گه‌ڕان

Shadow Shadow
سیاسه‌تی

هۆکارەکەى بزانە

هێڤیدار ئەحمەد هۆکاری چوونی پێشمەرگە بۆ چیای مەتینی ئاشکرا دەکات

2021.06.05 - 14:20
App store icon Play store icon Play store icon
هێڤیدار ئەحمەد هۆکاری چوونی پێشمەرگە بۆ چیای مەتینی ئاشکرا دەکات

ناس -کورد

پەرلەمانتارێکی پارتی ڕایگەیاند، ئەو پێشمەرگانەى ئەمڕۆ لە چیای مەتینی قەزای ئامێدی کوژران "چووبوون بۆ گرتنى شوێنە ستراتیژییەکان."

کەناڵی ناس کورد لە تێلیگرام جۆین بکە   

 

هێڤدار ئەحمەد ئەمڕۆ شەممە (5ی حوزەیرانی 2021) لە هەژمارى خۆى لە فەیسبوک نوسیویەتى، "ئەو پێشمەرگانە چووببونە چیاى مەتین بۆئەوەى شوێنە ستراتیژیەکان بگرن و بیانوو نەدرێتە سوپاى تورکیا وەک شوێنى دیکە لە زاخۆ و دەڤەرى بەروارییا بیگرێت، چەکدارانى پەکەکە نەیانهێشت پێشمەرگە بگەنە ئەوشوێنانە".

 


ئەندام پەرلەمانەکەى پارتى ئەوەشى نوسیوە کە "پێشمەرگە بۆئەوە دروست بووە کوردستان بپارێزێت، بەڵام بەداخەوە پەکەکە دروست بووە پێشمەرگە شەهید بکات".

 

هاوکات مەسرور بارزانی، سەرۆکى حکومەتی هەرێم "بە توندی" ئیدانەی هێرشی ئەمڕۆی پەکەکەی کرد بۆسەر پێشمەرگە و داواش لە لایەنەکان و پەرلەمان دەکات لەدژی بوەستنەوە.  

  

مەسرور بارزانی لە پەیامێکیدا لە تویتەری خۆی نوسیویەتی، "بە توندی هێرشی ئەمڕۆی پەکەکە بۆ سەر پێشمەرگە سه‌ركۆنه‌ و شەرمەزار دەکەم. پرسە و هاوخەمی ئاراستەی بنەماڵەی پێنج شەهیدەکە دەکەم و ھیوای چاکبوونەوەی خێرا بۆ برینداره‌كان دەخوازم."  

  

دەشڵێت، "داوا لە پەرلەمانی کوردستان و لایەنە سیاسییەکان دەکەم کە بە یەکدەنگیی لە دژی ئەم دەستدرێژییە بوەستنەوە‌."  

  

وەزارەتی پێشمەرگە ڕایگەیاند، بەیانی ئەمڕۆ هێزێکی پێشمەرگە لەکاتی ئەنجامدانی ئەرکێکی سەربازیی لە چیای مەتینی قەزای ئامێدی، لەلایەن هێزێکی پەکەکە بۆسەیان بۆ دانراوە و لە ئەنجامدا پێنج پێشمەرگە شەهید بوون.  

  

وەزارەتی پێشمەرگە لە ڕاگەیەنراوەکەیدا دەڵێت، بەرەبەیانی ئەمڕۆ (5ی حوزەیرانی 2021)، هێزێکی پێشمەرگە لەکاتی ئەنجامدانی ئەرکێکی سەربازی لەچیای مەتینی قەزای ئامێدی، بەمەبەستی پاراستنی خەڵک و گوندەکانی ئەم ناوچەیە و گەڕاندنەوەی ئاسایش بۆ دەڤەرەکە، لەلایەن هێزێکی (پ ک ک)ەوە بۆسەیەکیان بۆ دانراوە، لە ئەنجامدا پێنج پێشمەرگە شەهید بوون دوو پێشمەرگەی تریش برینداربوون."  

  

دەشڵێت، "پێشتریش هۆشداریمان دابوو، لەئەگەری روودانی رووداوی لەو شێوەیە، دەبێ هەمووان رێز لەسنووری هەرێم بگرن و ئاسایش و سەقامگیری هەرێمی کوردستان نەخەنە مەترسیەوە."  

  

لەدوای بڵاوبوونەوەى هەواڵی "شەهیدبوونی پێنج پێشمەرگە لە بۆسەیەکی پەکەکەدا" لەلایەن وەزارەتی پێشمەرگەوە، ناوەندی ڕاگەیاندنی هێزەکانی پاراستنی گەل (هەپەگە) ڕایگەیاند، گولـلەى هۆشیارکردنەوەیان تەقاند بۆئەوەى هێزەکە زیاتر نەچنەپێشەوە.  

  

میدیای فەرمی پەکەکە دەڵێت، "هێزەکانی عێراق و پارتی دیموکراتی کوردستان (پەدەکە) دەستیان بە جموجوڵ بەرەو ناوچەکانی گەریلا کردووە و لەو چوارچێوەیەدا هێرشیان کردووەتە سەر کامپەکانی گەریلا."  

  

باسی لەوەشکردووە، "هێزەکانی هەپەگە و یەژاستار بۆ ئەوەى ئەو هێزانە زیاتر بەرەو پێش نەڕۆن گولـلەى هۆشیارکردنەوەیان تەقاند."  

  

هاوکات ناوەندی ڕاگەیاندنی هێزەکانی پاراستنی گەل (هەپەگە) ڕایگەیاند، کاتژمێری 4:00ی بەرەبەیانی ئەمڕۆ پارتی هێزێکی زۆری سەربازیی بەرەو ناوچەکانی گەریلا لە ئامێدی و مەتینا جوڵاند.  

  

دەشڵێت، "ئەو هێزانەى پەدەکە زرێپۆش، ئامبولانس، حەفارە و ژمارەیەکی زۆر ئۆتۆمبێلی تایبەت بە ناوچە سەختە شاخاوییەکانی تیادایە."  

  

هەپەگە هۆشدار دەداتە پارتی و ڕایگەیاند، “داوا لەو هێزانە دەکەین کە لە پشتەوە خنجەرمان لێنەدەن”.  

  

لە ڕاگەیەندراوەکەی هەپەگەدا هاتووە، "ئەو هێزانە دەیانەوێت بێنە ناو مەیدانەکانی هێزەکانمان لە مەتینا، ئێمە لە بەرامبەر دەوڵەتی داگیرکەری تورک کە بە نیازە کوردستان داگیر بکات بەرخۆدان دەکەین، داوا لەو هێزانە دەکەین کە لە پشتەوە خنجەرمان لێنەدەن و خوێنی خۆشک و برا نەڕیژن، بۆیەش داواکەمان ئاراستەی گەل و هێزەکان دەکەین."