گه‌ڕان

Shadow Shadow
سیاسه‌تی

زانیاریی زیاتر

ناس زانیاریی دەربارەی کۆبوونەوەی هاوسەرۆکان و سەرکردایەتیی یەکێتی ئاشکرا دەکات

2021.07.13 - 17:03
App store icon Play store icon Play store icon
ناس زانیاریی دەربارەی کۆبوونەوەی هاوسەرۆکان و سەرکردایەتیی یەکێتی ئاشکرا دەکات

ناس کورد-

سەرچاوەیەک لە ئەنجومەنی سەرکردایەتیی یەکێتیی نیشتیمانیی کوردستان ڕایگەیاند، کۆبوونەوەکانی ئەنجومەنەکە وەستاوە و هیچ بەرنامەیەک بۆ کۆبوونەوە لە ئارادا نییە، ئەندامێکی ئەنجومەنەش دەڵێت، کۆبوونەوەی هاوسەرۆکانی یەکێتی بەردەوام دەبێت.

کەناڵی ناس کورد لە تێلیگرام جۆین بکە   

 

پۆڵا سیروان تاڵەبانی، ئەندامی ئەنجومەنی سەرکردایەتیی یەکێتیی نیشتیمانیی کوردستان (سێشەممە 13ی تەموزی 2021) بە "ناس کورد"ی ڕاگەیاند، " کۆبوونەوەى هەردوو هاوسەرۆکانى یەکێتى شەوى ڕابردوو ئیجابى بووە، کۆبوونەوەکانیشیان بەردەوام دەبێت و لە داهاتوودا دەرئەنجامەکەی دڵى لایەنگرانى یەکێتى خۆش دەکات." 

 

لەدوای دروستبوونی کێشەکانی نێوان هەردوو هاوسەرۆکانی یەکێتی، تائێستا هیچ کۆبوونەوەیەکی مەکتەبی سیاسی و ئەنجومەنی سەرکردایەتیی یەکێتی کۆنەبوونەتەوە و هیچ هەڵوێستێکی فەرمییان لەبارەی کێشەکەوە نەبووە. 

 

سەرچاوەیەکی ئاگادار لە ئەنجومەنی سەرکردایەتیی یەکێتی بە ناس کوردی وت، "تائێستا هیچ بەرنامەیەک لە ئارادا نیە بۆ کۆبوونەوە و پێناچێت بەمنزیکانە کۆبوونەوە ئەنجام بدرێت." 

 

بەپێچەوانەی یەكەم كۆبوونەوەی هاوسەرۆكان (11 تەمموزی 2021) كە پەیامێكی توندی لاهور شێخ جەنگی بەدواداهات ڕوبەڕوو بە پارتی و مەلا بەختیار و توركیا، كۆبوونەوەی شەوی ڕابردووی نێوان هەردوو هاوسەرۆكی یەكێتی بەبێ هیچ ئەنجامێكی فەرمی و نیمچە فەرمی كۆتاییهات. ژمارەیەك كادری باڵای یەكێتی لە ئاستی جیاواز باس لەبەرەوپێشچوون دەكەن لەنێوان هەردوولا، بەڵام لە شەشەم ڕۆژی تەقینەوەی كێشەكانی نێوان هەردوو هاوسەرۆك پەیام گۆڕینەوە لەنێوان هەردوولا لەپشت كۆبوونەوەكانیشەوە هەر بەردەوامە و ئاماژەیەك بۆ كۆتاییهاتنی لەبەردەستدا نییە.  

  

لاهور شێخ جەنگی كە پێیوایە جەماوەرێكی بەرفراوانی بنكەی یەكێتی لەگەڵدایە و خاوەن پشتیوانی چەند پەیج و ئەكاونتێكی سۆشیال میدیایە كە ماوەی ڕابردوو دروستی كردوون، ئێوارەی دوێنێ دوو شەممە (12 تەمموزی 2021) بەسەردانی شەقامی مەولەوی بۆ دووەمجار لەپاش دیداری عەبادی لەماوەی كێشەكاندا دەركەوت. بەر لەم دەركەوتنەش لەپەیامە راستەوخۆ و ناڕاستەوخۆكانیدا زیاتر جەختی لە پشت بەستن بەجەماوەری یەكێتی كردووەتەوە بۆ یەكلاییكردنەوەی كێشەكان لەگەڵ پەیوەستكردنی پێشهاتەكانی ئەمدواییە بە پیلانگێڕی پارتی و توركیا لەكاتێكدا پارتی بەفەرمی ڕایگەیاندووە ئەوەی ڕوودەدات كاروبارێكی ناوخۆیی ناو یەكێتییە.  

 

جەمسەری دووەمی كێشەكە كە بافڵ تاڵەبانییە، هیچ پەیام و لێدوانێكی ڕاستەوخۆی لەسەر كێشەكانی ئەم دواییە نییە، بەڵام بەفەیسبوكەكەی و بەیاننامەی پاش دیداری حەیدەر عەبادی (12 تەمموزی 2021)، سەقفی داواكارییەكانی ئاشكراكرد كە وەرگرتنی سەرۆكایەتی یەكێتییە و پرسی گۆڕانكارییەكانی دەزگای زانیاری و پاراستنی تێپەڕاند كە ڕۆژی (8 تەمموزی 2021) ئاگری بەردا لە خەرمانی كێشە كەڵەكەبووەكانی پێشووتری لەگەڵ لاهوری شێخ جەنگی.  

  

لەپاش مسۆگەركردنی پشتیوانی كۆسرەت ڕەسوڵ و لیوا سەربازییەكەشی لەناو هێزەكانی حەفتا، ئەمڕۆ (13 تەمموزی 2021) بافڵ تاڵەبانی پشتیوانییەكیتری لە جەمسەرێكی یەكێتی لێكرا كە شێخ جەعفەر شێخ مستەفای جێگری سەرۆكی هەرێم و خاوەن قسەی یەكەمە بەسەر هێزی ئاڵتونی یەكەكانی حەفتا، ئەمە لەكاتێكدا پێشتر لە رێگەی قوباد تاڵەبانییەوە فەرمانی هەرێمی لە نێچیرڤان بارزانی سەرۆكی هەرێمەوە بۆ بەرپرسە نوێیەكانی زانیاری و دژە تیرۆر مسۆگەر كردبوو.  

 

سۆشیال میدیای لاهوری شێخ جەنگی بەئاشكرا یان راستەوخۆ هیچ ئاماژەیەك بە بافڵ تاڵەبانی یان قوباد تاڵەبانی ناكەن لەم كێشانەی دواییدا، لەكاتێكدا پێشتر بەئاشكرا ڕەخنە و پلاریان لەهەردووكیان دەگرت بەبێ ئەوەی هێشتا كێشەكانی نێوانیشیان تەقیبێتەوە، لە بەرامبەریشدا میدیا و سۆشیال میدیا نزیكەكانی بافڵ جگە لەجەختكردنەوە لە شەرعیەتی هەنگاوە نوێیەكان خۆیان لە ناوبردنی ڕاستەوخۆی لاهور شێخ جەنگی دەپارێزن.  

  

كێشەی هاوسەرۆكان نزیك دەبێتەوە لە هەفتەیەك، بەڵام تائێستا جگە لەپەیام گۆڕینەوەی میدیایی نەبراوەتە هیچ ئۆرگانێكی حیزب كە سەركردایەتی و مەكتەب سیاسی و ئەنجومەنی باڵای بەرژەوەندییەكانە، ئەو بێدەنگییەشی لەپاش كۆبوونەوەكان هەیە، بەلای هەندێكەوە ئەوەی لێ دەخوێنرێتەوە چارەسەری دەمودەست لە ئاسۆدا نییە و كاتی پێ دەچێت لە كاتێكدا ئەنجامدانی هەڵبژاردنی پێشوەختەی عێراق دوای سێ مانگیترە، ئەم ئەگەرەش ناوەندەكانی ئەم حیزبە و بزوتنەوەی گۆڕانی هاوپەیمانی یەكێتیشی نیگەران كردووە.