گه‌ڕان

Shadow Shadow
سیاسه‌تی

پارتی و پەکەکە

پارتى و پەکەکە داواکاریی نوێ لەیەک دەکەن

2021.06.16 - 09:14
App store icon Play store icon Play store icon
پارتى و پەکەکە داواکاریی نوێ لەیەک دەکەن

ناس کورد-

پارتى دیموکراتى کوردستان جەخت دەکاتەوە کە نیازى شەڕیان نییە لەگەڵ پەکەکە بەڵام دەبێت گەریلا ناوچە سنورییەکان ڕادەستى پێشمەرگە بکاتەوە، پەکەکەش داوا لەو حزبە دەدات هێزەکانى بکێشێتەوە و نەکەوێتە تەڵەى "شەڕى براکوژییەوە".

کەناڵی ناس کورد لە تێلیگرام جۆین بکە   

 

ماوەى زیاتر لە 10 ڕۆژە گرژییەکانى پارتى و پەکەکە لەسنورى بادینان پێیناوەتە قۆناغێکى نوێوە، دواى دوو پێکدادان کە کوژرانى شەش پێشمەرگەیان لێکەوتەوە، هاوکات لەگەڵ ئۆپراسیۆنى بەردەوامى تورکیا لەدژى پەکەکە کە زیاتر لە ساڵێکە بەردەوامە.

 

عەلی عەونی، ئەندامی سەرکردایەتی پارتی لە سیمینارێکى ناوخۆیی حزبەکەیدا وتى، "پەکەکە ئامادە نییە بەبێ شەڕ ناوچە سنوورییەکان و شاخ و چیا و گوندەکانی ئەو ناوچانە ڕادەستی هێزەکانی پێشمەرگە بکات، بەڵام ئامادەیە بەبێ هیچ بەرگرییەك ڕادەستی سوپای تورکیایان بکات".

 

وتیشى، "پارتی هیچ ململانێیەکی لەگەڵ پەکەکەدا نییە و بە نیازی شەڕ نییە لەگەڵیاندا، بەڵام پارتی بە هەموو هێزێکیەوە پشتگیری لە حکومەتی هەرێم دەکات بۆ گەڕاندنەوەی شەرعیەت بۆ هەموو بستێکی کوردستان".

 

عەلى عەونى باسى لەوەشکرد، لە چەندین کەناڵی جیاوازەوە بە پەکەکەیان ڕاگەیاندووە کەوا دەبێت ناوچە سنوورییەکان چۆڵ بکەن و بەرپرسیارییەتی پاراستنی ئەو ناوچانە بۆ پێشمەرگەی کوردستان جێبهێڵن.

 

هەریەکە لە پارتى و پەکەکە لەدواى سەرهەڵدانى گرژییەکانەوە هێزى زیاتریان بردووەتە بادینان بەتایبەتى ناوچەى مەتینا لەسنورى ئامێدى کە بووەتە چەقى ئاڵۆزیی و پێکدادانەکان.

 

بەسێ ئەرزینجان، ئەندامی كۆردیناسیۆنی كۆمەڵەی ژنانی كوردستان "کەژەکە" سەر بە پەکەکە بەمیدیاکانى پارتەکەى ڕاگەیاند، "پێویستە پەدەکە ئیدی گەریلا تەنگەتاو نەکات، هێزەکانی خۆی نەهێنێتە هەرێمەکانی گەریلا. پێویستە پێشمەرگە نەکەوێتە ئەم تەڵەیەوە. پێویستە بەشداری لە شەڕی براکوژی نەکات".

 

وتیشى، "پێویستە پەدەکە هێزەکانی بکشێنێتەوە. ئێمە جارێکی دیکە ئەمە دووبارە دەکەینەوە. دەوڵەتی تورک بە تەنها دوژمنی پەکەکە نییە. لە هەمانکاتدا دوژمن هەموو کوردێکە".