گه‌ڕان

Shadow Shadow
سیاسه‌تی

ئەمریکا هەڵوێستی خۆی لەبارەى هێرشەکەى پەکەکە بۆسەر پێشمەرگە ئاشکرا کرد

2021.06.06 - 12:07
App store icon Play store icon Play store icon
ئەمریکا هەڵوێستی خۆی لەبارەى هێرشەکەى پەکەکە بۆسەر پێشمەرگە ئاشکرا کرد

ناس کورد-

باڵیۆزخانەی ئەمریکا لە بەغدا ئیدانەی هێرشەکەی پەکەکەی بۆسەر پێشمەرگە کرد و ڕایگەیاند، پێکەوە لەگەڵ هەرێم کار دەکەن بۆ دروستکردنی سەقامگیری.

کەناڵی ناس کورد لە تێلیگرام جۆین بکە   

 

باڵیۆزخانەی ئەمریکا لە بەغدا لە پەیامێکدا وتی، "ئێمە بە توندترین شێواز هێرشی دوێنێی پەکەکە لە دژی پێشمەرگە قارەمانەکانمان شەرمەزار دەکەین، دڵمان لای کەسوکاری بریندارەکانە و ئەوانەی ژیانیان لە دەستداوە، دڵنیای دەکەینەوە کە ئێمە لەگەڵ دۆستەکانماندا لە هەرێمی کوردستانی عێراق دەوەستین و پابەندبوونی خۆمان دووپات دەکەین بۆ پێکەوە کارکردن بۆ بەدیهێنانی ئاسایش لە ناوچەکەدا."

 

بەپێی ڕاگەیەنراوی وەزارەتی پێشمەرگە، بەرەبەیانی دوێنێ (5ی حوزەیرانی 2021) هێزێکی پێشمەرگە لەکاتی ئەنجامدانی ئەرکێکی سەربازی لەچیای مەتینی قەزای ئامێدی، بەمەبەستی پاراستنی خەڵک و گوندەکانی ئەم ناوچەیە و گەڕاندنەوەی ئاسایش بۆ دەڤەرەکە، لەلایەن هێزێکی (پ ک ک)ەوە بۆسەیەکیان بۆ دانراوە، لە ئەنجامدا پێنج پێشمەرگە شەهید بوون دوو پێشمەرگەی تریش برینداربوون."

 

لە بەرامبەردا ڕاگەیەنراوێکدا فەرماندەیی مەیدانی خابوری هەرێمی مەتینای هەپەگە وردکاری ڕووداوەکەی بڵاوکردەوە و ڕایگەیاند، ئەو هێزەی پێشمەرگە هێرشیان کردووەتەسەریان و لە ڕێگەدا بەهۆی تەقینەوەیەک کە هۆکارەکەی نازانرێت ئەو ڕووداوە ڕوویداوە.

 

لە ڕاگەیەندراوەکەدا ئەو فەرماندەییە (شەممە 5ی حوزەیرانی 2021) ڕایگەیاندووە، " ئەمڕۆ کاتژمێر 4:00ی بەیانی، هێزەکانی سەربە پارتی، لە دوولاوە هێرشیان کردە سەر دۆڵێک لەنێوان گردی چارچلا و گردی جولەمێرگ، کە خاڵێکی ستراتیژیی مەتینایە، بۆ ئەوەی ئەو هێرشە کە 50 زرێپۆش تێدا بەشداربوون، نەیەتە ناو دۆڵەکەوە، هێزەکانمان بە چەکی سووک تەقەی ئاسمانییان کرد، بەڵام ئەو هێزانە بێ گوێدانە هۆشدارییەکانمان، هێرشبەرانە بەرەو پێشهاتن."

 

ئاماژەی بەوەشکردووە، " ئەو دۆڵە هیچ گوند و شوێنێکی نیشتەجێیبوونی تێدا نییە، 25 ساڵە هێزی پێشمەرگە نەهاتووەتە ئەم مەیدانە و هێزەکانی گەریلای تێدان و لەدژی سوپای داگیرکەری تورک مینڕێژکراوە، سەرەڕای ئەوەی ئەمانەیان زانیوە و هۆشدارییشیان پێدرا، بەڵام یەک دوو ئۆتۆمبێلیان بەردەوام بەرەوە پێش دەهاتن، بەهۆی تەقینەوەیەک کە هۆکارەکەی نازاندرێت، چەند قوربانیی لێکەوتەوە، ئەم ئەنجامە خواستی ئێمە نەبوو و دڵی مرۆڤ دەئیشێنێت، بەڵام بەرپرسیارێتیی ئەم ڕووداوە لە ئەستۆی ئێمە نییە، بەرپرسیارێتی ڕووداوەکە لەسەر ئەوانەیە کە هێزەکەیان جوڵاندووە."

 

هاوکات، وتەبێژی حکومەتی هەرێمی کوردستان لەسەر ڕووداوەکە ڕاگەیەنراوێکی بڵاوکردەوە و ڕایگەیاند، ھێرشەکەی پەکەکە بە توندی شەرمەزار دەکات و چیتر خەڵک و هەرێمی کوردستان رێگە نادەن ببنە قوربانی سیاسەتی چەوتیان.