گه‌ڕان

Shadow Shadow
سیاسه‌تی

وردەکاریى

کۆشکى سەلام؛لایەنە پەیوەندیدارەکان تاوتوێى پڕۆژە یاساى گێڕانەوەى پارە بەتاڵانبراوەکانیان کرد

2021.06.02 - 16:49
App store icon Play store icon Play store icon
کۆشکى سەلام؛لایەنە پەیوەندیدارەکان تاوتوێى پڕۆژە یاساى گێڕانەوەى پارە بەتاڵانبراوەکانیان کرد

ناس کورد-

سەرۆک کۆمارى عێراق لە کۆشکى سەلام لە شارى بەغدا لەگەڵ لایەنە پەیوەندیدارەکان تاوتوێى پڕۆژە یاساى گێڕانەوەى پارە بەتاڵانبراوەکانى کرد.

 

کەناڵی ناس کورد لە تێلیگرام جۆین بکە   

 

نوسینگەى ڕۆژنامەوانى سەرۆکایەتى کۆمارى عێراق (2ى حوزەیرانى 2021) لە راگەیەندراوێکدا ئاماژەى بەوە کرد، د. بەرهەم ساڵح، سەرۆک کۆماری عێراق ئەمڕۆ چوارشەممە ٢٠٢١/٦/٢ لە كۆشكی سەلام لە بەغدا كۆبوونەوەیەكی بەرفراوانی لەگەڵ هەریەك لە حەسەن کەعبی، جێگری سەرۆکی ئەنجومەنی نوێنەران و سەرۆک و جێگری سەرۆکی لیژنەکانی دەستپاکی و یاسای و دارایی ئەنجومەنی نوێنەران و سەرۆكی دەزگای داواكاری گشتی و سەرۆكی دەستەی دەستپاكی و سەرۆكی دیوانی چاودێری دارایی ئەنجامدا.

 

بەگوێرەى راگەیەندراوەکە، لەمیانی كۆبوونەوەكەدا بە تێروتەسەلی باس لە پرۆژە یاسای گێرانەوەی پارە بەتاڵانبراوەكانی گەندەڵی كرا کە لەلایەن سەرۆکایەتی کۆمارەوە ئاڕاستەی ئەنجومەنی نوێنەران کراوە، و جەختیشکرایەوە لەگرنگی و پەسەندكردنی پرۆژە یاساكە بەو پێیەی پرۆژە یاساكە تەواوكەری یاساكانی دیكەی تایبەت بە بەگژاچوونەوەی گەندەڵییە و پشتیوانی گەورەش دەکات لە هەوڵ و كۆششە نیشتمانییەکان کە لەو بارەوە لەئارادان، ھەروەھا ئاماژەکرا بە رۆڵی گرنگی دەزگای یاسادانان لەو بارەیەوە.

 

لە راگەیەندراوەکەدا رونکراوەتەوە، لە کۆبوونەوەکەدا سەرۆك کۆمار ئاماژەی بە مەترسی و كاریگەرییە خراپەکانی دیاردەی گەندەڵی كرد بۆ سەر پڕۆسەی پەرەپێدان و كایەی ئابووری و كۆمەڵایەتی و دۆخی گشتی وڵات، بۆیە رایگەیاند پێویستە هەڵوێستەیەكی جددی لەو بارەوە بکەین و گشت دامەزراوە فەرمییەكانی دەوڵەتیش تیایدا بەشداربن و بە هەموولایەك پەتای مەترسیداری گەندەڵی سنووردار بكەین، چونكە بەردەوامی ئەو دیاردەیە هەڕەشەیەكی جددیە بۆ سەر ئێستا و ئایندەی وڵات و بونیادنانەوە و ئابووری وڵات پەک دەخات.

 

ئاماژە بەوەش کراوە، هەر لەو چوراچێوەیەدا سەرۆك کۆمار ئاماژەی بەوە كرد كە پرۆژەیاساكە هەنگاوێكی گرنگە بە ئاڕاستەی  تەواوکردنی هەوڵ و كۆششەكانی دامەزراوە پەیوەندیدارەكانی دیكەی دەوڵەت كە تایبەتن بە بەگژاچوونەوەی گەندەڵی و گێڕانەوەی پارە بەتاڵانبراوەكان، ئەمە جگە لەوەی پرۆژە یاساكە گرتنەبەری رێوشوێنی پێشوەختەی لەخۆ گرتووە بۆ رێگریكردن لە گەندەڵی و دواتریش گرتنەبەری رێوشوێنی دیكەی بەدوادا دێت بۆ گێرانەوەی پارە بەتاڵانبراوەكانی گەندەڵی و داهاتەكانی، سەرباری ئەوەش پڕۆژەكە سودی لە ئەزموونە نێودەوڵەتییە سەركەوتووەكانی تایبەت بە بەگژاچوونەوەی گەندەڵی وەرگرتووە.

 

هاوکات بەرهەم ساڵح داواى لە ئەنجومەنی نوێنەران و لیژنەکانی پەرلەمان پەیوەندیدار بە گەندەڵی كرد پرۆژە یاساكە بە تێروتەسەلی تاوتوێ بكەن و بە سەرنج و تێبینییەكانیان دەوڵەمەندتری بكەن و بە مەبەستی پەسەندكردنی پرۆژەکە هاوكار و هەماهەنگ بن و بەپێویستى زانى کە پڕۆسەی چاكسازی بنەڕەتی بەردەوامی ھەبێت و ھیچ خەمساردی و بێباكییەک بەرامبەر ئەو ئەركە نیشتمانییەدا نەبێت، بەو ئامانجەی بتوانین پایەكانی دەوڵەتێكی تواناداری خاوەن سەروەری تۆكمەتر بێتە ئاراوە کە خزمەتكاری خەڵک بێت.

 

لە راگەیەندراوەکەدا ئاماژە بەوە دراوە کە حەسەن کەعبی، جێگری سەرۆکی ئەنجومەنی نوێنەران پشتیوانی دەزگای یاسادانانی دووپاتکردەوە بۆ ئەو ھەوڵانەی لە ئارادان بۆ بەگژاچوونەوەی گەندەڵی، ھەروەھا پشتیوانی ئەو پرۆژەیاسا تایبەتانەی کرد کە سەبارەت بە ریشەکێشکردنی گەندەڵی پێشکەش دەکرێن، بۆ بەگژاچوونەوەی گەندەڵی و کەمکردنەوەی لێکەوتەکان و لێپێچینەوە لەو کەسانەی بەرپرس و کەمتەرخەمن لەو بارەیەوە، لەرێگەی لیژنە تایبەتەکانی ئەنجومەنی نوێنەران، ھاوکات ھەوڵەکانی سەرۆکایەتی کۆماری بەرز نرخاند سەبارەت بە پێشکەشکردنی پرۆژە یاسای گێڕانەوەی پارە بەتاڵانبراوەكانی گەندەڵی.