گه‌ڕان

Shadow Shadow
سیاسه‌تی

کەی بەنزین هەرزان دەبێت؟

بۆچی بەپێی بەڵێنەکەی وەزیری سامانە سروشتییەکان بەنزین هەرزان نەبوو؟

2021.08.23 - 20:58
App store icon Play store icon Play store icon
بۆچی بەپێی بەڵێنەکەی وەزیری سامانە سروشتییەکان بەنزین هەرزان نەبوو؟

ناس کورد-

ئەگەرچی بەوتەی وەزیری سامانە سروشتییەکان بڕیاربوو نرخی بەنزین هەرزان بێت، بەڵام هێشتا نرخی بەنزین وەک خۆیەتی و سەرۆکی لیژنەی وزە و پیشەسازیش لە ئەنجومەنی پارێزگای سلێمانیش دەڵێت، قسەکانی وەزیری سامانە سروشتییەکان فەرمیی نەبوون و تەنها بەڵێنی بێبنەما بوون، دەشڵێت، بەغدا یەک ملیۆن لیتر بەنزینەکەی نەناردووە، هەرچەن ئەوەش کێشەکە چارەسەر ناکات.

کەناڵی ناس کورد لە تێلیگرام جۆین بکە   

 

لە چەند ڕۆژی ڕابردوودا کەمال ئەتروشی، وەزیری سامانە سروشتییەکان مژدەی ئەوەی بە هاووڵاتیان دا کە لەگەڵ وەزیری نەوتی عێراق ڕێککەوتووە، ڕۆژانە یەک ملیۆن لیتر بەنیزن بۆ هەرێم بنێرن و بە 650 دینار بفرۆشرێت بە هاووڵاتیان، لەدوای ئەوەش نرخی بەنزین هەرزان دەبێت، بەڵام تا ئەمڕۆش نرخی بەنزین وەک خۆیەتی. 

 

لەوبارەیەوە کەریم عەلی، سەرۆکی لیژنەی وزە و پیشەسازی لە ئەنجومەنی پارێزگای سلێمانی (دووشەممە 23ی ئابی 2021) بە "ناس کورد"ی ڕاگەیاند، "ئەو دۆخ و بڕیارانەی ئێستا هەن هەمان ئەوەیە کە پێشووتر هەبوون، واتە پێشتر کە بەنیزن گران بوو دۆخەکە چۆن بوو، ئێستاش هەروایە و هیچ گۆڕانکارییەکی تێدا نەکراوە، ئیتر نرخی بەنزین چۆن بەبێ بڕیاری پێویست هەرزان دەبێت." 

 

وتیشی، "ئەو یەک ملیۆن لیترەشی کە وەزیری سامانە سروشتییەکان وەک مژدە ڕایگەیاند کە بەغدا دەینێرێت، نەهاتووە، چونکە ئەو بڕیارانە پێویستی بە نوسراوی فەرمی و ڕێککەوتن و ڕەزامەندیی فەرمیی هەیە، نەک بە قسەی دوو وەزیر لە تەلەفۆنێکدا هەموو شتێک ببڕێندرێتەوە، بۆیە قسەکانی وەزیری سامانە سروشتییەکان لەسەر بنەمایەکی فەرمیی نەبوون و تەنها دڵخۆشکردنێکی کاتی هاووڵاتیان بوو." 

 

هەرێمی کوردستان ڕۆژانە پێویستی بە شەش ملیۆن لیتر بەنزین هەیە، بەوتەی وەزیری سامانە سروشتییەکان، بەغدا ملیۆنێک لیتر دەنێرێت. 

 

کەریم عەلی دەڵێت، "ئەگەر بەغدا ئەو بڕە بەنزینەش بنێرێت، ئەوا چارەسەری دۆخەکە ناکات، چونکە ئەوە زۆر کەمە و بەشی پێویستی ناکات، تەنها قەرەباڵغی و کێشە بۆ هاووڵاتیان دروست دەکات، ئەگەرچی من لەگەڵ هەموو هەوڵێکدام بۆ دابەزاندنی نرخی بەنزین." 

 

وەزیری سامانە سروشتییەکان و پارێزگارەکانی هەرێم هۆکاری گرانبوونی نرخی بەنیزن دەگێڕنەوە بۆ بەرزبوونەوەی نرخی دۆلار و نەوت. 

 

لەوبارەیەوە سەرۆکی لیژنەی وزە و پیشەسازی لە ئەنجومەنی پارێزگای سلێمانی ئاماژەی بەوەکرد، "بەشێکی زۆری ئەو قسانە ڕاست نین، بەرزبوونەوەی نرخی دۆلار و نەوت هۆکاری لاوەکین بۆ بەرزبوونەوەی نرخی بەنزین، لەپاڵ ئەوەدا چەندین هۆکاری دیکە هەن." 

 

ڕوونیشیکردەوە، "قۆرخکردنی هاوردەکردنی بەنزین، زیادکردنی باج لەسەر بەنزین، وەرگرتنی پارە لە دەروازە سنورییەکان لەلایەن کۆمپانیاوە لە تانکەرەکانی هاوردەکردنی سوتەمەنی کە هاوشێوەی سەرانە وەرگرتنە، ئەمانە هۆکاری سەرەکی بەرزبوونەوەی نرخی بەنزینن، ئەگەر ئەوانە نەمان ئەوکات بەنزین هەرزان دەبێت." 

 

کەریم عەلی باسی لەوەشکرد، "ئێمە یاداشتێکمان داوەتە وەزارەتی سامانە سروشتییەکان و ڕێگاکانی هەرزانکردنی نرخی بەنزینمان خستووەتەڕوو، بەڵام ئەوان تائێستا ئامادەنەبوون بیکەن."

 

ڕاگەیەنراوێكی فەرمی لە كۆبوونەوەی جێگری سەرۆك وەزیران و سەرۆكی دیوانی ئەنجومەنی وەزیران و فەرمانگەی هەماهەنگی بە ئامادەبوونی بریكاری وەزیری سامانە سروشتییەكان (23ی ئابی 2021) هۆكاری بەرزبوونەوەی نرخ دەگێڕێتەوە بۆ كەمبوونەوەی هاوردە لە كاتێكدا هەرێمی كوردستان ڕۆژانە پێویستی بە شەش ملیۆن و نیو لیتر هەیە، جگە لەمەش نرخەكەی لەسەر ئاستی جیهان بەرز بووەتەوە.

 

كۆبوونەوەكە داوای كردووە لە وزارەتی سامانە سروشتییەكان بەرچاوڕوونی زیاتر بداتە سەرۆكایەتی ئەنجومەنی وەزیران، بەبێ ئەوەی هیچ لەبارەی نرخەوە بڵێت و وەزیری سامانە سروشتییەكانیش كە مژدەكەی داوە بەشداری كۆبوونەوەكە بكات.

 

لەمبارەیەشەوە عەلی حەمە ساڵح سەرۆكی لیژنەی وزە لە پەرلەمانی كوردستان بڵاویكردەوە " بڕیاربوو ئەمڕۆ لەسەرتاسەری کوردستان لیترێک بەنزین بکرێتە ٦٥٠ دینار، بەڵام نەکرا. پێشتر وتمان نایکەن و دەستیان بۆ چارەسەری دروست نەبردوە".

 

پێشتریش پەرلەمانتاران سەركەوت شەمس و غالب محەمەد و رێبوار كەریم و ئەحمەد حاجی ڕەشید جەختیان كردەوە بەهەوڵی ئەوان سووتەمەنی لە بەغداوە دەگاتە هەرێمی كوردستان و نرخی بەنزین دادەبەزێت.

زیاتر بخوێنەرەوە: کارێکی نایاسایی لە سلێمانی مەترسی زیاتر بەرزبوونەوەی نرخی بەنزین دروست دەکات