گه‌ڕان

Shadow Shadow
سیاسه‌تی

بەپەلە

ڕوونکردنەوەیەک لەبارەی قۆرخکاریی بۆ چەند کۆمپانیایەک

2021.08.14 - 17:33
App store icon Play store icon Play store icon
ڕوونکردنەوەیەک لەبارەی قۆرخکاریی بۆ چەند کۆمپانیایەک

ناس کورد- 

وەزارەتی کشتوکاڵی هەرێم ڕوونکردنەوەیەکی لەبارەی پۆستێکی سەرۆکی لیژنەی کشتوکاڵ و  چەند پرسێکی جیاواز بڵاوکردەوە و ڕەتیدەکاتەوە، قۆرخکاری لەلایەن هیچ کەسێکەوە کرابێت، یاخود باج خرابێتەسەر پەینی کیمیایی و دەڵێت، نرخی پەینی کیمیایی بەهۆی بەرزبوونەوەی دۆلارەوە گران بووە.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا وەزارەتی کشتوکاڵی هەرێم (شەممە 14ی ئابی 2021) ڕایگەیاند، "پەرلەمانتار و وەزیری پێشوو، بەڕێز عەبدولستار مەجید، لەرێکەوتی 2021/8/12 لە ئەکاونتی فەرمی خۆیدا پۆستێکی کردووە و کۆمەڵێ پرسیاری ورژاندووە کە دڵنیاین جەنابیان باش ئاگاداری هەموو بارو دۆخێکی سێکتەری کشتوکاڵ و سامانی ئاژەڵ و ئاودێریە و ماوەیەکیش وەزیر بووە و لە ئێستاشدا سەرۆکی لێژنەی کشتوکاڵ و ئاودێریە لە پەرلەمانی کوردستان." 

 

وەزارەتەکە لەم خاڵەنەدا وەڵامی ناوبراوی داوەتەوە: 

 

یەکەم /سەبارەت بە گرانبوونی نرخی پەینی کیمیاوی بەداخەوە کاک عبدالستار رونکردنەوەی پێویستی نەداوە لەسەر چۆنیەتی گرانبوون و بەرزبونەوەی نرخی پەینی کیمیایی، چونکە پەینی کیمیایی لە ئاستی جیهاندا وەکو هەر بەرهەمێکی تری هاوردەکراو گۆڕانی بەسەرداهاتووە و گرانبووە، بە بەراورد بەساڵانی پێشوو، کە ئەمەش دەگەرێتەوە بۆ  گۆڕانکاریەکان و کێشەی بەرهەمهێنانی کۆمپانیا گەورەکانی بواری بەرهەمهێنانی پەین و بەرزبونەوەی نرخی دۆلار  بەرامبەر بەدینار و بەربڵاوبونی پەتایی کۆرۆنا و بەرزبونەوەی بۆرسەی پەین، کە بەڕێژەی ( %30 )  کاریگەری راستەوخۆی خستۆتە سەر گرانبوونی تێچوونی نرخی بەرهەمهێنان و هاوردەکردنی پەین بۆ هەرێمی کوردستان لە بازاڕەکانی دەرەوەدا.

 

دووەم/  دابەزینی بەهای دیناری عێراقی بەرامبەر دۆلار هۆکارێکی تری ناوخۆییە کە کاریگەری خستۆتە سەر گرانبوونی نرخی پەین .

 

سێیەم/سەبارەت بە دەنگۆی دانانی باجێکی زۆر لەسەر پەینی کیمیایی لەلایەن حکومەتی هەرێمی کوردستان، لەلایەن وەزارەتی کشتوکاڵ و سەرچاوەکانی ئاو هیچ جۆرە باجێک لەسەر هاوردەکردنی پەین وەرناگیرێت، بەڵکو بەپێچەوانەوە هەنگاوی زۆر گرنگ و جدی نراوە بۆ هەماهەنگی لەگەڵ لایەنە پەیوەندی دارەکان و داواکراوە  لە سەرۆکایەتی ئەنجومەنی وەزیران بۆ مەبەستی لێخۆشبوونی گومرگی و ئاسانکاری بۆ هاوردەکردنی پەین لەدەرەوە.

 

چوارەم / سەبارەت بە قۆرخکاری بۆ چەند کۆمپانیایەک بۆ هاوردەکردنی پەین بەهیچ جۆرێک لەلایەن وەزارەتی کشتوکاڵ و سەرچاوەکانی ئاو قۆرخکاری بۆ هیچ کۆمپانیایەک نەکراوە، بەڵکو لەم کابینەی لەلایەن وەزارەتی کشتوکاڵ و سەرچاوەکانی ئاو بڕیاردراوە بەشێوازێکی ئازادانە کۆمپانیاکان دەتوانن مۆڵەتی فەرمی وەربگرن و پەین هاوردە بکەن ،چونکە وەزارەتمان دژی هەموو جۆرە قۆرخکاریەکە و ڕێگەی بەم دیاردەیە نەداوە ، بۆ دڵنیایی زیاتری جوتیاران ، نوسراوی فەرمی ئاراستەی وەزارەتی دارایی حکومەتی هەرێمی کوردستان کراوە بۆ ئەوەی کە بەهیچ شێوەیەک باج نەخرێتە سەر بەرهەمی هاوردەی پەینی کیمیایی لە دەرەوەی هەرێمی کوردستان و بەردەوام ئاسانکاری بۆ کۆمپانیاکان کراوە لەڕووی کارگێری و رۆتینەوە بۆ ئەوەی دەرفەتی زیاتری هاوردەکردنی پەین بدرێ  بەمەبەستی دروستکردنی  کێبڕکێ و دابینکردنی پەین و دابەزینی نرخی پەین لە پێناو کەمکردنەوەی فشار و خزمەتی زیاتری جوتیارانی هەرێمی کوردستان بەمەرجێک کۆمپانیاکە نوسراوی ب.گ.کشتوکاڵی پارێزگاکان و رەزمەندی ئاسایشی هەبێت و پەینەکە رێگەپێدراو بێت .

 

پێنجەم/ لەکابینەی نۆیەمی حکومەتی هەرێمی کوردستان، وەزارەتی کشتوکاڵ و سەرچاوەکانی ئاو بەهۆی  قەیرانی داریی و نەبوونی بودجەی پاڵپشتی کراوی (اعاناتی زراعی) و بەردەوام نەبوونی قەرزی کشتوکاڵی لە بانقەکان نەتوانراوە هاوشێوەی ساڵانی پێشوو بڕێک لەو هاوکاریانە وەکو دابینکردنی پەینی کیمیاوی بۆ جوتیاران دابین و دابەش بکات لەڕێگەی فەرمانگەکانی وەزارەتمان لە پارێزگاکانی هەرێمی کوردستان .

 

وەزارەتەکە راشیگەیاندووە، " لە ئێستادا وەزارەتی کشتوکاڵ و سەرچاوەکانی ئاو کار لەسەر بەرنامەیەکی هەماهەنگی پەرەپێدان و پاڵپشتی جوتیاران دەکات لەگەڵ سەرۆکایەتی ئەنجومەنی وەزیران و حکومەتی فیدراڵ و رێکخراوە نێودەوڵەتیەکان و بەشداری پێکردنی کەرتی تایبەت ،وە بەردەوامە بۆ کارئاسانی و رووبەروبونەوەی ئەم قەیران و فشارانەی دەکەوێتە سەر جوتیارانی خۆشەویستی هەرێمی کوردستان ."