گه‌ڕان

Shadow Shadow
سیاسه‌تی

’’فەرماندەیی بادینان و سۆران’’

مەحمود سەنگاوى مەرجى یەکێتى بۆ یەکگرتنەوەى پێشمەرگە ئاشکرا کرد

2021.06.07 - 22:50
App store icon Play store icon Play store icon
مەحمود سەنگاوى مەرجى یەکێتى بۆ یەکگرتنەوەى پێشمەرگە ئاشکرا کرد

ناس کورد-

مەحمود سەنگاوى مەرجى یەکێتى بۆ یەکگرتنەوەى هێزەکانى پێشمەرگە ئاشکرا کرد و دەڵێت، ئەوان پێیانوایە لەئەگەرى یەکگرتنەوەدا دوو فەرماندەیی هەبێت و ببەسترێنەوە بە وەزارەتەوە.

کەناڵی ناس کورد لە تێلیگرام جۆین بکە   

 

مەحمود سەنگاوى، فەرماندەى میحوەرى گەرمەسێرى پێشمەرگە ئەمڕۆ دووشەممە لە چاوپێکەوتنێکى تەلەفزیۆنیدا لەگەڵ کەناڵى "ڕووداو" وتى، "ئێمە پێمانوایە دەبێت دوو فەرماندەیی هەبێت بەناوى فەرماندەیی سۆران و بادینان، یەکێک لێرە و یەکێکیان لەولا و ببەسترێنەوە بە وەزارەتى پێشمەرگەوە".

 

وتیشى، "هەندێک داواکەن سێ بۆ چوار فەرماندەیی بێت، بەڵام ئێمە لەگەڵ دوانداین".

 

مەحمود سەنگاوى نەیشاردەوە "تەسکبینى حزبەیاتى" ڕێگر بووە لەبەردەم یەکگرتنەوەى هێزەکان، بەڵام ئێستا هەموویان گەیشتوینەتە ئەو قەناعەتەى کە پێشمەرگە یەکبگرێتەوە.

 

ماوەى چەند ساڵێکە وەزارەتى پێشمەرگە سەرقاڵى یەکخستنەوەى هێزەکانە و تاچەند رۆژى رابردوو دوو گەورەترین هێز کە پێکهاتوون لە یەکەکانى 70 ى یەکێتى و 80 ى پارتى لەدەرەوەى وەزارەت مابوونەوە، بەڵام لەئێستادا تەنها یەکەى 70 ماوەتەوە، دواى ئەوەى پارتى هێزەکەى خۆى خستە چوارچێوەى وەزارەتەوە.

 

ڕێبەر ئەحمەد، وەزیری ناوخۆی حکومەتی هەرێم (دووشەممە 7ی حوزەیرانی 2021) لە کۆنفرانسێکی ڕۆژنامەوانیدا ڕایگەیاند، مەسعود بارزانی یەکەی 80ی خستووەتەسەر وەزارەتی پێشمەرگە و هیوادارن یەکێتیش یەکەی 70 بخاتە سەر وەزارەت.

 

تا ئێستا دیار نییە کەى هێزەکانى 70 دەخرێتە چوارچێوەى وەزارەتى پێشمەرگەوە، بەڵام فەرماندەیی هێزەکە پێشتر رایگەیاندبوو ئەوانیش پلانیان هەیە لەو بارەیەوە.

 

مستەفا چاوەڕەش فەرماندەی هێزەکانی حەفتای یەکێتی (31ی ئایاری 2021) لە لێدوانێکدا بۆ"ناس کورد" ڕایگەیاند، پلانیان هەیە هاوشێوەی پارتی هێزێکیان بخنە ژێر چەتری وەزارەتی پێشمەرگەوە، بەڵام ئەو هەنگاوە پێویستی بەدڵنیایی هەیە، بڕیاریشە بەم نزیکانە لەسەر میکانزم و ڕێکارەکان لەگەڵ پارتی کۆببنەوە.



وتیشی، "ئەو پرسە لەئێستادا بەچڕی لەلایەن هاوسەرۆکەکان و ئەندامان و کادرانی یەکێتییەوە تاوتوێی دەکرێت بۆئەوەی میکانزمێک بۆ ئەو هەنگاوە دابنرێت داپەروەری و یەکسانی تێدا بەدی بکرێت بۆ ئەوەی هەموولایەک تێدا ڕووسوربن، پرسەکە پێویستی بە دڵنیایی هەیە".