گه‌ڕان

Shadow Shadow
سیاسه‌تی

وردەکاریی

هێرشێک لە گۆڕانەوە بۆ سەرۆکى پەرلەمان: لێدانە لە شکۆى پەرلەمان

2021.06.25 - 17:53
App store icon Play store icon Play store icon
هێرشێک لە گۆڕانەوە بۆ سەرۆکى پەرلەمان: لێدانە لە شکۆى پەرلەمان

ناس کورد-

ڕێکخەرى ژورى یاسایى بزوتنەوەى گۆڕان بڕیارەکەى سەرۆکى پەرلەمانى کوردستان سەبارەت ڕێگریکردنى لە پەرلەمانتاران بۆ سەردانى پڕۆژەکانى نیشتەجێبوون و پڕۆژە خزمەتگوزارییەکان بە بڕیارێکى "پێچەوانەى یاسا و پەیڕەوى ناوخۆى پەرلەمانى کوردستان وەسف دەکات" و دەڵێت، "بریارەکە دژى فەلسەفەى کارى چاودێرى و پەرلەمانییە و لێدانە لە شکۆى پەرلەمان."

کەناڵی ناس کورد لە تێلیگرام جۆین بکە   

 

‎چۆمان محەمەد عەلى، ئەندامی جڤاتی نیشتمانی و ڕێكخەری ژوری یاسایی بزوتنەوەى گۆڕان بە میدیای حزبەکەى (25ی حوزەیرانی 2021) ڕایگەیاند، ئەو نوسراوەی سەرۆکی پەرلەمانى کوردستان كه ئاڕاستەى سەرۆکایەتى ئەنجومەنى وەزیران کراوە پێچەوانەی یاسا و پەیرەوی ناوخۆی پەرلەمان و كاری چاودێری پەرلەمانتارانە، هەروەها دژی بنەما و فەلسەفەی چاودێری و كاری پەرلەمانییە لە هەموو پەرلەمانی وڵاتان، چونکە یەكێك لە ئەركە بنەڕەتیەكانی پەرلەمانتار چاودێری و بە دواداچونە لە دەزگا حکومی و ناحکومیەکان لە وڵاتدا.

 

ڕاشیگەیاند، ئەم بڕیارە گەر پاساوەكەی داواكردنی پارەبێت لەلایەن چەند پەرلەمانتارێكەوە، گشتاندنی وێنەكە بێ متمانەیە بەرامبەر هەموو پەرلەمانتاران و ترسە بۆ هەمویان، كە ئەمەش لەشوێنی خۆیدا نییە، چونکە گەر هەر پەرلەمانتارێك كارێكی لەم چەشنەی كردوە پێویستە بە شەخصی لیكۆڵینەوە لەگەڵ بكرێت و ڕوبەروی یاسا بكرێتەوە و چاوپۆشی لە کەس نەكرێت، پەراوی لێكۆلینەوە و لیژنەی پەرلەمانیان لەسەر پێكبهێنرێت.

 

سەبارەت بە رونکردنەوەى سەرۆکى پەرلەمان لەبارەى ئەو بڕیارە، رێکخەرى ژورى یاسایى بزوتنەوەى گۆڕان رایگەیاندوە، سەرۆكی پەرلەمان رونکردنەوەی داوە گوایە پشتیان بەمادەی (40) و (41) ی پەیرەو بەستوە، بەڵام بەسەرنجدان لەهەردوو مادەی ئاماژە بۆكراو، هیچ مافێك نەدراوە بە سەرۆكی پەرلەمان رێگری پەرلەمانتاران بكات.

 

بەپێی بڕیارەکەى سەرۆکایەتى پەرلەمان کە ڕێواز فایەق، سەرۆکی پەرلەمانی کوردستان (22ی حوزەیرانی 2021) ئاڕاستەی سەرۆکایەتی دیوانی ئەنجومەنی وەزیرانی کردووە، هیچ پەرلەمانتارێک لەڕێگەی کەسییەوە ناتوانێت سەردانی پڕۆژەکانی نیشتەجێبوون و پڕۆژە خزمەتگوزارییە گشتییەکانی بواری بەڵێندەرایەتی و وەبەرهێنان بکات"

 

ئاماژەی بەوەشکردووە، "دەبێت بە بڕیاری لیژنەکان ئەو بەدواداچوونە بکات یان بە نوسراوی فەرمی سەرۆکایەتی پەرلەمانی کوردستان."

 

پێشەوا هەورامانى، وتەبێژى فراکسیۆنى پارتى (24ى حوزەیرانى 2021) لە راگەیەندراوێکدا داواى لە سه‌رۆكی په‌رله‌مان کرد لیژنه‌یه‌كی لێكۆڵینه‌وه‌ پێكبهێنێت و "ئەم بابەتە دوا نەخات و هەرکەسێک پلە و پێگەی خۆی بۆ بەرژەوەندی کەسی بەکارهێناوە ناوی بهێنرێت و کە ئەنجام دەستکەوت ڕێوشوێنی یاسایی لەبەرانبەرییان بگیرێتە بەرو هەستی کەس بە ناحەق بریندار نەکرێت".

 

هەر لە کاردانەوەى ئەو بڕیارەدا، فراکسیۆنى یەکێتى لە پەرلەمانى کوردستان یاداشتێکى توندى ئاڕاستەى سەرۆکایەتى پەرلەمان کرد و داواى هەڵوەشاندنەوەى بڕیارێک دەکات کەبە واژۆى رێواز فایەق ئاڕاستەى حکومەت کراوە بۆ "سنوردارکردنى" بەدواداچوونى پەرلەمانتاران.

 

فراکسیۆنى یەکێتى ئەمڕۆ هەینى لە یاداشتێکدا بۆ سەرۆکایەتى پەرلەمان کە دەست "ناس کورد" کەوتووە جەختیکردووەتەوە بریارەکە "ھیچ پاڵپشتیەكی پەیڕەوی ناوخۆی پەرلەمانی كوردستانی نیە، لە ھەمانکاتدا بە لێدان و کەمکردنەوە لە شکۆ و ئەرک و بەرپرسیارێتیی پیشەیی کاری پەرلەمانیی دەزانین".

 

دەشڵێت "ئەم نووسراوە لەژێر ھەر پاساو و ناوێک دا کرابێت، تەواو ناپەیرەویی و نایاساییە، بۆیە داواکارین ھەرچی زووە نوسراوێک ئاراستەی ئەنجومەنی وەزیران بکەن و تێیدا ئەو نووسراوە هەڵبوەشێننەوە و کاری پێنەکەن".

 

"ئەگەر ھەر ھۆکار و پاساوێکتان ھەیە بۆ دەرکردنی ئەم نوسراوە، ئەو دەکرێت لەرێگای پێکھێنانی لیژنەیەکی پەرلەمانیەوە، لێکۆڵینەوەو بەدواداچونی وردبکرێت و لە چوارچێوەی پەیرەوی ناوخۆی پەرلەمان دا، سزای هەر ئەندامێك بدرێت، ئەگەر پێگەو ناوی پەرلەمان و پەرلەمانتاری بەخراپ بەکارھێنابێت".