گه‌ڕان

Shadow Shadow
سیاسه‌تی

وردەکاریی

یەکەم لێدوانى وەزارەتى تەندروستى لەسەر خوێندنى ئەمساڵ

2021.08.17 - 16:50
App store icon Play store icon Play store icon
یەکەم لێدوانى وەزارەتى تەندروستى لەسەر خوێندنى ئەمساڵ

ناس کورد-

 

وەزارەتى تەندروستى هەرێم رایگەیاند، هێشتا هیچ بڕیارێک نەدراوە لەبارەى خوێندنى ئەمساڵ، داواش لە مامۆستایان دەکات پێش دەستپێکردنى دەوام خۆیان بە ڤاکسین بکوتن.

کەناڵی ناس کورد لە تێلیگرام جۆین بکە   

 

رەهێڵ فەرەیدون بریکارى وەزارەتى تەندروستى ئەمڕۆ سێشەممە بە "ناس کورد" ى راگەیاند، چاوەڕوانى ئەوەن زۆرترین مامۆستا خۆى بە ڤاکسین بکوتێت، پێش ئەوەى پڕۆسەى خوێندن دەستپێبکاتەوە.

 

وتیشى بڕیاردان لەسەر وادەى دەستپێکردنەوەى خوێندن پەیوەندى بە وەزارەتى پەروەردەوە هەیە، بەڵام لەرووى هەڵسەنگاندنى تەندروستییەوە هیچ بریارێک نەدراوە لەو بارەیەوە.

 

رەهێڵ فەرەیدون داواى لە مامۆستایان کرد روو لە بنکەکانى وەرگرتنى ڤاکسین بکەن بۆ ئەوەى لەگەڵ رێنماییە تەندروستییەکان رەوشى تەندروستى لەناوەندەکانى خوێندن مەترسی لەسەر دروستنەبێت.

 

بەگوێرەی ساڵنامەی وەزارەتی پەروەردەی هەرێم لە 15ی ئەیلول دەرگای قوتابخانەکان دەکرێنەوە، بەڵام تا ئێستا دیار نییە ئەمساڵ لەوادەى خۆیدا قوتابخانەکان دەکرێنەوە یاخود نا، لەکاتێکدا ئامارەکانى کۆرۆنا لەهەرێم رووى لە هەڵکشان کردووەتەوە. 

  

ئەحمەد کەرکوکی، بەرپرسی ڕاگەیاندنی سکرتارییەتی یەکێتی مامۆستایانی کوردستان (سێشەممە 17ی ئابی 2021) بە "ناس کورد"ی ڕاگەیاند، " "داوامان لە وەزارەتی پەروەردە کردووە ئەمساڵ لە 1ی ئەیلول واتە لە سەرەتای مانگی داهاتوو خوێندن لە قۆناغەکانی 1 و 2 و 3 دەستپێبکاتەوە و دواتر لە 7ی مانگ قۆناغەکانی دیکە، بۆ ئەوەی پێشوەختە و ماوەی مانگێک وانە تەواونەکراوەکانی ساڵی ڕابردوو بخوێنرێن."   

  

وتیشى "ئەو بڕیارە پێویستی بە ڕەزامەندی ئەنجومەنی وەزیرانە و ئەگەریش قبوڵ نەکرێت ئەوا لە 15ی مانگ خوێندن دەسپێدەکاتەوە، بەڵام زۆر پێویستە کە زووتر دەستپێبکاتەوە."   

  

بەرپرسی ڕاگەیاندنی سکرتارییەتی یەکێتی مامۆستایانی کوردستان باسی لەوەکرد، "ئاستی خوێندکارانی قۆناغی بنەڕەتی زۆر دابەزیوە و خوێندکاری پۆلی شەش هەیە نازانێت بخوێنێتەوە، خوێندکاری پۆلی یەک هەیە نیوەی پیتەکان نازانێت، بۆیە ئەگەر ئەوە چارەسەر نەکرێت ئەوا زیانی گەورە لە داهاتووی ئەو خوێندکارانە دەدات و جیلێکی نەخوێندەوار پێدەگەیەنرێت."