گه‌ڕان

Shadow Shadow
سیاسه‌تی

وردەکاریی

ناس هۆکاری دانەبەزینی نرخی بەنزین لە سلێمانی و دهۆک و هەڵەبجە ئاشکرا دەکات

2021.07.18 - 14:54
App store icon Play store icon Play store icon
ناس هۆکاری دانەبەزینی نرخی بەنزین لە سلێمانی و دهۆک و هەڵەبجە ئاشکرا دەکات

ناس کورد-

دابەزینی بەنزین لە 26 بەنزینخانەی شاری هەولێر و مانەوەی نرخەکەی وەک خۆی لە بەنزینخانەکانی دیکە بووەتە جێی سەرنجی هاووڵاتیان و دوو لایەنی ئاگادار لە بابەتەکەش دەڵێن، هیچ ڕێکارێک بۆ دابەزینی بەنزین لەلایەن حکومەتەوە نەگیراوەتەبەر و ئەو دابەزینە لەو بەنزینخانانە بەهۆی قۆرخکاریی کۆمپانیایەکەوەیە بۆ زیانگەیاندن بە بەنزینخانەکانی دیکە.

کەناڵی ناس کورد لە تێلیگرام جۆین بکە   

 

ماوەی دوو ڕۆژە لە 26 بەنزیخانەی شآری هەولێر نرخی بەنزین نزیکەی 100 دینار دابەزیوە و ئەمڕۆش قائیمقامی شارەکە بەفەرمی ئەو دابەزینەی ڕاگەیاند، بەڵام دابەزینەکە لەو 27 بەنزینخانەیە تێپەڕی نەکردووە.

 

لەوبارەیەوە کەریم عەلی، سەرۆکی لیژنەی وزە و سوتەمەنی ئەنجومەنی پارێزگای سلێمانی (یەکشەممە 18ی تەموزی 2021) بە "ناس کورد"ی ڕاگەیاند، "لەماوەی ڕابردوو لە یاداشتێکدا چەند پێشنیازێکمان دایە هەردوو وەزارەتی دارایی و سامانە سروشتییەکان بەمەبەستی دابەزاندنی نرخی بەنزین، بەڵام تائێستا هیچ یەکێکیان جێبەجێنەکراوە."

 

پێشنیازەکان ئەمانەن:

 

1 – هەڵگرتنی باج و ڕسومات لەسەر هاوردەکردنی بەنزین.

2 – وەرنەگرتنی پارە لەلایەن چەند کۆمپانیایەکەوە لە هاوردەکارانی بەنزین.

3 – دانەوەی دەسەڵاتی پێدانی مۆڵەتی هاوردەکردنی بەنزین بە پارێزگاکان و نەهێشتنی قۆرخکاری.

4 – پشکنین بۆ ئەو بەنزینەی هاوردەکرێت بۆ پاراستنی کوالێتی.

 

کەریم عەلی ئاماژەی بەوەکرد، "هیچ یەکێک لەو خاڵانە جێبەجێنەکراون تاوەکو نرخی بەنزین دابەزێت، واتە پێشتر چۆن بووە ئێستاش بەهەمانشیوەیە."

 

ڕوونیشیکردەوە، "دابەزینی نرخیش لەسەرجەم پارێزگای هەولێر نییە و تەنها لە ژمارەیەک بەنزینخانەی ناو قەزای هەولێرە و هەموو پارێزگاکە یاخود هەموو هەرێمی نەگرتووەتەوە و چارەسەرێکی تەواو نییە و کاتییە."

 

عەلی حەمەساڵح، سەرۆکی لیژنە و وزە لە پەرلەمانی کوردستان لە کۆمێنتێکدا لە تۆڕی کۆمەڵایەتی فەیسبوک دەڵێت، "بەھیچ شێوەیەک بەنزین ھەرزان نەبووە، حکومەت خۆی ملیۆنێک لیتر بەنزینی ھەیە، بە قۆرخکاری بە 620 دەیداتە کۆمپانیای کار و کوردنەفت و سەن ئۆیل، ئەوانیش تێکڕا لە 26 بەنزینخانە دەیدەن بە 660."

 

ئاماژەی بەوەشکردووە، "بۆ ئەوەی سەرجەم بەنزینخانەکانی دیکە دابخرێت بە جوملە دەیدەن بە بەنزینخانەکان بە 775 دینار و ئەوانیش ناچارن بیدەن بە 800 دینار، ئەمە قۆرخکاریەکی مەترسیدارە بۆ بەرژەوەندی سێ کۆمپانیا لەسەر حسابی خەلک."

 

هاوکات کەریم عەلی جەختی لەسەر ئەو قسانەی عەلی حەمەساڵح کردەوە و ڕایگەیاند، "ئەگەر حکومەت حکومەتی هەموو هەرێمی کوردستانە پێویستە نرخی بەنزین لە هەموو پارێزگا و شارەکان هەرزان بکات، نەک تەنها لە چەند گەڕەکێک و لە شارێکدا."

 

باسی لەوەشکرد، "ئەوە دابەزاندنی نرخی بەنزین نییە تا بکرێت بە دەستکەوت و ئەگەر بەوشێوەیە بێت، هەروەک بەنزینە 500 دینارییەکەی شاسوار عەبدولواحید وایە و جیاوازیی نییە."