گه‌ڕان

Shadow Shadow
سیاسه‌تی

بەپەلە

بافڵ تاڵەبانی قسەی نوێ لەبارەی گۆڕانکارییەکانی یەکێتییەوە دەکات

2021.07.31 - 18:19
App store icon Play store icon Play store icon
بافڵ تاڵەبانی قسەی نوێ لەبارەی گۆڕانکارییەکانی یەکێتییەوە دەکات

ناس کورد- 

لەمیانەی کۆبوونەوەی لەگەڵ عەلی باپیر، سەرۆکی کۆمەڵی دادوەری و شاندی یاوەری، بافڵ تاڵەبانی لەبارەی گۆڕانکارییەکانی نێو یەکێتییەوە ڕایگەیاند، گۆڕانکارییەکان لەسەر بنەمای پاراستنی یەکێتی ناو یەکێتی و ڕزگاربوون بووە لە دەستەگەری و بەرژەوەندی شەخسی و دەشڵێت، پەیوەندییەکانیان لەگەڵ دۆستەکانیان بونیاد دەنێنەوە، هاوکات لاهور شێخ جەنگی دەڵێت، بەڕێگەی حزبی کێشەکان چارەسەر دەکەن. 

کەناڵی ناس کورد لە تێلیگرام جۆین بکە   

 

نوسینگەى باڤڵ تاڵەبانى، هاوسەرۆکى یەکێتى (31ى تەموزى 2021) لە بڵاوکراوەیەکدا ئاماژەى بەوەداوە، ناوبراو لەبارەگای مەکتەبی سیاسی یەکێتی پێشوازی لە عەلی باپیر، سەرۆکی کۆمەڵی دادگەری کوردستان و وەفدێکی یاوەری کرد و لە کۆبوونەوەیەکدا کە ژمارەیەک لە ئەندامانی دەستەی کارگێڕی و مەکتەبی سیاسی یەکێتی ئامادەیبوون، گفتوگۆ لەسەر دوایین پێشھاتە سیاسی، ئابووری و ئەمنییەکانی ھەرێم و عێراق کرا و هەردوولا بۆچوونی خۆیان لەبارەی ھەڵبژاردنی داھاتووی پەرلەمانی عێراق خستەڕوو.

 

ئەوەش هاتووە، لە بەشێکى ترى کۆبوونەوەکەدا ھەردوولا جەختیان لە پەرەپێدانی پەیوەندییەکانی نێوانییان کردەوە بە ئاڕاستەی لێکنزیکردنەوەی زیاتر و ھەماھەنگی و کاری ھاوبەش لەپێناو بەرژەوەندی گشتی، ھاوڕابوون کە ئەم قۆناغە وادەخوازێت ماڵی کورد ڕێکبخرێتەوە و دوای ھەڵبژاردنەکانیش زەمینەی لەبار بڕەخسێنرێت بۆ کاری پێکەوەیی تاوەکو ھەموو لایەنەکانی کورد لەچوارچێوەی بەرەیەکی نیشتمانی لەبەغدا پێکەوە یەک پەیامی کوردستانی بگەیەننە عێراق و داکۆکی لە مافە دەستوورییەکان بکرێت.

 

نوسینگەى باڤڵ تاڵەبانى ڕونیشیکردووەتەوە، ناوبراو و  وەفدی میوانی دەربارەی گۆڕانکارییەکان بەرچاوڕوون کرد و ڕایگەیاند، ڕێڕەوی حزبیی یەکێتی لەسەر شاڕێیەکی تەندروستی ڕێکخراوەییە و پەیوەندییەکانیان لەگەڵ دۆستەکانیان بونیاد دەنێنەوە، بە گیانی لێبوردەییەوە لەگەڵ ھەمووان پێکەوە درێژە بە خەبات دەدەن لەپێناو کوردستانێکی بەھێزتر و دابینکردنی ژیانێکی شایستە بۆ خەڵکی کوردستان.

 

سەبارەت بە گۆڕانکارییەکانى ئەم دواییەى ناو حزبەکەى، هاوسەرۆکى یەکێتى جەختی لەوەش کردووەتەوە، گۆڕانکارییەکان لەسەر بنەمای پاراستنی یەکێتی ناو یەکێتی و ڕزگاربوون بووە لە دەستەگەری و بەرژەوەندی شەخسی، بەم ھەنگاوانەش یەکێتییان لە ھەڵدێر پاراست.

 

لەدوای ئەو کۆبوونەوەیە، عەلی باپیر و شاندی یاوەری سەردانی لاهور شێخ جەنگییان کرد و دیدارێکیان ئەنجامدا. 

 

بەگوێرەی ڕاگەیەنراوێکی نوسینگەی لاهور شێخ جەنگی، "لە دیدارێکدا گفتوگۆ کرا دەربارەی پەرەپێدانی پەیوەندییەکانی  نێوان هەردوولا و  کێشەکانی ناوخۆی یەکێتیی نیشتمانیی کوردستان و هەوڵەکانی تایبەت بە چارەسەرکردنیان."  

  

ئاماژە بەوەشکراوە، "لاهور شێخ جەنگی سوپاسی پەرۆشی و هەوڵەکانی مامۆستا عەلی باپیری کرد بۆ پشتیوانیکردن لە یەکێتیی و چارەسەرکردنی کێشەکان، هاوکات دڵنیاییدا لەوەی هیچ کارێک ناکەن پێچەوانەی پەیڕەوی ناوخۆی یەکێتیی بێت."  

  

بەگوێرەی ڕاگەیەنراوەکە، لاهور شێخ جەنگی ڕاشیگەیاندووە، " هەوڵمانداوە هەموو کێشەکان بە ڕێگای حزبی و لە چوارچێوەی کۆبوونەوەی ئەنجوومەنی سەرکردایەتیی حزبەکەم چارەسەر بکرێن."  

  

ئەوەش هاتووە، "لای خۆیەوە سه‌رۆكی كۆمه‌ڵی دادگه‌ریی كوردستان ستایشی ڕۆڵی حەکیمانەی هاوسەرۆک لاهور شێخ جەنگی کرد کە بە شێوەیەکی زۆرباش مامەڵەی لەگەڵ دۆخەکەدا کردووە و توانیویەتی هاوسەنگی بپارێزێت."  

  

ئاماژە بەوەشکراوە، "لە بەشێکی تری دیدارەکەدا باسی هەڵبژاردنەکانی داهاتوو کرا و هەردوولا جەختیان لە یەکڕیزی و تەبایی نێوان سەرجەم هێز و لایەنە کوردستانییەکان کردەوە بۆ ئەوەی پێگەی کورد لە بەغدا بەهێز بێت و بە یەکدەنگی پشتیوانی لە مافە نەتەوەیی و نیشتمانییەکان بکەن."