گه‌ڕان

Shadow Shadow
سیاسه‌تی

زانیاریی زیاتر

سەرۆکە نوێیەکەی ئێران بە کوشتنی سەدان کەس تۆمەتبار دەکرێت

2021.06.19 - 22:58
App store icon Play store icon Play store icon
سەرۆکە نوێیەکەی ئێران بە کوشتنی سەدان کەس تۆمەتبار دەکرێت

ناس کورد-

ڕێکخراوی لێبوردنی نێودەوڵەتی، سەرکۆنەی هەڵبژاردنی  ئیبراهیم رەئیسی بۆ پۆستی سەرۆک کۆماری ئێران دەکات و ڕایگەیاند، لەبری ئەوەی پەلکێش بکرێت بۆ لێپێچینەوە لەسەر ئەو تاوانانەی دژ بەمرۆڤایەتی ئەنجامیداوە، خەڵاتکراوە و بووە بەسەرۆکی وڵات.

کەناڵی ناس کورد لە تێلیگرام جۆین بکە   

 

رێکخراوەکە  کە بارەگاکەی لەشاری لەندەنی پایتەختی بەریتانیایە، لەڕاگەیەندراوێکدا ( 19ی حوزەیرانی 2021)هێرشی توندی کردەسەر ئیبراهیم ڕەئیسی، سەرۆکی هەڵبژێردراوی ئێران و ڕایگەیاند، "دەبێت ڕەئیسی بخرێتە ژێر لێکۆڵینەوە بەهۆی ئەو هەموو تاوانانەی کە ئەنجامیداوە دژبە مرۆڤایەتی و پێشێلکردنی مافەکانی مرۆڤ لەئێران".

 

ئاماژەی بەوەشکردووە، "گەیشتنی ڕەئیسی بەپۆستی سەرۆکایەتی ئێران لەبری ئەوەی لێپێچینەوەی لەگەڵدا بکرێت بەرانبەر ئەو تاوانانەی کە ئەنجامیداوە کە بریتین لە کوشتن، دیارنەمانی زۆرەملێ و ئەشکەنجەدان، ئەوەمان  بۆ ڕووندەکاتەوە کە دەربازبوون لەسزا زۆر ئاسانە و یەکێکە لەسیما ناشرینەکانی ئەو وڵاتە".

 

ڕێکخراوە نێودەوڵەتییەکە، ڕەئیسی تۆمەتبارکردووە بەوەی کە لەساڵی 1988دا ئەندامی لیژنەی "مردن" بووە و هەزاران هاووڵاتیی ئێرانی لەڕێگەی ئەو لیژنەیەوە دووچاری چارەنووسێکی ڕەش و مەترسیدار کردووەتەوە و  چەندین کەس رووبەرووی مردن و دیارنەمانی زۆرەملێ بوون، کە تائێستا حکومەتی ئێران ئامادەنییە ژمارەی ڕاستەقینەوە و شوێنی ناشتنی تەرمی قوربانییەکان ئاشکرا بکات.

 

هاوکات ڕێکخراوەکە لەڕاگەیەندراوەکەدا، ڕەئیسی بەوەش تۆمەتبارکردووە کە لەماوەی دوو ساڵی ڕابردوودا سەدان کەسی لە ئۆپۆزسیۆن و بەرگریکارانی مافی مرۆڤ لەو وڵاتە  دووچاری کوشتن و زیندانیکردن کردووەتەوە کاتێک سەرۆکی دەسەڵاتی دادەوەری ئێران بووە.

 

ئاماژە بەوەشکراوە، "ڕەئیسی بەرپرسیارە لەزیندانی کردنی سەدان کەس لەخۆپیشاندەران و دیارنەمانی سەدان کەسی دیکەش بەتۆمەتی بەشداریکردنیان لە خۆپیشاندانەکانی مانگی کانوونی دووەمی ساڵی 2019". 

 

ڕێکخراوەکە داواشی لەئەندامانی ئەنجومەنی مافی مرۆڤی سەربە نەتەوەیکگرتووەکان کردووە، "ڕێکاری خێرا و پێویست بگرنەبەر دژ بەو کەسانەی کە بەشێوەیەکی بەرنامەدارێژراو لەئێران لە سزدان دەربازیان دەبێت".