گه‌ڕان

Shadow Shadow
سیاسه‌تی

بەپەلە

فەرماندەیی خابوری هەپەگە وردەکاریی ڕووداوەکەی ئەمڕۆی ئامێدیی بڵاوکردەوە

2021.06.05 - 16:53
App store icon Play store icon Play store icon
فەرماندەیی خابوری هەپەگە وردەکاریی ڕووداوەکەی ئەمڕۆی ئامێدیی بڵاوکردەوە

ناس کورد-

لە ڕاگەیەنراوێکدا فەرماندەیی مەیدانی خابوری هەرێمی مەتینای هەپەگە وردکاری ڕووداوەکەی ئەمڕۆی مەتینای بڵاوکردەوە و ڕایگەیاند، ئەو هێزەی پێشمەرگە هێرشیان کردووەتەسەریان و لە ڕێگەدا بەهۆی تەقینەوەیەک کە هۆکارەکەی نازانرێت ئەو ڕووداوە ڕوویداوە.

کەناڵی ناس کورد لە تێلیگرام جۆین بکە   

 

لە ڕاگەیەندراوەکەدا ئەو فەرماندەییە (شەممە 5ی حوزەیرانی 2021) ڕایگەیاندووە، " ئەمڕۆ کاتژمێر  4:00ی  بەیانی، هێزەکانی سەربە پارتی، لە دوولاوە هێرشیان کردە سەر دۆڵێک لەنێوان گردی چارچلا و گردی جولەمێرگ، کە خاڵێکی ستراتیژیی مەتینایە، بۆ ئەوەی ئەو هێرشە کە 50 زرێپۆش تێدا بەشداربوون، نەیەتە ناو دۆڵەکەوە، هێزەکانمان بە چەکی سووک تەقەی ئاسمانییان کرد، بەڵام ئەو هێزانە بێ گوێدانە هۆشدارییەکانمان، هێرشبەرانە بەرەو پێشهاتن."

 

ئاماژەی بەوەشکردووە، " ئەو دۆڵە هیچ گوند و شوێنێکی نیشتەجێیبوونی تێدا نییە، 25 ساڵە هێزی پێشمەرگە نەهاتووەتە ئەم مەیدانە و هێزەکانی گەریلای تێدان و لەدژی سوپای داگیرکەری تورک مینڕێژکراوە، سەرەڕای ئەوەی ئەمانەیان زانیوە و هۆشدارییشیان پێدرا، بەڵام یەک دوو ئۆتۆمبێلیان بەردەوام بەرەوە پێش دەهاتن، بەهۆی تەقینەوەیەک کە هۆکارەکەی نازاندرێت، چەند قوربانیی لێکەوتەوە، ئەم ئەنجامە خواستی ئێمە نەبوو و دڵی مرۆڤ دەئیشێنێت، بەڵام بەرپرسیارێتیی ئەم ڕووداوە لە ئەستۆی ئێمە نییە، بەرپرسیارێتی ڕووداوەکە لەسەر ئەوانەیە کە هێزەکەیان جوڵاندووە."

 

هەروەها هاتووە، "ئەو جوڵەیە لە دژی گەریلاکانی ئازادیی کوردستان، کە دژی هێرشەکانی دووژمن بۆسەر هێڵەکانی کێستە و زەندورا، بەرخۆدانی مێژوویی دەکەن، واتایەکی دیکەی جگە لە پشتیوانیی لە دەوڵەتی تورک نییە، داوای زەوتکردنی ئەم مەیدانە خزمەت بە دووژمن دەکات تا ئەو مەیدانە بەرتەسک بکاتەوە، بەرخۆدان ئاستتەنگ بکات و ڕێگە بۆ دەوڵەتی تورک دەکاتەوە، ئەمە جوڵەیەکە بۆ لە پشتەوە خەنجەرلێدان لە گەریلا، سەرەڕای ئەمەش گەریلاکانمان ئەو هێزەیان نەکردە ئامانج، ئەو هێزە بە هەڵەی خۆی یان بە ئەنجامێکی دیکە بوونەتە قوربانی، دوای ئەوەی هێرشیان کردە سەر هێزەکانمان، کەوتنە حاڵەتی شەڕ و هێشتاش لەو حاڵەتە دان."

 

لە ڕاگەیەنراوەکەدا ئەوەش خراوەتەڕوو، " لەم سەردەمە گرنگە مێژووییەدا ئەم هەوڵە، کە لەلایەن پارتییەوە نیشاندراوە، هەوڵێکە کە ڕێگە بۆ شەڕێکی قورس لەنێوان هێزە کوردییەکان دەکاتەوە، ئەمە بۆ کورد و پرسی نەتەوەیی کوردستان بە واتای زیانێکی گەورەیە، دیسانیش ئێمە نامانەوێت شەڕێکی شووم لەناو کورد دەستپێبکات، ئێمە تەنیا دەمانەوێت لەدژی دەوڵەتی تورک کە دووژمنی سوێندخواردووی گەلەکەمانە بەرخۆدان بکەین و بجەنگین، گەریلاکانی کوردستان بە بەرخۆدانێکی مێژوویی 43 ڕۆژە، نیشانیاندا کە دەتوانن هێرشەکانی دەوڵەتی تورک بۆسەر باشووری کوردستان تێکبشکێنن، ویستی گەمارۆدانی ئێمە، لە بنچینەی کوردیدا نییە، هەروەها هەوڵێکی لەم شێوەیە بۆ داهاتووی گەلەکەمان دەبێتە مەترسییەکی گەورە."

 

لە کۆتاییشدا هاتووە، "وەک گەریلاکانی ئازادی کوردستان، بۆ ئەوەی پارتی دەست لەم هەڵویستە هەڵگرێت، داوا لە خەڵکی وڵاتپارێزی بادینان، هەموو گەلی کوردستان، هێزە سیاسییەکان، ڕۆشنبیران و هونەرمەندان دەکەین کە ئەرکی خۆیان جێبەجێی بکەن."