گه‌ڕان

Shadow Shadow
سیاسه‌تی

بەپەلە

لەبارەی دواخستنی قەدەغەکردنی کاری شۆفێری تاکسی لە موچەخۆران بڕیار دەدرێت

2021.07.27 - 13:28
App store icon Play store icon Play store icon
لەبارەی دواخستنی قەدەغەکردنی کاری شۆفێری تاکسی لە موچەخۆران بڕیار دەدرێت

ناس کورد-

وتەبێژی وەزارەتی گواستنەوە و گەیاندنی هەرێم ڕایگەیاند، لە بەرژەوەندی شۆفێرانی تاکسی پێشنیازیان کردووە بۆ درێژکردنەوەی وادەی لێدانی لۆگۆ و لەزگە لە تاکسییەکان تا کۆتایی ساڵ، دەشڵێت، لەم ڕۆژانەدا لیژنەی تایبەت بەو پرسە کۆدەبێتەوە و لەوبارەیەوە بڕیار دەدات.

کەناڵی ناس کورد لە تێلیگرام جۆین بکە   

 

چوار ڕۆژی دیکە و 31ی تەموز دوا وادەیە بۆ لێدانی لەزگە و لۆگۆی تاکسییەکان و لەدوای ئەو وادەیە بەگوێرەی ئەو بڕیارەی دەرچووە کاری شۆفێری لە بەشێکی زۆر لە هێزە ئەمنییەکان و موچەخۆران قەدەغە بکرێت و هەرکەس لۆگۆ و لەزگەی لێ نەدابێت سزا دەدرێت.

 

لەوبارەیەوە دیلان ڕەشاد، وتەبێژی وەزارەتی گواستنەوەی هەرێم (سێشەممە 27ی تەموزی 2021) بە "ناس کورد"ی ڕاگەیاند، "وەک وەزارەتی گواستنەوە پێشنیازمان کردووە وادەکە تاوەکو سەری ساڵ درێژبکرێتەوە، ئەوەش لە بەرژەوەندی شۆفێران بۆ ئەوەی توشی زەرەر نەبنەوە و لەو ماوەیەدا چارەسەری بکەن."

 

وتیشی، "لەم ڕۆژانەدا ئەو لیژنەیەی تایبەتە بەو بڕیارە لە وەزارەتی ناوخۆ و گواستنەوە کۆدەبنەوە و بڕیار لەو بارەیەوە دەدەن کە ئایا بڕیارەکە لەکاتی خۆیدا جێبەجێ بکرێت یاخود وادەکە درێژبکرێتەوە."

 

وتەبێژی وەزارەتی گواستنەوە و گەیاندن ئاماژەی بەوەشکرد، "بۆیە داوامان کردووە کە وادەکە درێژ بکرێتەوە، چونکە ژمارەیەکی زۆر تاکسی هێشتا لۆگۆیان لێ نەدراوە، هەرچەندە ئەوە کەمتەرخەمی شۆفێران خۆیانە، بەڵام ئێمە نامانەوێت کەس توشی زەرەر و زیان بێت و دەمانەوێت هاوکاریان بین."

 

جەختیشیکردەوە، "ئەگەر وادەکە درێژیش بکرێتەوە مانای ئەوە نییە کە ئیتر بڕیارەکە جێبەجێ ناکرێت، بەپێچەوانەوە حکومەت سوورە لەسەر جێبەجێکردنی بڕیارەکە و پاشگەزبوونەوەی نییە."