گه‌ڕان

Shadow Shadow
سیاسه‌تی

وردەکاریى

بارودۆخی یەكێتی: زانیاریی دواساتەكانی ڕێككەوتن و سیناریۆكانی داهاتوو

2021.07.16 - 13:59
App store icon Play store icon Play store icon
بارودۆخی یەكێتی: زانیاریی دواساتەكانی ڕێككەوتن و سیناریۆكانی داهاتوو

ناس کورد-

سێ هۆكار هاندەربوون لەبەرژەوەندی بافڵ تاڵەبانی كۆتایی لە ئێستادا كێشەی هاوسەرۆكان كۆتایی بێت بەبێ ئەوەی سیمای قۆناغی داهاتووی یەكێتی و چۆنییەتی مامەڵەكردن لەگەڵ میراتی لاهور شێخ جەنگی ڕوون بێت و ماوەی هەفتەیەكیش دانراوە بۆ گەڵاڵەكردنی گۆڕانكاریی لە پەیڕەوی یەكێتی و گۆڕینی هاوسەرۆكی.

 

کەناڵی ناس کورد لە تێلیگرام جۆین بکە   

 

سێ هۆكاری یەكلاكەرەوە

بەگوێرەی بەدواداچوونەكانی "ناس كورد" هۆكارەكانی ڕازیبوونی لاهور شێخ جەنگی بە دەستبەرداربوون لە پۆستەكەی لە كۆبوونەوەی مەكتەب سیاسی شەوی ڕابردوو، دەگەڕێتەوە بۆ كۆمەڵێك هۆكاری سەرەكی لەوانەش: لاسەنگبوونی تەرازووی هێز لەنێوان هاوسەرۆكان لەپاش كۆنترۆڵكردنی دەزگاكانی زانیاری و دژە تیرۆر و بارەگا میدیاییەكانی لاهور شێخ جەنگی كەسەرجەم بەرایی و زانیاری و ئەرشیفەكانیان كەوتووەتە دەست بافڵ تاڵەبانی، گوشار و كاریگەریی كارتێكەرەكانی دەرەوەی یەكێتی، لەگەڵ هەڕەشە و ئەگەری گەیاندنی دۆسییەكان بەدادگا بەتایبەت پرسە هەستیارەكانی تۆمەتی سیخوڕیكردن و هەوڵی ژەهرخواردكردن كە لاهور شێخ جەنگی پێنج شەممە (15 تەمموزی 2021)، بەبێ ئاماژەكردن بەهیچیان پێشبینی كرد بیگەیەننە دەركردنی فەرمانی گرتن و سەرباری ڕەتكردنەوەیان ڕایگەیاند "ملم لە موو باریكترە لە ئاست ئەو تۆمەتانەی ئاراستەم دەكرێت".

 

ناوەڕۆكی ڕێككەوتنەكە

 

كادرانی باڵای نزیك لەلاهور شێخ جەنگی ئاماژە بەوە دەكەن لە كۆبوونەوەی دوێنێ شەوی مەكتەبی سیاسیدا دۆخەكە گەڕاوەتەوە باری ئاسایی، هەندێكیشیان باس لەوەدەكەن دەستبەرداربوون لە دەسەڵاتی هاوسەرۆك لەلایەن لاهور شێخ جەنگییەوە تەنها كاروبارە داراییەكان دەگرێتەوە، بەڵام سەرچاوەكانی نزیك لە بافڵ تاڵەبانی ئەوەیان بۆ "ناس كورد" پشتڕاست كردەوە ( 16 تەمموزی 2021) كە دەستبەرداربوون لە هاوسەرۆكایەتی لەلایەن لاهور شێخ جەنگییەوە یەكجاری و تەواوەتییە، جگە لە خۆیشی كشانەوەی براكانی دەگرێتەوە لە واجیهەی كارەكانی یەكێتی بەتایبەت كە هەندێكیان هاوكار و بەشداربوون لە هەنگاوەكانی ئەمدواییەی بۆ كۆنترۆڵكردنی حیزب.

 

هەر بەگوێرەی زانیارییەكانی "ناس" بڕیارە لاهور شێخ جەنگی ئەم ماوەیەی دوایی لە دەركەوتن و پەیام و هەوڵی جوڵاندنی بارودۆخی ناو یەكێتی دوور بكەوێتەوە، بەرامبەر ئەمەش ماڵی تاڵەبانی لە ئاشكراكردنی هەر زانیارییەك و هەوڵی تۆماركردنی سكاڵا و هەڵمەتی دژی ئامۆزاكانیان لەمیدیا دەوەستن. هاوئاستی ئەمەش لەماوەی یەک هەفتەدا لیژنەیەک دروست دەکرێت بۆ گۆڕانکاریكردن لە پەیڕەوی ناوخۆی یەکێتی نیشتیمانی کوردستان و پەسەندكردنی سیستەمی یەك سەرۆکایەتی و كۆتاییهێنان بە هاوسەرۆكی لەناو سەركردایەتی.

 

سیناریۆكانی پەیوەندی لەگەڵ پارتی

 

لەپاش باڵادەستبوونی بافڵ تاڵەبانی لەناو یەكێتی، پرسیاری گەورە لەبارەی چۆنییەتی بەرێوەبردنی ئەم حیزبەیە، پاش ئەم دابەشبوونە قووڵەی دوایی كە گەیشتە ئاستی بنەماڵەی خاوەن دەسەڵات، لەگەڵ سیناریۆكانی چۆنییەتی مامەڵەكردن لەگەڵ بنكەی جەماوەری لاهور شێخ جەنگی و شێوازەكانی ڕێكخستنەوەی پەیوەندییەكان لەگەڵ پارتی دیموكراتی كوردستان كە ڕكابەر و لەهەمان كاتدا شەریكی یەكێتییە لە حوكمڕانی.

 

ناس كورد زانیویەتی هەندێ لە بەرپرسانی پارتی لەناو خۆیان باسیان لەوەكردووە ململانێكانی یەكێتی چەندین مانگیتر دەخایەنن و بارودۆخی ئەم حیزبە لەماوەی ساڵێكیتریشدا ئاسایی نابێتەوە، هەندێكیتر باسیان لەوەكردووە، ئەگەری زۆری هەیە بافڵ تاڵەبانی بەخۆی ببێتە نوێنەری ئەو بنكەو جەماوەرە ناڕازییە لە پارتی كە لەناو یەكێتیدا هەیە و قۆناغی نوێ ئەو رۆڵی لاهور شێخ جەنگی ببینێت، هەندێكیتر ئەمەیان بەدوور زانیوە بەهۆی زۆری بەرژەوەندی و خاڵەكانی نزیكی و لێكگەیشتنی ماڵی تاڵەبانی لەگەڵ پارتی و پێگەی قوباد تاڵەبانی لەكابینەی نۆیەمی مەسرور بارزانی، لەبری ئەمەش هەندێك لەبەرپرسانی پارتی باوەڕیان وایە ژمارەیەك بەرپرسیتری یەكێتی بگەڕێنەوەسەر دۆخی بەرهەڵستیكردنی پارتی كە ڕەوتێكی دێرینە لە ناو یەكێتی و لە زۆنی سلێمانی.

 

بنكەی جەماوەریی لاهور شێخ جەنگی

 

ئەو چاوێرە سیاسی و كادرە باڵایانەی یەكێتی كە لەبارەی كێشەكانی ئەم حیزبەوە قسەیان بۆ "ناس كورد" كرد، باس لەوەدەكەن تەحەدای گەورەی یەكێتی چۆنییەتی نۆژەنكردنەوەی داڕمانەكان و چۆنییەتی مامەڵەكردنە لەگەڵ میرات و بنكەی جەماوەریی لاهور شێخ جەنگی كە لەسەر گوتاری توند و بەرەنگاربوونەوەی پارتی و دروشمی شۆڕشگێری ڕاهێنراون، لە ئێستاشدا باوەڕیان بەوەكردووە ئەوەی بەرامبەر سەركردە دڵخوازەكەیان كراوە پلانی پارتی و توركیایە ئەمەش لەدوا دەركەوتنی لاهور شێخ جەنگیدا لەگەڵ هەندێك لە خێزانی شەهیدان ( 15 تەمموزی 2021) بەتەواوی زەق كرایەوە.

 

لەو ساڵانەی لاهور شێخ جەنگی بەرپرسی یەكەمی دەزگا ئەمنییە هەستیارەكانی یەكێتی بووە (زانیاری و دژە تیرۆر)، لەو ماوەیەشی هاوسەرۆكی یەكێتی بووە، تۆڕێك كارتی گوشار و پاڵپشتی و بنكەی جەماوەری و چەندین باڵی میدیایی دروستكردووە، ئەم جەماوەرەش لەسەر هاوسۆزی رۆژئاوای كوردستان و بەرەنگاربوونەوەی توركیا و لەهەمان كاتدا بەرەنگاربوونەوەی پارتی پەرەیان پێدراوە و ئاراستەكراون، لەپاش دەستبەرداربوونی سەرۆكە دڵخوازەكەشیان لەدەسەڵاتەكانی لە چەند كاتژمێری ڕابردوودا بەهەمان نەفەس لە سۆشیال میدیا بەردەوامن  لە پاڵپشتیكردن لە لاهور شێخ جەنگی و ڕەخنەگرتن لە نەیارەكانی، چۆنییەتی مامەڵەكردن لەگەڵ ئەم بنكەیەش تەحەدای گەورەی بەردەم بافڵ تاڵەبانی دەبن بەتایبەت ئەگەر هەڵبژاردنی پێشوەختەی عێراق ئەنجام بدرێت و یەكێتی پێویستی بەهەڵمەت و دەنگ كۆكردنەوە هەبێت بەرامبەر لیستی پارتی.

 

بێتوانایی سەركردایەتی ئێستا

 

لەپاش ڕوونبوونەوەی سەرەنجامی بەریەككەوتنی هاوسەرۆكان، لە ئێستادا پێداچوونەوە و ڕەخنە لەناو كادرانی ناوەڕاستدا خەریكە دەگەنە سەر ڕووپەڕەكانی سۆشیال میدیا بەتایبەت پاش ئەوەی ماوەی هەفتەیەكی تەواو سەركرداییەتییەكی قەرەباڵغی 124 ئەندامی و مەكتەب سیاسی و ئەنجومەنی باڵای بەرژەوەندییەكانی یەكێتی، لەدەرەوەی بازنەی كێشەكان بوون و هیچ جموجوڵی كاریگەرییان نەبوو بۆ ڕێگەگرتن لە ئەگەری داڕووخانی یەكێتی. لە و كۆبوونەوەشی كە دوێنێ ئێوارە لە مەكتەبی سیاسی كراوە لەدەرەوەی مەكتەب سیاسی هەندێك كەسایەتی بەشداربوون وەك شاڵاو كۆسرەت ڕەسوڵ و ئاراس شێخ جەنگی و قوباد تاڵەبانی كە ئەمەش ئاماژەیە بۆ ئەوەی پەیكەرەی ئێستای یەكێتی خاوەن بریار نییە و هێشتا جەمسەرە جیاجیا پشت پەردەكانی هێز لەناو یەكێتی ڕۆڵی یەكلاكەرەوە دەبینن، چۆنییەتی بچووككردنەوەی ئەم سەركردایەتییە و هەمواركردنی پەیڕەوی ناوخۆ دۆزینەوەی پەیكەرێكیتری گونجاو بۆ یەكێتی رەنگە كێشەكان بباتەوە بۆ بارودۆخی پێش كۆنگرەی چوارەم كە كۆتاییەكانی 2019 گرێدرا و ئێستا مقۆمقۆی ئەوە دروست بووە كە ناسروشتی بووە و ئەنجامەكەی خراپ كەوتووە لەسەر یەكێتی.