گه‌ڕان

Shadow Shadow
سیاسه‌تی

هەڵبژاردنى پێشوەختە

شیکار؛ بۆچى کەمترین ژمارەى کاندید لەپارێزگاکانى هەرێمدایە؟

2021.05.20 - 17:53
App store icon Play store icon Play store icon
شیکار؛ بۆچى کەمترین ژمارەى کاندید لەپارێزگاکانى هەرێمدایە؟

ناس کورد-

 

بەڕێوەبەرى پەیمانگاى کوردى بۆ هەڵبژاردن هۆکارى کەمبوونەوەى ژمارەى کاندید و حزبەکان بۆ بەشدارى لە هەڵبژاردن شیدەکاتەوە و پێشبینیدەکات بۆ هەڵبژاردنەکانى داهاتوو دوو بۆ سێ حزب بمێننەوە.

کەناڵی ناس کورد لە تێلیگرام جۆین بکە   

 

ئارام جەمال لە شیکاریەکدا کە "ناس کورد" بینیویەتى ئاماژەى بەوەکردووە، جوگرافیای دابەشبوونی کاندیدەکان لەسەر ئاستی هەژدە پارێزگاکەی عیراق دەریدەخات کەمترین ژمارەی کاندید لە سێ پارێزگاکەی هەرێمی کوردستان (هەولێرو سلێمانی و دهۆک)دایە.

 

ئارام جەمال پێیوایە هۆکارى کەمى کاندید دەگەڕێتەوە بۆ تێگەیشتنى حزبەکان لە سیستەمى نوێ و پەرتنەبوونى دەنگەکانیان.

 

دەشڵێت، ئەگەر لەماوەی کورتخایەندا یەکێک لە دەرهاویشتەکانی سیستمی هەڵبژاردنی تازە ئەوە بێت کە ژمارەی کاندیدەکان لە هەڵبژاردندا کەمبکاتەوە، ئەوا لەمەودای دووردا بەوەشەوە ناوەستێت و  لە چەند خولێکی دیکەدا، ژمارەی حزبەکانیش کەمدەکاتەوەو لە کۆتاییدا سیستمێکی دوو یان سێ حزبی دەهێنێتە ئاراوە.

 

دەقى شیکارییەکە:

 

بۆچی ژمارەی کاندید و حزبەکان لە هەڵبژاردنەکاندا کەمدەبنەوە؟

 

ئەگەر سەیری جوگرافیای دابەشبوونی کاندیدەکان بکەین لەسەر ئاستی هەژدە پارێزگاکەی عیراق، دەبینین کەمترین ژمارەی کاندید لە سێ پارێزگاکەی هەرێمی کوردستان (هەولێرو سلێمانی و دهۆک)دایە، بەم شێوەیەی خوارەوە:

May be an image of one or more people and text

پارێزگای هەولێر:

 

  • بە (٣ بۆ ٤) کاندید یەک کورسییان بەردەکەوێت.

 

  • لە کۆی (٥٣) کاندیدی (٤) بازنەکەی هەڵبژاردنی پارێزگای هەولێر:

 

- (٨) کاندیدیان تاکەکەسییەو رێژەکەی دەکاتە (١٥٪)ی کۆی ژمارەی کاندیدانی پارێزگاکە.

 

- (٤٥) کاندیدیان سەر بە حزب و هاوپەیمانێتییەکانن، کە رێژەکەی دەکاتە (٨٥٪)ی کۆی ژمارەی کاندیدانی پارێزگاکە.

 

- (١٨) کاندیدی ئافرەتەو هەر بازنەیەکی هەڵبژاردن (٤ بۆ ٥) کاندیدی ژنی بەردەکەوێت.

 

پارێزگای سلێمانی:

- بە (٣ بۆ ٤) کاندید یەک کورسییان بەردەکەوێت.

 

- لە کۆی (65) کاندیدی (٥) بازنەکەی هەڵبژاردنی پارێزگاکە:

 

(17) کاندیدیان تاکەکەسییەو رێژەکەی دەکاتە (٢٦٪)ی کۆی ژمارەی کاندیدانی پارێزگاکە.

 

(٤٨) کاندیدیان سەر بە حزب و هاوپەیمانێتییەکانن، کە رێژەکەی دەکاتە (٧٤٪)ی کۆی ژمارەی کاندیدانی پارێزگاکە.

 

- (٢٤) کاندیدی ئافرەتەو هەر بازنەیەکی هەڵبژاردن (٤ بۆ ٥) کاندیدی ژنی بەردەکەوێت.

 

پارێزگای دهۆک:

 

- بە (٢ بۆ ٣) کاندیدو نیوێک یەک کورسییان بەردەکەوێت.

 

- لە کۆی (٢٨) کاندیدی (٣) بازنەکەی هەڵبژاردنی پارێزگاکە:

(٨) کاندیدیان تاکەکەسییەو رێژەکەی دەکاتە (٢٩٪)ی کۆی ژمارەی کاندیدانی پارێزگاکە.

 

(٢٠) کاندیدیان سەر بە حزب و هاوپەیمانێتییەکانن و رێژەکەی دەکاتە (٧١٪)ی کۆی ژمارەی کاندیدانی پارێزگاکە.

 

(٧) کاندیدی ئافرەتەو هەر بازنەیەکی هەڵبژاردن (٢بۆ ٣) کاندیدی ژنی بەردەکەوێت..

May be an image of text

کەمی ژمارەی کاندیدانی پارێزگاکانی هەولێرو سلێمانی و دهۆک چەند ئاماژەیەکی لێدەخوێندرێتەوە:

 

١) نیشانەی تێگەیشتنی حزب و هاوپەیمانێتییەکانی هەرێمی کوردستانە لە سیستمی هەڵبژاردنە تازەکە.

 

٢) حزب و هاوپەیمانێتییەکانی هەرێم نایانەوێت دەنگەکانیان بەسەر ژمارەیەک کاندیدی زۆردا بڵاوببێتەوە.

 

٣) ژمارەی کاندیدی تاکەکەسی کەمەو بەمەش دەنگەکانیان بڵاونابێتەوەو دەرفەتی دەرچونیان زۆرتر دەکات ئەگەر هەماهەنگی لە نێوانیاندا هەبێت.

 

ماوەتەوە بڵێم ئەگەر لەماوەی کورتخایەندا یەکێک لە دەرهاویشتەکانی سیستمی هەڵبژاردنی تازە (یەکدەنگی نەگوێزراوە SNTV) ئەوە بێت کە ژمارەی کاندیدەکان لە هەڵبژاردندا کەمبکاتەوە (سەیری گرافیکی خولەکانی هەڵبژاردنەکانی عێراق بکە)، ئەوا لەمەودای دووردا ئەم سیستمە تازەیە بەوەشەوە ناوەستێت و  لە چەند خولێکی دیکەدا، ژمارەی حزبەکانیش کەمدەکاتەوەو لە کۆتاییدا سیستمێکی دوو یان سێ حزبی دەهێنێتە ئاراوە، دیارە ئەمەش پەیوەندی بە سروشتی خێزانی سیستمی هەڵبژاردنی زۆرینە/فرەییەوە هەیە، کە سیستمی هەڵبژاردنی "یەکدەنگی نەگوێزراوە"یەکێکە لە ئەندامانی ئەو خیزانە..