گه‌ڕان

Shadow Shadow
سیاسه‌تی

زانیاریی زیاتر

شێوەزاری هەورامی چۆن زیاد دەکرێت بۆ مەنهەجی خوێندن؟

2021.07.03 - 11:59
App store icon Play store icon Play store icon
شێوەزاری هەورامی چۆن زیاد دەکرێت بۆ مەنهەجی خوێندن؟

ناس کورد-

داواکاری وەزیری ئێستای ڕۆشنبیری هەرێم بۆ کردنى شێوەزاری هەورامی بۆ ناو پەیڕەوى خوێندن مشتومڕێکی تری دروستکردووە و شارەزایەک چۆنیەتی زیادکردنی ئاشکرا دەکات و وەزیرى ئێستای پەروەردەش دەڵێت، تاوتوێی دەکەن.

کەناڵی ناس کورد لە تێلیگرام جۆین بکە   

 

ڕۆژی 30ی حوزەیرانی 2021، حەمەی حەمە سەعید، وەزیری ڕۆشنبیری هەرێم کە خۆی هەورامییە لە نوسراوێكدا داوای لە ئالان حەمە سەعیدی وەزیری پەروەردە کرد زمانی هەورامی بخاتە ناو پرۆگرامی خوێندنەوە و لە سنوری پارێزگای هەڵەبجە لە قۆناغی یەکەمی بنەڕەتی بخوێنرێت.

 

لە بارەى چۆنیەتی زیادکردنی شێوەزارێک بۆ پەیڕەوی خوێند، دڵشاد عەبدولڕەحمان، شارەزای بواری پەروەردە و وەزیرى پێشووترى پەروەردەى حکومەتى هەرێم تایبەت بە "ناس کورد "ى (3ى تەموزى 2021) ڕاگەیاند، "ئەوە تەنها بە نوسراوێک یاخود داواکاریەک ناکرێت دەبێت ئەنجومەنى وەزارەتى پەروەردە وەکو وانەیەکى زیادە پێشنیار بکرێت".

 

وتیشى، "من داواکارییەکەم خوێندووەتەوە بەڵام زۆر باش لێى تێنەگەیشتم، ئەگەر مەبەستى وانەیەک بە زمانى هەورامى بخوێنرێت ئەوە بەکارێکى سروشتى دەزانم بەڵام بۆ بڕیارلێدانەکە لەسەر ئەو پرسە دەبێت وەزارەتى پەروەردە خۆى تاوتوێى بکات".

 

ڕوونیشیکردەوە، دواتر بەپێى ئەو دەسەڵاتەى کە وەزارەتى پەروەردە دەتوانێت یەکلایى بکاتەوە و ئەوەیان پێویستى بە پەرلەمان نییە، وەزارەت خۆى دەتوانێت بڕیارى لێ بدات.

 

لە درێژەى وتەکانییشدا وەزیرى پێشووترى پەروەردە کە لەسەردەمى ئەودا لە کۆنگرەیەکى زانستیدا پەیڕەوى قوتابخانەکان گۆڕدران بۆ سیستمى ناوەندێتى قوتابى ئەوەى پێدەوترێت پەیڕەوى سویدى، جەختى لەسەر ئەوە کردووەتەوە شێوە زارى هەورامى زیندووە و بایەخى زۆرى هەیە و ژمارەیەکى زۆرى خەڵکیش پێی دەدەوێت.

 

لە وەڵامى نوسراوەکەشدا ،ئەمڕۆ شەممە (3ی تەموزی 2021) لە کۆنگرەیەکى ڕۆژنامەوانیدا، ئالان حەمە سەعید، وەزیرى پەروەردەى هەرێم ڕایگەیاند، "هێشتا نوسراوەکەم بەدەست نەگەیشتووە، ئەگەر بەفەرمى بەدەستمان گەیشت ئەوا تاوتوێ دەکەین و دواتر وەڵامى خۆمان دەبێت".

May be an image of textMay be an image of text