گه‌ڕان

Shadow Shadow
سیاسه‌تی

بۆچی حەشدی شەعبی لەسەر قاسم موسڵیح هاتنە سەر بەغدا؟ 

2021.05.27 - 19:16
App store icon Play store icon Play store icon
بۆچی حەشدی شەعبی لەسەر قاسم موسڵیح هاتنە سەر بەغدا؟ 

ناس کورد-

هەرچەندە گرژییە ئەمنییەكانی دوێنێی بەغدا لە ئێستادا كۆتاییان هاتووە، بەڵام هێشتا چارەنوسی قاسم موسڵیح فەرماندەی دەستگیركراوی حەشدی شەعبی هێشتا بەفەرمی یەكلایی نەبووەتەوە. 

کەناڵی ناس کورد لە تێلیگرام جۆین بکە   

 

گردبوونەوەی دوێنێی بەشێك لە هێزەكانی حەشدی شەعبی و هەڵكوتانە سەر بەغدا بەمەبەستی گوشاركردن بووە بۆ ئازادكردنی، قاسم موسڵیحی ئامر لیوای "الطفوف" و فەرماندەی میحوەری ئەنباری حەشدی شەعبی، قەبارەی جموجوڵ و گردبوونەوەكانیش هێندە گەورەبوون ئیبراهیم سمەیدەعی شارەزای ئەمنی لە شیكارێكدا كە "ناس كورد" بینیویەتی (27 ئایاری 2021) دەڵێت "لەهیچ كودەتایەكی عێراقدا هێندە هێزی سەربازی لەناو بەغدا جموجوڵی پێ نەكراوە".

 

بەپێی ئەو بەڵگانەی لەبەردەستدان و بەگەڕانەوە بۆ راگەیەنراوی سەرۆك وەزیران مستەفا كازمی (26 ئایاری 2021) و راگەیەنراوە فەرمییەكانیتر، قاسم موسڵیح بەپێی مادەی 4 تیرۆر، بەسەرپەرشتی بریكاری وەزیری ناوخۆ بۆ كاروباری هەواڵگری ئەحمەد ئەبو ڕغیف دەستگیر كراوە كە سەرۆكایەتی لیژنەیەكی تایبەت دەكات بۆ بەرەنگاربوونەوەی گەندەڵی و تاوانە هەڵاواردە و گەورەكان.

 

هەرچەند تۆمەتەكانی قاسم موسڵیح، تیرۆرە، بەڵام بەپێی زانیارییەكانی رۆیتەرز و كەناڵی ئەلحوڕەی ئەمەریكی ناوبراو تۆمەتبارە بە هێرشكردنە سەر بنكەی (عین الأسد) ئەمەریكییەكان و تیرۆركردنی چالاكوانانی خۆپیشاندانی تشرین لەوانەش ئیهاب وەزنی كە لە (9 ئایار) لە سەنتەری كەربەلا كوژرا. بەهۆی ئەوەشەوە ئەم هەفتەیە (25 ئایار) خۆپیشاندەرانی باشوری عێراق لە هەموولایەكەوە ڕژانە گۆڕەپانی تەحریر و گۆڕەپانی نسوری بەغدای پایتەخت لەژێر دروشمی "كێ كوشتمی؟" و جموجوڵەكەی خۆشیان ناونا "شۆڕشی ئیهاب وەزنی".

 

قاسم موسڵیح، كە پێشتر و لەسەردەمی شەڕی داعش فەرماندەی لیوایەكی سەر بەعەتەبەكانی مەرجەعیەتی نەجەف بووە "الطفوف" كە بە "حەشدی مەرجەعیەت" دەناسرێت، دواتر پەیوەندی كردووە حەشدی وەلائی سەر بەئێران، لەگەڵ براكەیدا (عەلی موسڵیح) تۆمەتبارن بە سەركوتكردنی ناڕازییەكان و گەندەڵی دارایی و سەرانە وەرگرتن، لەم میانەیەشدا دایكی ئیهاب وەزنی، لە دیمانەیەكی ئەلحوڕەدا دەڵێت، قاسم موسڵیح هەڕەشەی توندی لە كوڕەكەی كردووە "ئەگەر یەك رۆژیشم مابێت لە ژیاندا هەر دەتكوژم".

 

ئەحمەد ئەلیاسری كە چاودێرێكی سیاسییە لە شیكارێكدا كە "ناس كورد" بینیویەتی باس لەوە دەكات، موسڵیح لەم ساڵانەی دوایی و لەسەر دەستی قاسم سلێمانی، بووەتە جێگە متمانەی سوپای پاسداران و سەرپەرشتیكردنی دۆسیەی ئەمنی میحوەری ئەنباری پێ سپێردراوە كە عێراق و ئێران دەبەستێتەوە بە سوریا و مۆڵگەی پێشووی ڕێكخراوەكانی ئەلقاعیدە و داعش بووە، هەر ئەمەش قاسم موسڵیح كردووەتە یەكێك لە بڕواپێكراوترین لێپرسراوەكانی ناو حەشدی شەعبی و كەسایەتییەكی كاریگەر لە دەستەی حەشدی شەعبی.

 

ئەو هێزانەی لەسەر قاسم موسڵیح چوونە سەر ناوچەی سەوز دەموچاویان پێچرابوو، هیچ لۆگۆ و ناونیشانێكیشیان بە ئاشكرا هەڵنەگرتبوو، بەڵام ئەو لایەنانەی زۆر پشتیوانییان كردن لە رێگەی بەیاننامە و لێدوانی میدیاییەوە، زیاتر بریتی بوون لە عەسایب و كەتیبەكانی حیزبوڵڵا و بزوتنەوەی نوجەبا كە سەرجەمیان لە هێزە وەلائییەكانی ئێرانن و ئەمەش گرنگیی پێگەی قاسم موسڵیح لەناو ئەم بەرەیەدا دەردەخات.

 

مستەفا كازمی سەرۆ وەزیران جموجوڵی چەكدارەكانی حەشدی بە پێشێلكردنی دەستور و یاسا دایە قەڵەم و فەرمانیكرد لێكۆڵینەوەی تێدا بكرێت، لەلای خۆشییانەوە گروپە ناڕازییەكانی حەشد دەلێن گرتنی ناوبراو بەتۆمەتی نەیاران بووە و دەستێك هەیە بۆ تێكدانی پەیوەندی حەشد و سەرۆكایەتی وەزیرانی عێراق بەمەبەستی زیاتر بەئامانج كردنیان.