گه‌ڕان

Shadow Shadow
سیاسه‌تی

’’هیچ ناترسن’’

هیومان ڕایتس وۆچ نهێنییەک لەبارەى ئەو گروپانەی چالاکانی عێراقی تیرۆر دەکەن ئاشکرا دەکات

2021.05.22 - 09:40
App store icon Play store icon Play store icon
هیومان ڕایتس وۆچ نهێنییەک لەبارەى ئەو گروپانەی چالاکانی عێراقی تیرۆر دەکەن ئاشکرا دەکات

ناس کورد-

ڕێکخراوى هیومان ڕایتس وۆچ دەڵێت، ژمارەیەک لە گروپە چەکدارەکانى عێراق لە پشتەوەى تیرۆرکردنى چالاکانەوەن، ئەو گروپانەشی خاوەنی حیزبى سیاسین دەیانەوێت لە هەڵبژاردنى داهاتووشدا پێگەى خۆیان لە جومگەى حوکمڕانیدا زیاتر بچەسپێنن.

کەناڵی ناس کورد لە تێلیگرام جۆین بکە   

 

هیومان ڕایتس وۆچ لە ڕاپۆرتێکیدا کە "ناس کورد" خوێندوییتییەوە ئاماژەی بۆ ئەوە کردووە، تیرۆرکردنى چالاکان لەسەرهەڵدانى خۆپیشاندانەکانى تشرینى عێراقەوە بەردەوامە، ئامارێکى کۆمسیۆنى عێراقیش بۆ مافەکانى مرۆڤ جەخت لەسەر هەوڵى تیرۆرکردنى 81 چالاکى مەدەنى و ڕۆژنامەنەوانى ئۆپۆزسیۆنى حکومەت دەکات لەکاتى خۆپیشاندانەکانەوە و 34 لەو هەوڵانەش سەرکەوتوو بوون.

 

ئەوەش خراوەتەڕوو، نزیکەى سێ یەکێ لەو هەوڵانە لەکاتى کابینەکەى ئێستاى مستەفا کازمیدا بووە و گەرچى ناوبراو لیژنەیەکى لێکۆڵینەوەشى لەسەر ئەو ڕوداوانە پێکهێناوە بەڵام تا ئێستا هیچ دەرئەنجامێک لەو بارەیەوە ئاشکرا نەکراوە.

 

هیومان ڕایتس وۆچ باسى لەوەش کردووە، گروپە چەکدارەکان بەو کارانە تێوەگلاون و ئەوانە بێ دوودڵى سڵ لەهیچ کارێکى کوشتن ناکەنەوە و لە دەرئەنجامەکەشى ناترسن.

 

ئەو ڕێکخراوە نێودەوڵەتییە ئەوەشى ڕوونکردووەتەوە، دووبارەبوونەوەى پڕۆسەى تیرۆرکردنەکان واى لەهەندێ سەرپەرشتیارى خۆپیشاندانەکان کردووە شارەکانیان بەجێبهڵن و هەتاوەکو ئەو گروپە چەکدارانەش بەهێز ببن لەناو جۆمگەکانى دەسەڵاتتدا ئەوا هەموو هەوڵێک بۆ ڕاگرتنى ئەو تیرۆرانە و چەسپاندنى دادپەروەرى بۆ کەسوکارى قوربانیان و ئایندەى عێراق بەگشتى زیاتر بەرەو هەڵدێر دەچێت.


هیومان ڕایتس وۆچ دەشڵێت، هێزە عێراقییەکان پێشتر توندوتیژیان لەدژى خۆپشاندەران بەکارهێنا و ئەوەش کوژرانى سەدان خۆپیشاندەرى ئاشتى خوازى لێکەوتەوە و گەرچى خۆپیشاندانەکانیش کەم بوونەتەوە بەڵام کردەى تیرۆرەکان لەناونەچوون و لەگەڵ سەرهەڵدانى هەر ناڕەزایەتیەک لەدژى حکومەت ئەوا چالاکان و ڕۆژنامەنووسان زیاتر دەکرێنە ئامانج.


بەپێى ڕێکخراوەکە، ئەگەر دەسەڵاتدار نەتوانن بەپەلە ڕێگرى لەو هەوڵانە بکەن ئەوا کەشوهەواى ترس و دڵەڕاوکێ زیاتر ڕوو لەوانە دەکات کە داواى گۆڕانکارى لەهەڵبژاردنى پێشوەختەى پەرلەماندا دەکەن و هەروەها ئەوانەش کە ڕەخنە لەحکومەت دەگرن لەکەمتەرخەمییەکانى بەرامبەر بکوژان.