گه‌ڕان

Shadow Shadow
سیاسه‌تی

دایکی: کوڕەکەم پەشۆکاندوومی

دایکی و هاوسەر و کچی جوانڕۆی باڵەبان ’’یەک داواکاری’’ لە حکومەت دەکەن

2021.07.28 - 20:10
App store icon Play store icon Play store icon
دایکی و هاوسەر و کچی جوانڕۆی باڵەبان ’’یەک داواکاری’’ لە حکومەت دەکەن

ناس كورد-

دايك و هاوسەر و کچی جوانڕۆی باڵەبان کە 40 ڕۆژ لەمەوپێش تەرمەکەى بە خنکێنراوی دۆزرایەوە داوا دەکەن حکومەت بکوژانی دەستگیربکات و "بە بەرچاوی خۆمانەوە بیانکوژێتەوە." 

کەناڵی ناس کورد لە تێلیگرام جۆین بکە   

 

بەرەبەیانى 22ى حوزەیرانى 2021، تەرمى هونەرمەند جوانڕۆى باڵەبان کە ئەندامى تیپی جوقی سەربازی وەزارەتی پێشمەرگە بوو لە سنورى هەولێر بەخنکێنراوى دۆزرایەوە و تائێستا هۆکارى خنکاندنى لەلایەن پۆلیسەوە ئاشکرانەکراوە، ئەمڕۆ کەسوکار و هاوڕێیان جوانڕۆ چلەی ماتەمینییان بۆ گێڕا.

 

دایکی جوانڕۆ بە ناس کوردی وت، "کوڕەکەمان نیشتیمان پەروەر بوو، خۆشەویستى خەڵک بوو، داوا لە حکومەت دەکەین کەیسەکەى بەلاڕێدا نەبرێت".

دایکی جوانڕۆ وتی "ببورن بەهۆی جوانڕۆوە پەشۆکاوم، بەڵام ئەگەر حکومەت بیەوێت بە 24 کاتژمێر بکوژى کوڕەکەم دەدۆزێتەوە."

 

هاوکات هاوسەرى باڵەبان ئاماژەى بەوە کرد، حکومەت بۆ دۆزینەوەى بکوژان "هەر بە ئێمە دەڵێن پەلە مەکەن".

 

پێشتر سەرچاوەیەکی ئاگادار بە ناس کوردی ڕایگەیاند، چەند کەسێک لەسەر دۆسیەى خنکاندنى جوانڕۆى باڵەبان دەستگیرکراون و لێکۆڵینەوە لە کەیسەکە بەردەوامە.

 

هاوکات ڕۆژی 12ی تەموزی 2021، حاجى لەتیف، خزمى نزیکى جوانڕۆ بە "ناس کورد"ى ڕاگەیاند، "وەزارەتى پێشمەرگە پێیانووتین ئەوان بە دواى دۆسیەى کوشتنەکەدا دەچن، تائێستاش هیچى نوێ یان پێ نەوتوین."

 

هونەرمەند جوانڕۆی باڵەبان ئەندامی لقی سلێمانی سەندیکای ھونەرمەندانی کوردستان و کۆمەڵەی ھونەری میللی کوردستان و تیپی جوقی سەربازی وەزارەتی پێشمەرگە بوو.

 

سەرچاوەیەک لە وەزارەتى پێشمەرگە بە "ناس کورد"ى وت، "لەسەر دۆسیەکەى جوانڕۆى باڵەبان خەڵک دەست بەسەر کراوە"، بەبێ ئەوەى هیچ زانیارییەکى زیاتر بدات.

 

ناس کورد چەند جارێک پەیوەندى بە پۆلیسى هەولێرەوە کرد، بەڵام وەڵامى پەیوەندییەکانیان نەدایەوە.

 

زیاتر بخوێنەوە: لەدوای تەلەفۆنێک جوانڕۆی باڵەبان ڕۆشت و ئیتر نەگەڕایەوە  

 

هۆگر عەزیز وتەبێژى پۆلیسى هەولێر 22ى حوزەیرانى 2021 بە "ناس کورد"ى ڕاگەیاند، کاتژمێر پێنجى بەرەبەیانى 22ى حوزەیران تەرمى ئەو هونەرمەندە لەگوندى پەلکەڕەش سەر بە ناحیەى دێگەڵە دۆزراوەتەوە کە خنکێنرابوو.

 

جوانڕۆ خێزاندارە و خاوەنى سێ کچ و کوڕێکە، حوزەیرانى 2021 وەک هەر سەردانێکى دیکەى ئاسایی لە سلێمانییەوە بەرەو هەولێر بەڕێکەوت بۆ ئەوەى بچێت بۆ دەوامە فەرمییەکەى لەتیپى جوقى سەربازى سەر بە وەزارەتى پێشمەرگە و بەڵێنی دا دوو ڕۆژى تر بگەڕێتەوە، بەڵام پێش تەوابوونى دەوامەکەى خنکێنرا و تەرمەکەى گەڕێنرایەوە.

 

تەرمى جوانڕۆ بەرەبەیانى سێشەممە 22ى حوزەیران دواى شەوێک لە دیارنەمانى بەدەستبەستراویی لە نزیک گوندی (پەلکەڕەش) کە دەکەوێتە نێوان کەسنەزان و دێگەڵە دۆزرایەوە.

 

دواى دۆزینەوەى تەرمەکە وەزارەتى پێشمەرگە لەراگەیەنراوێکدا لەبارەى رووداوەکەوە رایگەیاند، بەدواداچوون و رێوشوێنی پێویستی لەسەر ئەو تاوانە گرتووەتەبەر و لەئێستادا لەلایەن پۆلیسەوە دۆسیەی لێکۆڵینەوەی بۆ کراوەتەوەو چاوەڕێی دەرئەنجامی لێکۆڵینەوەکانن.