گه‌ڕان

Shadow Shadow
سیاسه‌تی

وردەکاریى

پارتێکى سیاسى بەشداریکردنى لە هەڵبژاردنى داهاتوو هەڵپەسارد

2021.05.09 - 21:07
App store icon Play store icon Play store icon
پارتێکى سیاسى بەشداریکردنى لە هەڵبژاردنى داهاتوو هەڵپەسارد

ناس کورد-

بەهۆى تیرۆرکردنى چالاکوانێک لە شارى کەربەلا، حزبى شیوعى عێراق بەشداریکردنى لە هەڵبژاردنى داهاتوو هەڵپەسارد و جەختلەوەشدەکاتەوە، سەرەڕاى ئەوەى چالاکوانەکە بەهێزە ئەمنییەکانى ڕاگەیاندبوو کە هەڕەشەى کوشتنى لەسەرە بەڵام هیچ پاراستنێکى بۆ دابین نەکرابوو.

 

کەناڵی ناس کورد لە تێلیگرام جۆین بکە   

 

حزبى شیوعى عێراق (9ى ئایارى 2021) لەبەیاننامەیەکدا بڵاویکردووەتەوە، تیرۆرکردنى چالاکوانى مەدەنى "ئیهاب وەزەنى" گەلەکەمانى لە ناخەوە هەژاند بەتایبەتى کە لەلایەن گروپى "چەکە بێدەنگەکان"ى سەربە گروپە چەکداریەکان تیرۆر کرا، ئەوەش دواى ماوەیەکى کەم لەوەى کە بە ئاشکرا وتى، هێزە ئەمنییەکانى کەربەلاى ئاگادارکردووەتەوە لەوەى کە هەڕەشەى تیرۆرکردنى لەسەرە، بەڵام هیچ پاراستنێکى بۆ دابین نەکرا و هەر ئەوەش بوو کە تیرۆر کرا.

 

ڕونیشکراوەتەوە، ئەو تاوانە دژى دەنگە ئازادەکان بوو کە لەلایەن ئەو گروپانەوە ئەنجام درا کە بە ئازادى دەسوڕێنەوە و چالاکییە تاوانکارییەکانیان دژى چالاکوانان و خۆپیشاندەران و شۆڕشگێڕان ئەنجام دەدەن کە زنجیرەیەکى تیرۆرکردنیان ئەنجامداوە بەبێ ئەوەى بەرپەرچ بدرێنەوە.

 

باس لەوەشکراوە، ئەوەش شکستهێنانى حکومەت و دەزگا ئەمنییەکان پیشان دەدات کە نەک تەنها بەڵێنەکەیان بۆ دۆزینەوە و لێپرسینەوە لە بکوژان نەبردە سەر بەڵکو نەیانتوانیوە ڕێگر بن لەوەى قوربانى زیاتر نەکەوێتەوە، لەم کەشە پڕ لە مەترسییەدا چیتر قسە لەسەر کەشێکى گونجاو بۆ ئەنجامدانى هەڵبژاردنێکى پاک و ئازادانە کە ڕێگە بە دەنگدەر و پاڵێوراو بدات بیروبۆچونى خۆیان بە ئازادى و لە ئاشتیدا دەربڕن تەنها خەیاڵە.

 

حزبى شیوعى عێراقى جەختیلەوەشکردووەتەوە، بۆیە بەشداریکردن لە هەڵبژاردن هەڵدەپەسێرن تا ئەو کاتەى حکومەت و دەسەڵاتى یاسادانان ڕێوشوێنى یەکلاکەرەوە و جدى دەگرنەبەر بۆ سنوردانان بۆ ئەو زنجیرە تیرۆرکردن و تاوانانەى ئەنجام دەدرێن، ئەویش بە دەستکردن بە ئاشکراکردنى بکوژانى خۆپیشاندەران و ئەوانەى لە پشتیانەوە دەوەستن، بەتایبەتى شەهید ئیهاب وەزەنى کە تائێستاش خوێنى ڕژاوى گەرمە، هەروەها پێویستە بدرێن بە دادگا و کۆتایى بە چەکى دەرەوەى یاساى تیمەکانى تیرۆرکردن بهێنرێن.

 

داواش لە چالاکوانان و شۆڕشگێڕانى ئاشتى  و سەرجەم هاوڵاتیان دەکەن، بە هەموو شێوەکان پەستان لەسەر حکومەت و پەرلەمان دروست بکەن بۆ ئەوەى هانیان بدەن ئەرکى خۆیان بەجێبهێنن و ڕوبەڕوى گروپە چەکداریە یاخیبووەکان و چەکى دەرەوەى یاسا ببنەوە.

 

تیرۆرکردنى چالاکوان ئیهاب وەزەنى" هەرایەکى گەورەى لە شەقامى عێراقیدا دروستکرد و جارێکى تر خۆپیشاندانەکانى دەستپێکردەووە و دەنگە ناڕازییەکان بەرزبوونەوە، لەلایەکى ترەوە جوڵانەوەى ماڵى عێراقى بانگەوازى بۆ بایکۆتکردنى خۆپیشاندانەکان کردووە و حزبى "یەکێتى عێراقى بۆ کار و ماف"یش لاى خۆیەوە بایکۆتکردنى هەڵبژاردنى داهاتووى ڕاگەیاندووە، هەروەها هەڵمەتێکى فراوانى هاوڵاتیان و چالاکوانان و خۆپیشاندەران بۆ بایکۆتکردن دەستى پێکردووە.

 

هەر لەو چوارچێوەیەشدا، فایەق شێخ عەلى ئەندامى پەرلەمانى عێراق کشانەوەى لەبەشداریکردن لە هەڵبژاردنى پێشوەختەى پەرلەمانیى راگەیاند، وەک ناڕەزاییەک بەرانبەر تیرۆرکردنى چالاکوانان.