گه‌ڕان

Shadow Shadow
سیاسه‌تی

گرژییەکانی ناو یەکێتی

دوا پەرەسەندنی كێشەی هاوسەرۆكان: ئاڵۆزی زیاتر و زبربوونی گوتاری ململانێ

2021.07.21 - 20:23
App store icon Play store icon Play store icon
دوا پەرەسەندنی كێشەی هاوسەرۆكان: ئاڵۆزی زیاتر و زبربوونی گوتاری ململانێ

ناس كورد-

دوو ڕۆژ بەسەر گوتاری ئێوارەی جەژنی هاوسەرۆكانی یەكێتیدا گوزەریكردووە، بەڵام تادێت لێكەوتە و كاردانەوەكانی لە هەردوولاوە توندتر دەبن، لە بەرەی بافڵ تاڵەبانیشەوە چەند هێرشێكی پێچەوانە بۆسەر وتەكانی لاهور شێخ جەنگی دەستپێكردووە لە كاتێكدا بڕیار وابوو كێشەكە ڕاڕەوی حیزبی وەرگرێت و هەڵمەتی میدیایی و سكاڵای یاسایی تێ نەكەوێت.

کەناڵی ناس کورد لە تێلیگرام جۆین بکە   

 

پاش ئەوەی لاهوری شێخ جەنگی، هاوسەرۆكی یەكێتی شەوی جەژن جەختی لەوەكردەوە هاوسەرۆكی یەكەمە و بەشێوەیەكی كاتی دەستبەرداری دەسەڵاتەكانی بووە، میدیای نزیك لە ماڵی تاڵەبانی دوێنێ ئێوارە (20 تەموزی 2021) چەند دڵنیاییەكیان بڵاوكردەوە كە چیتر گەڕانەوە بۆ سیستمی هاوسەرۆكی نییە و هەڵوەشاندنەوەشی بەفەرمی لەسەر پشوی جەژن وەستاوە. ئەم میدیایانە لەزاری سەرچاوەیەكەوە جەختیان لەوەش كردەوە "یەكێتی گەیشتوەتە بڕوای ئەوەی بافڵ تاڵەبانی بكاتە سەرۆك"، بەبێ ئەوەی وردەكاری زیاتر لەمبارەیەوە بخەنەڕوو.

 

لە دووەم ڕۆژی پاش پەیامەكەی لاهور شێخ جەنگیدا، میدیاكانی بافڵ تاڵەبانی لە دیواری پەیجێكی لاهور شێخ جەنگییەوە (ژیان) كە لەپاش 8ی تەموز دەستیان كەوتووە، پەیامێكی ڤیدیۆیی توندیان لە دژی ناوبراو بڵاو كردەوە.

 

ئەم پەیامە كە دیسان جەخت لە تۆمەتەكانی قاچاخچێتی و بەكارهێنانی هێزی ئەمنی بۆ مەرامی كەسێتی دەكاتەوە لەلایەن هاوسەرۆكی ڕاگیراوی یەكێتییەوە، سەری كێشا بۆ ئاسۆی شێخ جەنگی براشی كە بەوە تۆمەتبار كراوە "10 هەزار پارچە زەوی بەناوی دژە تیرۆرەوە وەرگرتووە بەبێ ئەوەی پارچەیەكیشیان پێ بدات".

 

هەر لەم میانەیەدا كەمپینی بافڵ تاڵەبانی باس لەوە دەكەن 12 هەزار پێناسی ساختەی دژە تیرۆر بۆ خەڵك كراون تا بۆ مەبەستی تایبەت بەكاریبهێنن لە كاتێكدا ژمارەی كارمەندانی ئەم دەزگایە 2 هەزار كەسە. تا ئێستاش لە بەرەی لاهور شێخ جەنگییەوە جگە لە داوای لێكۆڵینەوە لە تۆمەتەكان لەلایەن مەكتەبی سیاسییەوە و پەیوەستكردنی گرژییەكان بە "پلانگێڕی" و "دەستتێوەردانی توركیا و پارتی" هیچیتر لەسەر ئەو تۆمەتانە نەوتراوە.


میدیای لاهور شێخ جەنگی باس لەوە دەكەن ناوبراو زۆرترین جەماوەری حزبی هەیە (902 دەنگی كۆنگرە)، دەبوو ئەویش سەرۆكی یەكێتی بێت، بە زەبری هێزیش دوورخراوەتەوە لە هاوسەرۆكی، لەم كێشمەكێشەشدا هێزی شێخ جەعفەر بەكارهاتووە كە پێشتر كێشە و گرێ و گۆڵی ئەمنییان لە سلێمانی دروستكردووە.

 

ئەم زبربوونەی گوتاری ململانێكانی هاوسەرۆكانی یەكێتی و بەریەككەوتنە توندە لە كاتێكدایە لە (15 تەمموزی 2021) هەردوولا بە ئامادەبوونی ئەندامانی مەكتەب سیاسی كۆنووسی گواستنەوەی دەسەڵاتەكانیان واژوو كرد و لەسەر ئەوەش ڕێككەوتن لەماوەی داهاتوودا پەیڕەوی ناوخۆی یەكێتی هەموار بكەنەوە بە ئاراستەی سیستمی سەرۆكایەتی. بەگوێرەی ئەو زانیارییانەشی كە دزەی پێكرا لە پاش كۆبوونەوەكە دەبوو هەردوولا پابەندی بێدەنگی بن، بەڵام وا دیارە ڕەوشی ڕووداوەكان بەمجۆرە بەڕێوە ناچێت و تۆمەتەكان ڕۆژ لەدوای ڕۆژ هەڵكشانی زیاتر بەخۆیانەوە دەبینن.