گه‌ڕان

Shadow Shadow
سیاسه‌تی

زانیاریی زیاتر

نەتەوە یەکگرتووەکان لەسەر هێرشەکەی تورکیا بۆسەر شنگال هاتەدەنگ

2021.08.20 - 09:33
App store icon Play store icon Play store icon
نەتەوە یەکگرتووەکان لەسەر هێرشەکەی تورکیا بۆسەر شنگال هاتەدەنگ

ناس کورد- 

نوسینگەی نەتەوەیەکگرتووەکان بۆ هاریکاری عێراق (یۆنامی) بەبێ ئەوەی ناوی تورکیا بهێنێت ئیدانەی هێرشەکەی ئەو وڵاتە دەکات بۆسەر شنگال و داوا لە هەموو لایەنەکان دەکات کە ڕێز لە بنەماکانی سەروەری وڵات و یەکپارچەیی خاکەکەی بگرن.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا نوسینگەی نەتەوەیەکگرتووەکان بۆ هاریکاری عێراق (یۆنامی) ڕایگەیاند، "نێردەی نەتەوە یەکگرتووەکان بۆ هاریکاری عیراق بە نیگەرانیەوە بەدواداچوون بۆ پێشهاتە مەترسیدارەکانی ئاسایش لە باکوری عیراقدا دەکات، کە بە داخەوە بووە هۆی کوژران و برینداربوونی چەندین کەس لە شارۆچکەی شنگال و گوندی سکێنیا." 

 

ئاماژەی بەوەشکردووە، "دەبێ دوورنواڕی پێویست لە میانەی ئۆپەراسیۆنە سەربازییەکاندا بکرێت، بە هێرشە ئاسمانییەکانیشەوە، بۆ پاراستن و کەمکردنەوەی زیان لەسەر هاووڵاتییانی مەدەنی کە زۆربەی جار دەبنە قوربانی لێکەوتەکانی ئەو جۆرە هێرشانە."

 

ئەوەشی خستووەتەڕوو، "بەهەمان شێوە گرینگە کە ئەم جۆرە ڕووداوانە بە زوویی و بە تێروتەسەلی لێکۆڵینەوەیان لەبارەوە بکرێت بۆ ئەوەی لێپرسینەوە بەرامبەر گیان لەدەستدان و بریندارکردنی هاووڵاتییانی مەدەنی ئەنجامبدرێت. " 

 

لە ڕاگەیەنراوەکەدا ئەوەش هاتووە، "لە هەمان کاتدا، ئەو خەڵکە لۆکاڵییەی کە ماوەیەکی دوورودرێژە لە ژێر گەمارۆی سەربازیدان بوونەتە قۆچی قوربانی ئەم توندوتیژییانە لە کاتێکدا پێکدادان لە دوای پێکدادان ڕوودەدەن." 

 

بەگوێرەی ڕاگەیەنراوەکە، یونامی داوا لە هەموو لایەنە پەیوەندیدارەکان دەکات کە بەرژەوەندی هاووڵاتییان لە پێشەنگدابنێن و دان بەخۆدابگرن بۆ دوورکەوتنەوە لە پەرەسەندنی مەترسیدار و دەڵێت، " ئاشتی و سەقامگیری پێشمەرجی سەرەکین بۆ دووبارە بنیادنانەوە و گەڕانەوەی ئاوارە ناوەخۆییەکا،. لەبەرئەوە پێویستە ڕێککەوتنی شەنگال بەبێ دواکەوتن جێبەجێبکرێت." 

 

جەختیشیکردووەتەوە، "یونامی بەردەوامە لە هاوکاریکردنی دیالۆگ و داوا لە هەموو لایەنەکان دەکات کە ڕێز لە بنەماکانی سەروەری وڵات و یەکپارچەیی خاکەکەی بگرن. "