گه‌ڕان

Shadow Shadow
سیاسه‌تی

هاتوچۆى سلێمانى لەسەر دەستبەسەردانەگرتنى ئۆتۆمبێلى بێسەرەتا ڕونکردنەوە دەدات

2021.08.09 - 16:01
App store icon Play store icon Play store icon
هاتوچۆى سلێمانى لەسەر دەستبەسەردانەگرتنى ئۆتۆمبێلى بێسەرەتا ڕونکردنەوە دەدات

ناس کورد-

 

هاتوچۆى سلێمانى جەختدەکاتەوە لەسەر دەستبەسەرداگرتنى هەموو جۆرە ئۆتۆمبێلێکى بێ سەرەتا، لەکاتێکدا هاتوچۆى هەرێم دەڵێت بڕیارەکە ئەو ئۆتۆمبێلانە ناگرێتەوە کە کۆدیان بۆ کراوە.

 

کەناڵی ناس کورد لە تێلیگرام جۆین بکە   

 

سامر ستار بەرپرسى مەفرەزەکانى ناوشارى سلێمانى، ئەمڕۆ(یەکشەممە 9ى ئابى 2021) بە "ناس کورد" ى ڕاگەیاند، "هەر ئۆتۆمبێلێکى بێسەرەتا کۆدى تۆمارکردنى هەبێت یاخود نەبێت بێتە سەر شەقام دەستی بەسەردا دەگرین ".

 

وتیشى  لەئێستایا ناچن بە شوێن ئەو ئۆتۆمبێلە بێسەرەتایانەدا بگەڕێگرێن لە ماڵ و گەراج بیانگرن، تەنها بڕیارەکە ئەوەیە کە نەیەنە سەرشەقام.

 

ماوەى چەند هەفتەیەکە بە فەرمانی جێگری سەرۆکی حکومەتی هەرێم هەڵمەتى بە دەستبەسەرداگرتنی ئۆتۆمبێلی بێ سەرەتا و چەکی بێ مۆڵەت لە سنوری پارێزگای سلێمانی و هەڵەبجە و ئیدارەکانی گەرمیان و ڕاپەڕین دەستیپێکردووە، ئەوەش ناڕەزایی ئەو کەسانەی لێکەوتەوە کە ئۆتۆمبێلی بێ سەرەتا و خوار مۆدێلیان هەیە.  

 

لیوا عەبدولقادر عەزیز، بەڕێوەبەری گشتیی هاتوچۆی هەرێم (شەممە 7ی ئابی 2021) بە "ناس کورد"ی ڕاگەیاند، "بڕیاری دەستبەسەرداگرتنی ئۆتۆمبێلی بێ سەرەتا و بڕیارەکەی ماوەی ڕابردووی جێگری سەرۆکی حکومەتی هەرێمیش ئەو ئۆتۆمبێلانە ناگرێتەوە کە لەماوەی ڕابردوودا لە بەڕێوەبەرایەتییەکانی هاتوچۆ کۆدیان بۆ کراوە و فۆڕمیان پڕکردووەتەوە."   

  

وتیشی، "ئەو ئۆتۆمبێلانە کە نزیکەی 20 هەزار ئۆتۆمبێلن نەک دەستیان بەسەردا ناگیرێت، تەنانەت سزاش نادرێن، بەڵکو بڕیارەکە ئەو ئۆتۆمبێلانە دەگرێتەوە کە بێ سەرەتان و هیچ کۆدێکیشیان بۆ نەکراوە."     

  

هاوکات لەبارەی چارەنوسی ئەو ئۆتۆمبێلانە و پێدانی ژمارە پێیان، بەڕێوەبەری گشتیی هاتوچۆی هەرێم ڕایگەیاند، "داوامان لە وەزارەتی ناوخۆ کردووە لەوبارەیەوە بڕیارێک بدرێت، بەڵام تائێستا هیچ وەڵامێکیان نەداوینەتەوە."   

 

بەپێی ئامارەکان لەهەرێمى کوردستان نزیکەى 19 هەزار ئۆتۆمبێلى بێسەرەتا سەرژمێرى کراون کە زۆرترینیان لەسنورى قەزاى سۆرانە کە نۆ هەزار ئۆتۆمبێلە، لەدواى ئەویش سلێمانى بە سێ هەزار، پاشان راپەڕین بە 2000، هەولێر 1500-1600 دهۆک 1500 ئۆتۆمبێل.