنەوەی کۆمەڵێک گرفتی سەرەکیی هاووڵاتیان و مەشغوڵ کردنیانە، ئەگەرنا لە زۆرینەی کۆمەڵگەکاندا ناوی منداڵ لەسەر ناوی باوکە، دەشڵێت، چەندەها کەسی ونبووی هەڵەبجە لە ئێران هەن هێشتا نەدۆزراونەتەوە، چونکە باوکیان نەماوە، ئەوانە بدۆزنەوە باشترە.

کەناڵی ناس کورد لە تێلیگرام جۆین بکە   

 

ماوەی چەند ڕۆژێکە کەمپینی "ناوی من ناوی دایکمە" لە سلێمانی ڕاگەیەنراوە، ئەوەش بۆ دەرکردنی یاسایەک لە پەرلەمانی عێراق بۆ ئەوەی بتوانرێت ناوی منداڵ بخرێتەسەر ناوی دایک، لەو چوارچێوەیەشدا چەند کەسێک ناوی خۆیان خستووەتەسەر ناوی دایکیان، ئەوەش کاردانەوەی زۆری لێکەوتووەتەوە. 

 

لەوبارەیەوە بورهان عەلی، سکرتێری یەکێتی پیاوانی کوردستان (پێنجشەممە 2ی ئەیلولی 2021) بە "ناس کورد"ی ڕاگەیاند، "ئەم کەمپینە هیچ چوارچێوەیەکی یاسایی و زانستیی و لۆژیکی نییە و بە هەڕەمەکی چەند کەسێک هەستاون لە شوێنێک کۆبوونەتەوە و ئەم کارەیان کردووە." 

 

وتیشی، "ئەم کارانە کە ناوبەناو لەلایەن کۆمەڵێک ڕێکخراوی و کەسەوە دەکرێن، بۆ بیربردنەوەی گرفتە سەرەکییەکانی هاووڵاتیان و مەشغوڵ کردنیانە بەو بابەتانەوە." 

 

"ئێمە دایک بە پیرۆز دەزانین و دایک پەروەردەکاری ئێمەیە، بەڵام تەنانەت لە زانشتیشدا پشکنینی (DNA) لە باوکەوە وەردەگیرێت و لە باوکەوە دەردەکەوێت، نەک لە کۆمەڵگەی ئیسلامیدا، بەڵکو لە زۆربەی کۆمەڵگەکانی دیکەشدا ناوی منداڵ لەسەر ناوی باوکە، نازانم ئێستا بۆ ئەمە کراوەتە کێشە لە کۆمەڵگەی ئێمەدا."، بورهان عەلی وای وت. 

 

سکرتێری یەکێتی پیاوان باسی لەوەشکرد، "ئێمە کێشەی زۆر لەوە گەورەترمان هەیە، کێشەی کەمی زەواج و زۆری تەڵاقمان هەیە، بەبۆنەوەی ئەوەوە کێشەی زیادکردنی ژمارەی دانیشتووانمان هەیە، کە تائێستاش وەک کەمینە سەیری کورد دەکرێت." 

 

جەختیشیکردەوە، "ئەگەر هەڵبژاردنی ئەنجومەنی پارێزگاکان بکرێت و لایەنە عەرەبییەکان بەشداری بکەن لە پارێزگاکانی هەرێم، هێندەی کورد دەنگ دەهێنن ژمارەی هاووڵاتیانی عەرەب ئەوەندە زیادی کردووە، کۆمەڵێک خەڵکیش ئێمە بە کێشەی ناوەوە سەرقاڵ دەکەن."