گه‌ڕان

Shadow Shadow
سیاسه‌تی

نرخی دۆلار

لێدوانی نوێی دارایی پەرلەمان لەبارەى دابەزینی نرخی دۆلار

2021.06.25 - 16:52
App store icon Play store icon Play store icon
لێدوانی نوێی دارایی پەرلەمان لەبارەى دابەزینی نرخی دۆلار

ناس کورد-

ئەندامێکی لیژنەی دارایی پەرلەمانی عێراق ڕایگەیاند، دابەزینی نرخی دۆلار بەرامبەر دینار مانای گەڕانەوەى نییە بۆ نرخەکەى پێشووی.

کەناڵی ناس کورد لە تێلیگرام جۆین بکە   

 

جەمال کۆچەر بە لێدوانێکی ڕۆژنامەوانیدا (25ی حوزەیرانی 2021) ڕایگەیاند، هەفتەی ڕابردوو لیژنەی دارایی میوانداری مستەفا غالب، پارێزگاری بانکی ناوەندیی عێراق کرد و گفتوگۆ کرا لەبارەى ئەو هەنگاوانەى کە بانکەکە بەڵێنی دا بیگرێتەبەر بە مەبەستی کەمکردنەوەى کاریگەرییە نەرێنییەکانی گۆڕینی نرخی دراو لەسەر ژیانی هاوڵاتیان و دۆخی ئابوری."

 

وتیشی، "دابەزینی نرخی دۆلار بەرامبەر دینار کە لەم چەند ڕۆژەی ڕابردوودا ڕوویدا و هاوکات بەرزبوونەوەى نرخی نەوت مانای ئەوە نییە نرخی دۆلار دەگەڕێتەوە نرخەکەى پێشووی کە 1800 دینار بوو بۆ هەر دۆلارێک."

 

ڕاشیگەیاند، "سەرجەم ئەو گفتوگۆ و کۆبوونەوانەى ئەمدواییە هیچ سودیان نابێت بۆ گەڕاندنەوەى نرخی دۆلار مەگەر بە بڕیارێکی تایبەتی حکومەت و وەزارەتی دارایی وبانکی ناوەندی نەبێت."

 

لەلایەکی ترەوە، ڕاوێژکارى سەرۆک وەزیرانى عێراق بۆ کاروبارى ئابوریى دەڵێت، باشبوونى نرخى دینار پەیوەستە بە چەند مەرجێکەوە و پێویستە بوونیان هەبێت و جێبەجێ بکرێن.

 

مەزهەر محەمەد ساڵح، ڕاوێژکارى ئابوریى سەرۆک وەزیرانى عێراق (25ى حوزەیرانى 2021) بە ئاژانسى هەواڵى فەرمى عێراقییەى وتووە، باشبوونى نرخى دینارى عێراقى پەیوەست بە تواناى ئابوریى بۆ گەشەکردن، ئەویش ئەگەرى گەشەیەکى گەورە بکات.

 

ڕونیشیکردووەتەوە، بەپێى پێشبینییەکان لەئێستادا گەشەى ئابوریى 2.5%ە، ئەوەش بەپێى گەشەى ڕاستەقینەى دانیشتووانە، ئەو گەشەیەش پێویستى بە گەشەپێدانێکى دروست و کەمکردنەوەى بێکارى و بەرزبوونەوەى هەلى کار و گەشەسەندنى پرۆژە وەبەرهێنانەکانە، کە ئەوەش دەبێتە هۆى بەدەستهێنانى داهات بۆ پەرەبووکردنەوەى نەوت.

 

مەزهەر محەمەد ساڵح جەختی لەوەشکردووەتەوە، گەشەى ئابورى بەردەوامى دەدات بە داهاتەکان و هێزى ئابوریى، ئەوەش پەیوەستە بە دوو بابەتى گرنگەوە، یەکەمیان سیاسەتى نەختینەیە کە سەقامگیرى نرخى دراو دەپارێزێت و گەشەیەکى جێگیر و ماوە درێژ دروست دەکات، دووەمیش پشتگیرى پرۆژە وەبەرهێنانەکان و بەدیهێنانى گەشەسەندنە، چونکە بەبێ گەشەسەندن بارودۆخەکە خراپ دەبێت.

 

سەبارەت بە ڕێژەى زیادبوونى هەڵاوسان ڕاوێژکارەکەى سەرۆک وەزیران باسى لەوەکردووە، دوو جۆر کاڵا هەیە، یەکیان ئەوەیە کە لە بازرگانیدا بەکاردەهێندرێت و زۆرینەى هاوردە دەکرێت و پەیوەندى بە نرخى دراوەوە هەیە، جۆرى دووەمیش ئەوەیە کە ناتوانرێت بازرگانى پێوە بکرێت و ناوخۆییە وەک خزمەتگوزارى و چەندین بابەتى تر.

 

وتوشیەتى، ئەگەر ئەم دوو جۆرە کاڵایە یەکبخەین دەبینین کە هەڵاوسان زیاتر نییە لە 6%، بۆیە هەڵاوسانێکى قبوڵکراو و کۆنترۆڵ کراوە لەچاو هەڵاوسانى نرخى دینارى عێراقى.