گه‌ڕان

Shadow Shadow
سیاسه‌تی

وردەکاریی

بەدواداچوونێک: زیاتر لە 200 بەنزینخانە بەبێ مۆڵەت لە هەرێم کاردەکەن

2021.08.31 - 15:43
App store icon Play store icon Play store icon
بەدواداچوونێک: زیاتر لە 200 بەنزینخانە بەبێ مۆڵەت لە هەرێم کاردەکەن

ناس کورد-

پەرلەمانتارێکی فراکسیۆنی کۆمەڵی ئیسلامی دەڵێت، زیاتر لە 200 بەنزینخانەى قەبارە جیاواز بەبێ بوونى مۆڵەتى حکومەت لە کوردستان کاردەکەن کە زیاتر لە نیوەی ئەمانە "تەنها لەسنورى پارێزگاى دهۆکن و ئەوانى تریش دابەشبوون بەسەر پارێزگاکانى سلێمانى و هەولێرو هەڵەبجەو ئیدارەکانى ڕاپەڕین و گەرمیانن."

کەناڵی ناس کورد لە تێلیگرام جۆین بکە   

 

 

عومەر گوڵپی لە بەدواداچوونێکدا (31ی ئابی 2021) دەڵێت، "ئەم وێستگەى سوتەمەنیانە، بێجگە لە نەبوونى مۆڵەت یەک دینار باج بە حکومەت نادەن، هەروەها هێندێکیان پابەندى مەرجەکانى سەلامەت و ژینگەش نین، زۆرینەشیان حزبەکانى دەسەڵات و بەرپرسانیان لە پشتە، ئەگەرنا هاووڵاتیەکى ئاسایى ناتوانیێت بڕە پارەیەکى زۆر لە دروستکردنى بەنزینخانەیەک خەرج بکات و مۆڵەتیشى نەبێت! کە دروستکردنى هەر بەنزینخانەیەک نزیکەى (شەست هەزار تا یەک ملیۆن) دۆلارو زیاتر تیچوویەتى بەپێى قەبارەى کۆگاو پەمپ و دیزاینەکەى."

 

دەشڵێت، "مۆڵەتى بەنزینخانە، پڕکراوە لە ڕۆتینێکى کوشندە، کە مامەڵەکەى چواردە فەرمانگەى دەوێت، و زیاتر لە دوو ساڵیشى پێویستە تا مۆڵەتەکە تەواو دەبێت، هاووڵاتى هەیە زیاتر لە دوو ساڵە تا ئێستا وەڵامى داواکەى نەدراوەتەوە، بەڵام ئەوانەى دەستى حزب و بەرپرسانى هەردوو حزبى دەسەڵاتیان لە پشتە، پێویستیان بەو چاوەڕوانیە نییە، تەنانەت بە بێ مۆڵەتیش کار دەکەن، دروستکردنى ئەو ڕۆتینە کوشندەیەش تەنها بۆ ئەوەیە کە ژمارەى بەنزینخانە کەمتر بێت و قۆرخکاریى زیاترى تێدا بکرێت."

 

عومەر گوڵپی باسی لەوەشکردووە کە "بەهۆى ئەم دۆخە خرایەى ئیدارەدان و گەندەڵیەوە، ژمارەیەک بەنزینخانە، چ ئەوانەى مۆڵەتیان هەیەو چ ئەوانەى نیانە، بەبێ ڕەچاوکردنى تەواوى مەرجەکانى سەلامەتى و ستانداردەکان کاردەکەن، ئەگەرى مەترسیشیان لەسەر ژیانى هاووڵاتیان هەیە، لەم بابەتەدا تەنانەت ڕەچاوى ژیانى منداڵان و قوتابخانەش نەکراوە، لە هێندێک حاڵەتیش شارەوانییەکان زەوى تەرخانکراو بۆ سەوزاییان گۆڕیوە بۆ بەنزینخانە!"

 

"بە ڕێکخستنەوەى وێستەگەکانى سوتەمەنى، جێبەجێکردنى یاساو ڕێنماییەکان و پێوەرو ستانداردەکانى ژینگەو سەلامەتى، دەتوانرێت هاووڵاتیان دڵنیا بکرێنەوە، هەروەها نرخى بەنزینیش بەشێوەیەکى بەرچاو دابەزێت، چونکە یەکێک لە هۆکارەکانى گرانى نرخى بەنزین، قۆرخکاریى پێدانى مۆڵەت و دروستکردن و بەکرێدانى بەنزینخانەکانە."