گه‌ڕان

Shadow Shadow
سیاسه‌تی

قوباد تاڵەبانى بە سەرۆکى نوێی هاوپەیمانى یەکێتى و گۆڕان دیاریکرا

2021.07.29 - 13:12
App store icon Play store icon Play store icon
قوباد تاڵەبانى بە سەرۆکى نوێی هاوپەیمانى یەکێتى و گۆڕان دیاریکرا

ناس کورد-

یەکێتى نیشتیمانى کوردستان و بزوتنەوەى گۆڕان قوباد تاڵەبانیان بەسەرۆکى هاوپەیمانێتى نێوانیان بۆ هەڵبژاردنى پێشوەختەى عێراق دیاریکرد، کە شوێنى لاهور شێخ جەنگى سەرۆکى پێشووى هاوپەیمانێتییەکە دەگرێتەوە.

کەناڵی ناس کورد لە تێلیگرام جۆین بکە   

 

دیاریکردنى قوباد تاڵەبانى بەسەرۆکى هاوپەیمانى کوردستان، لەکۆبوونەوەى ئەمڕۆى گۆڕان و یەکێتیدا بڕیارى لێدرا کە لەسلێمانى بەڕێوەچوو.

 

دواى کۆبوونەوەکە یەکێتى و گۆڕان لە راگەیەنراوێکى هاوبەشدا رایانگەیاند، تەوەری سەرەکی کۆبوونەوەکە گفتوگۆکردن بوو لەسەر دوایین گۆڕانکاریی و پێشھاتە سیاسی و ئابوورییەکانی ھەرێمی کوردستان و عێراق و چڕکردنەوەی هەوڵەکان بەمەبەستی خزمەتکردنی زیاتری خەڵک و وەڵامدانەوەی پێداویستییەکانی ھاوڵاتیان".

 

ئاماژە بەوەشکراوە "لە بەشێکی دیکەی کۆبوونەوەکەدا قوباد تاڵەبانی وەک سەرۆکی نوێی ھاوپەیمانی کوردستان پەسەندکرا و ھەردوولا جەختیان لە پشتگیریکردنی ناوبراو و سەرخستنی ھاوپەیمانیەتییەکە کردەوە. لەو چوارچێوەیەدا بڕیاردرا بە کاراکردنی لیژنەکانی هەڵبژاردن و تەواوکردنی ئامادەکارییەکان و چڕکردنی هەماهەنگی نێوان هەردوولا".‎

 

پێشتر "ناس کورد" ئاشکرایکرد، ناوی قوباد تاڵەبانی یەکلاییکراوەتەوە بۆ سەرۆکایەتیکردنی هاوپەیمانێتی یەکێتی و گۆڕان بۆ هەڵبژاردنی چاوەڕوانکراوی تشرینی داهاتووی ئەنجومەنی نوێنەرانی عێراق کە بڕیاربوو لاهور شێخ جەنگی سەرۆکایەتی بکات.

 

چەند سەرچاوەیەکی باڵاو ئاگادار لەیەکێتی نیشتمانی کوردستان و بزوتنەوەی گۆڕان ئەوەیان بۆ "ناس کورد" پشتڕاستکردەوە (29 تەمموزی 2021) کە ئەوە یەکلاییکراوەتەوە قوباد تاڵەبانی دەبێتە جێگرەوەی لاهور شێخ جەنگی سەرۆکی هاوپەیمانی کوردستان لەنێوان یەکێتی و گۆڕان و هەنگاوی کردەییشی بۆ ئەو کارە دەستپێکردووە.

 

هەر بەگوێرەی ئەو سەرچاوانە قوباد تاڵەبانی بەم نزیکانە لەگەڵ گۆڕان کۆدەبێتەوە لەبارەی پلان و ستراتیژی بانگەشەی هەڵبژاردن و ئەگەرچی دەنگۆ و ئەگەری دواکەوتنی پرۆسەکە لەئارادایە بەڵام کارەکان لە ئێستادا بەجۆرێک بەڕێوەدەچن کە هەڵبژاردن لەوادەی دیاریکراوی خۆیدا کە 10 تشرینی یەکەمی داهاتووە ئەنجام دەدرێت.

 

لاهور شێخ جەنگی، هاوسەرۆکی یەکێتی لە پەیامێکدا بەبۆنەی جەژنی قوربانەوە (20 تەمموزی 2021 کشانەوەی خۆ لە سەرۆکایەتیکردنی هاوپەیمانی کوردستانی ڕاگەیاند و هۆکارەکەشی گێڕایەوە بۆ "ئەم پێشهاتە نوێیانەی ناو یەکێتی"، ئەمەش لەپاش ڕادەستکردنی دەسەڵاتەکانی بە بافڵ تاڵەبانی و دەستگرتن بەسەر دامودەزگا ئەمنی و میدیاییەکانی لە ڕۆژانی پاش 8 تەمموز.

 

ئێوارەی 1 ئایاری 2021 ئەنجومەنی کۆمسیارانی کۆمسیۆنی باڵای سەربەخۆی هەڵبژاردنەکانی عێراق ڕایگەیاند، بەپێى ماددەى ٢٩ى یاساى حزبە سیاسیەکان و ژمارە ٣٦ى ساڵى ٢٠١٥ و ڕێوشوێنەکانى هاوپەیمانى و یەکگرتن ژمارە ٢ى ساڵى ٢٠٢٠، بە زۆرینەى دەنگ ڕەزامەندی درا لەسەر دامەزراندنى هاوپەیمانێتیەکەى یەکێتى و بزوتنەوەى گۆڕان بە ناونیشانى (هاوپەیمانى کوردستان).