گه‌ڕان

Shadow Shadow
سیاسه‌تی

وردەکاریی

’’نزیکبونەوە’’..پەیامێک لەماڵى لاهور جەنگییەوە بۆ بافڵ تاڵەبانى

2021.08.10 - 00:46
App store icon Play store icon Play store icon
’’نزیکبونەوە’’..پەیامێک لەماڵى لاهور جەنگییەوە بۆ بافڵ تاڵەبانى

ناس کورد-

 

ژمارەیەک لەلایەنگرانى لاهور جەنگى بانگەشەى نزیکبوونەوە و کۆتایی کێشەکانى نێوان هاوسەرۆکانى یەکێتى دەکەن، لەکاتێکدا ئەوانەى سەردانى بافڵ تاڵەبانیان کردووە جەختدەکەنەوە کە ئەو سورە لەسەر هەنگاوەکانى ئێستاى.

کەناڵی ناس کورد لە تێلیگرام جۆین بکە   

 

ژمارەیەک لایەنگرى لاهور جەنگى کە لەدواى گرژییەکانەوە "پشتێنى مرۆییان" لەبەردەم ماڵەکەى دروستکردووە درەنگانى ئەمشەو لەماڵى لاهور جەنگیەوە رایانگەیاند، کە نزیکبونەوە و لێکتێگەیشتن هەیە لەنێوان هاوسەرۆکاندا و "مژدەى چارەسەرى کێشەکان بەڕێوەیە".

 

هەروەها داوایان لە بافڵ تاڵەبانى کرد، لەگەڵ لاهور تاڵەبانى ئاشتبێتەوە و ناکۆکییەکان بگەرێنرێنەوە بۆ دەزگا رەسمییەکانى یەکێتى و لەوێ بڕیارى لێبدرێت.

 

تا ئێستا بەفەرمى بافڵ تاڵەبانى و لاهور جەنگى هیچ قسەیەکیان لەسەر نزیکبوونەوەیان نەکردووە دواى تێپەربوونى مانگێک بەسەر سەرهەڵدانى کێشەکانى نێوانیان.

 

لاى خۆیەوە، دکتۆرە نیکۆڵا مامۆستای زانکۆ و کچی پێشمەرگەی دێرین ئەشرەف شاڵی کە ئەمرۆ لەگەڵ ژمارەیەک کەسى دیکە سەردانى بافڵ تاڵەبانیان کردووە لە بڵاوکراوەیەکدا ئاماژەى بەوەکردووە، بافڵ تاڵەبانی پێ وتون ھەنگاوەکانی بۆ گۆڕانکاری بەردەوام دەبن، لەگەڵ ئەوەشدا بەڵێنى پێداون چارەسەرکردنی کۆی کێشەکان بەئاڕاستەی پاراستنی ئارامی و سەقامگیری ھەرێمی کوردستان و بەتایبەتیتر شاری سلێمانی دەبێت.

 

دۆخی یەكێتیی لەپاش 8 تەمموز    

  

ئێوارەی 8 تەمموزی 2021، بافڵ تاڵەبانی  هاوسەرۆكی یەكێتی و قوباد تاڵەبانی جێگری سەرۆك وەزیران، بەرپرسانی دەزگای زانیاری و دژە تیرۆریان گۆڕی كە یەكەمیان كەسێكی نزیكی لاهور جەنگی و ئەویتریان پۆلاد جەنگی بوو، بەدوای ئەوەشدا بافڵ تاڵەبانی دەستی گرت بەسەر دەزگا میدیایی و حزبییەكانی سەر بە لاهور شێخ جەنگی هاوسەرۆكەكەیتری یەكێتی و پرۆسەكەش لەمیدیای ئەم حیزبەوە ناونرا "ڕاستكردنەوەی ڕێڕەو" و گەیشتە دەركردنی فرمانی گرتن بۆ لاهور شێخ جەنگی و دووان لە براكانی و هەندێك لە بەرپرسە نزیكەكانی.       

  

 میدیا فەرمی و نیمچە فەرمییەكانیتری یەكێتی و بافڵ تاڵەبانی و لێدوانە رۆژنامەوانییەكانی كوڕانی مام جەلال و شاناز ئیبراهیم ئەحمەد پێداگرن لەسەر ئەوەی بازنەی دەوروبەری لاهور جەنگی و دووان لە براكانی هۆكاری سەرەكی تەشەنەكردنی قاچاخچێتی و پارە سپیكردنەوە و داگیركردنی زەوی و بەكارهێنانی هێزە ئەمنییەكانیان بوون بۆ مەرامی شەخسی لەژێر دەسەڵاتی یەكێتی، لە بەرامبەریشدا لاهور شێخ جەنگی جەخت لەوە دەكاتەوە ئەوەی بەرامبەری كراوە پیلانگێڕی توركیا و پارتییە و هۆكارەكەشی هاوكاریكردنی بووە بۆ رۆژئاوای كوردستان و هەوڵدانی بووە بۆ گۆڕینی باڵانسی هێز لەنێوان پارتی و یەكێتی.