گه‌ڕان

Shadow Shadow
سیاسه‌تی

شیكار

كێشەی هاوسەرۆكانی یەكێتی: بەرەو یەكلاییكردنەوەی كۆتایی

2021.08.02 - 10:51
App store icon Play store icon Play store icon
كێشەی هاوسەرۆكانی یەكێتی: بەرەو یەكلاییكردنەوەی كۆتایی

ناس كورد

پاش زیاتر لە سێ هەفتە لەململانێ و كێشمەكێش باڵی زاڵبووی ناو یەكێتی كارتێكی سووری ڕاكێشا بەڕووی لاهور شێخ جەنگی: بڵاوكردنەوەی بەڵگەنامە و دۆسییە هەستیارەكان یان بەجێهێشتنی كوردستان، ئەمەش دەكرێت وەك كۆتا هەوڵی ناچاركردنی هاوسەرۆك بخوێنرێتەوە بە جێهێشتنی گۆڕەپان كە بەكردەیی پێی ناوەتە قۆناغی پاش سەردەمی هاوسەرۆكایەتی.

کەناڵی ناس کورد لە تێلیگرام جۆین بکە   

 

لە دوو هەفتەی ڕابردوودا، دەركردنی فرمانی گرتن بۆ دوو لەبراكانی لاهور شێخ جەنگی و هەندێ لە نزیكەكانیان لەگەڵ هەڵدانەوەی دۆسییەكانی سەردەمی كاری د. میران محەمەدی نزیك لێی، لاهور جەنگییان ناچار بەوە نەكرد لەم قۆناغەدا كوردستان بەجێبهێڵێت كە بەقسەی خۆی لەسەرەتای قەیرانەكەوە ئەم داوایەی لێكراوە، بەڵام ڕوون نییە تا چەند لەبەردەم هەڵمەتی سەرەتای ئەم هەفتەیە بەرگری دەكات كە لەمیدیای ماڵی مام جەلالدا یەكێك لە ناونیشانە سەرەكییەكانی "ئاشكراكردنی بەڵگەنامەیە" و هەر لەسەرەتاشەوە لاهور جەنگی باسی لەوەكردووە ڕەنگە بگاتە دەركردنی فرمانی گرتنیش بۆ خودی خۆی، بەتایبەت كە ئێستا باس لەوە دەكرێت داواكراوی یاسایی داڵدەداوە لەماڵەكەی خۆی كە د. میرانی ئەندامی مەكتەبی سیاسییە. 

 

بافڵ تاڵەبانی و ماڵی مام جەلال لەبەردەم كۆمەڵێك پێشهاتی خێرادان كە چیتر دواخستن هەڵناگرێت؛ سەرۆكایەتی هاوپەیمانی كوردستانیان وەرگرتووە و دوو مانگ و هەفتەیەكیش ماوە بۆ وادەی چاوەڕوانكراوی هەڵبژاردن. سێ هەفتەیە لە شانەخڕێدان لەگەڵ ڕكابەرەكەیان كە لاهور جەنگییە و دەستیان بەسەر دەسەڵاتە حزبی و زۆربەی توانا میدیاییەكانیدا گرتووە، كەچی لەدوای دیداری شاندێكی كۆمەڵ سەرەتای ئەم هەفتەیە (1ی ئابی 2021) لەپەیجی فەرمی خۆیەوە باسی لەپەنابردن بۆ رێكاری حیزبی و پەیڕەوییانە كردبوو بۆ چارەسەركردنی كێشەكانی لەگەڵ بافڵ تاڵەبانی، وەك ئەوەی هێشتا هیوایەك مابێت بۆ گەڕانەوەی و كەنارخستنی یەكجاری نەبێت، ئەمەش دژی پێداگری ماڵی تاڵەبانییە لەسەر داخستنی سەرجەم ئەو دەرگایانەی ڕوویان لە پێش 8ی تەمموزە. 

 

سێیەم هەفتەی كێشمەكێش هەر لەناو بنەماڵەكان و لە سەرۆكایەتی یەكێتیدا بەرێوەدەچن بەبێ ئەوەی هیچ لە ئۆرگانەكانی سەركردایەتی و مەكتەب سیاسی و ئەنجومەنی باڵای یەكێتی رۆڵ یان قسەیان هەبێت، ئەمەش دەشێت بە قازانجی بافڵ بێت كە دەرفەتی زیاتری متمانەپێكردنیانی هەیە بۆ ئەوەی ناوی ناوە "ڕاستكردنەوەی ڕێڕەو" یان كردبنییە دەرەوەی بازنە تا بەكردەیی ئەوەی دەیەوێت بیكاتە واقیع و دواتر شەرعیەتی بۆ وەرگرێت، لە بەرامبەریشدا دەكرێت وەهاش بخوێنرێتەوە هێشتا یەكلاییبوونەوەی سەكردایەتی بۆ بافڵ مسۆگەر نەكراوە و كاتی زیاتری ماوە بەتایبەت كە زۆربەیان سەركەوتن و هەڵبژاردنیان بەسەركردایەتی دەگەڕێتەوە بۆ چاكە و پلانی لاهور شێخ جەنگی لەناو كۆنگرەی چوارەمی یەكێتی. 

 

هەموو ئاماژەكان بەرەو ئەوەن ئەم هەفتەیە و هەفتەی داهاتوو، یەكلاكەرەوە دەبن بۆ كێشەی هاوسەرۆكان بەتایبەت پاش ئەوەی هەردوولا كاتی زۆریان لەبەردەمدا نییە، سەرەتای ئەم یەكلاكردنەوەیەش بەوە ڕاگەیەنراوە كە هەڵمەتێكی گۆڕانكاری دەبێت لەمەڵبەند و ئۆرگانەكانی یەكێتی كە دەپەڕێتەوە بۆ هەندێك بەرپرسی باڵای حكومی، بەم جۆرەش نزیكەكانی لاهور جەنگی لە جومگە گرنگەكانی حیزب و حكومەت خراونەتە ڕیزی گۆڕانكاری، ئەگەر ئەمەش چووەسەر ئەوە هاوسەرۆكی ڕاگیراوی یەكێتی هیچ هیوایەكی نامێنێت بەوەی كێشەكەی لەناو حیزبدا چارەسەر بكرێت و بە ڕادەیەكی زۆر تەنها دەبێتەوە.

me_ga.php?id=4331