گه‌ڕان

Shadow Shadow
سیاسه‌تی

بەپەلە

بەرپرسێکی باڵای حکومەت لەبارەی لابردنی لێبڕینی موچە زانیاریی نوێ ئاشکرا دەکات

2021.07.15 - 21:49
App store icon Play store icon Play store icon
بەرپرسێکی باڵای حکومەت لەبارەی لابردنی لێبڕینی موچە زانیاریی نوێ ئاشکرا دەکات

ناس کورد-

ڕێباز حەملان، یاریدەدەری سەرۆکی حکومەتی هەرێمی کوردستان ڕایگەیاند، 30 ڕۆژ جارێک و لەکاتی خۆیدا موچە دابەش دەکرێت، دەشڵێت، وەزارەتی دارایی سەرپشکە بەگوێرەی ئەو داهاتەی بەردەستی لێبڕینی موچە دیاری بکات، لەئێستاشدا بەردەوام لە کۆبوونەوەدان بۆ ئەوەی چارەسەری کێشەی موچە بکرێت.

کەناڵی ناس کورد لە تێلیگرام جۆین بکە   

 

ڕێباز حەملان، یاریدەدەری سەرۆکی حکومەتی هەرێمی کوردستان بۆ کاروباری دارایی و ئابوری (پێنجشەممە 15ی تەموزی 2021) بە میدیای فەرمیی پارتی ڕاگەیاند، "پڕۆژەیاسای بودجەی 2021ی هەرێمی کوردستان دەمێکە ئامادەکراوە، تەنها کێشەمان ئەوەبوو کە نەماندەزانی ئەو بڕە پارەیەی بەغدا چۆن و بەشێوازێک بۆ هەرێم دەنێردرێت."

 

وتیشی، "لەدوای جەژن پڕۆژەی بودجە لە ئەنجومەنی وەزیران تاووتوێ دەکرێت و لەدوای پەسەندکردن دەنێردرێتە پەرلەمانی کوردستان."

 

سەبارەت بە دابەشکردنی موچەش، ڕێباز حەملان ئاماژەی بەوەکرد، "30 ڕۆژ جارێک و لە وادەی خۆیدا موچە دابەش دەکرێت، وەزارەتی داراییش سەرپشکە بەگوێرەی ئەو داهاتەی بەردەستی لێبڕینی موچە دیاری بکات، لەئێستاشدا بەردەوام لە کۆبوونەوەدان بۆ ئەوەی چارەسەری کێشەی موچە بکرێت، ئەولەویەتی کاری حکومەتیش دابەشکردنی موچەیە."

 

سەبارەت بە لابردنی لیبڕینی موچە لەم مانگەدا، یاریدەدەری سەرۆکی حکومەتی هەرێم ڕایگەیاند، "ئەوە خوگونجاندنە، هەرکات ئەو بڕە پارەیەی کە پێویستە بۆ کۆی موچەی موچەخۆران لە بەردەستدا بوو ئەوا بەدڵنیاییەوە لێبڕین نامێنێت."

 

ڕوونیشیکردەوە، "ئەوە وەزارەتی دارایی دەزانێت کە ئەو 200 ملیارە بەشی ئەوە دەکات لێبڕین نەمێنێت یاخود نا، لەئێستادا تاووتوێی ئەوە دەکەن، چونکە کێشەیەک هەیە ئەویش ئەوەیە کە 20 ملیار لەو پارەیە بانکی بازرگانیی عێراق داوای دەکات، چونکە مەرج کراوە لەسەر حکومەتی هەرێمی کوردستان کە مانگانە ئەو بڕە قەرزە بداتەوە."

 

سەبارەت بە بەکارهێنانی 200 ملیارەکە بۆ خەرجیی دیکەی بەدەر لە موچە، حەملان باسی لەوەکرد، "هەر بڕە پارەیەک لە بەغداوە بۆ حکومەتی هەریمی کوردستان بۆ موچەی موچەخۆرانە، بەڵام لە مانگەکانی ڕابردوودا حکومەتی هەرێم خۆی موچەی دابەشکردووە و هەندێک جار بەهۆی کەمی پارەوە قەرزی کردووە، لەگەڵ ئەوەشدا هەر بڕە پارەیەک بۆ دابەشکردنی موچەیە."