گه‌ڕان

Shadow Shadow
سیاسه‌تی

موچە و ئیمتیازاتى هێزەکانى 70 و 80 هاوتاى وەزارەتى پێشمەرگە دەکرێت

2021.08.24 - 15:27
App store icon Play store icon Play store icon
موچە و ئیمتیازاتى هێزەکانى 70 و 80 هاوتاى وەزارەتى پێشمەرگە دەکرێت

ناس کورد-

ئەمیندارى گشتیى وەزارەتى پێشمەرگە ڕایگەیاند، پلان وایە تا کۆتایی ئەم کابینەیە سەرجەم هێزەکانى 70 و 80 بخرێنەسەر وەزارەتی پێشمەرگە، دەشڵێت، لەدوای ئەو هەنگاوە موچە و ئیمتیازاتی ئەو هێزانەش هاوتای وەزارەتی پێشمەرگە دەکرێت و دەخرێنەسەر وەزارەت.

کەناڵی ناس کورد لە تێلیگرام جۆین بکە   

 

جەبار یاوەر، ئەمیندارى گشتیى وەزارەتى پێشمەرگە، (سێشەممە 24ى ئابى  2021) بە "ناس کورد" ى ڕاگەیاند، "هەنگاوەکان بۆ یەکخستنی هێزەکانی پێشمەرگە بەردەوامە و  لە ماوەى ئەم مانگەدا چوار لیوا و دوو هێزى پشتیوانى خراونەتە سەر وەزارەتى پێشمەرگە، پلانیش وایە سەرجەم هێزەکانی 70 و 80 بخرێنەسەر وەزارەتی پیشمەرگە." 

 

ئاماژەى بەوەشکرد، بۆ بودجە و ئیمتیازات بە هەمان شێوەى وەزارەت دەبێت و هیچ جیاوازى لە نێوان ئەو هێزانەدا نیە، ڕاستەوخۆ بودجەکانیان دەگوازرێتەوە سەر وەزارەت و موچەکانیان هاوتای وەزارەت دەکرێت. 

 

لەوەڵامى ئەو پرسیارەى بۆچى هەنگاوەکانى یەکخستنى هێزەکان سستن، یاوەر ئەوەى خستەڕوو، ئەو کارە لەماوەى ڕۆژێکدا ناکرێت، هێزەکان زۆرن  160هەزار کەسن دەبێت ڕێکبخرێنەوە، چونکە شیوازیان جیایە .

 

ڕوونیشیکردەوە، " هەوڵ دەدەین تا کۆتایى ئەم کابینەیە یەکخستنەکە کۆتایی بێت، چونکە وا بەرنامە دانراوە هیچ هێزێک لە دەرەوەى وەزارەتى پێشمەرگە نەمێنێت."