گه‌ڕان

Shadow Shadow
سیاسه‌تی

پارتی لە کەیسی سزادراوانی بادیناندا هەڕەشە دەکات: ئێمەش زۆر بابەت هەیە باسی دەکەین

2021.05.08 - 13:45
App store icon Play store icon Play store icon
پارتی لە کەیسی سزادراوانی بادیناندا هەڕەشە دەکات: ئێمەش زۆر بابەت هەیە باسی دەکەین

ناس کورد-

مەکتەبی سیاسیی پارتی لەبارەى دۆسیەی سزادراوانی بادینانەوە دەڵێت، ئەگەر هەوڵەكان بەو ئاڕاستەیە بن بابەتەكان بە سیاسی بكرێن و زیاتر وەكو بانگەشەی هەڵبژاردن و چەواشەكاری بخرێنە بەرچاوی هاوڵاتیان، ئەوە "ئێمەش لە پارتی دیموكراتی كوردستان زۆر بابەت هەیە باسیان بكەین."

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا کە مەکتەبی سیاسیی پارتی بڵاوکردووەتەوە و کۆپییەکی دەستی "ناس کورد" کەوتووە (8ی ئایاری 2021) دەڵێت، "سەبارەت بە بڕیاری دادگای پێداچوونەوە لە بارەی كەیسی چەند كەسێك، بەداخەوە چەند لایەنێك كاردانەوەی دوور لە ڕەچاوكردنی سەروەری یاسا و ڕێساكانی دەسەڵاتی دادوەریان نیشان دا، بەپێویستی دەزانین رێز لە دام و دەزگاكانی دادوەری و سەروەری یاسا بگیرێت، دەستوەردان لە كاروباری دادگاكان و بەسیاسی كردنی بابەتەكان سوود بە بارودۆخەکە ناگەیەنێ‌ و، مەرج نییە ئەگەر رەئی و لایەنگیری لایەنێك نەبوبێتە بڕیار مانای راست نەبوونی بڕیارەكان بێت."

 

دەشڵێت، ئەوەی ڕوویداوە ڕوونە، دوای لێكۆڵینەوەی یاسایی لەلایەن لایەنە یاسایی و پەیوەندارەكان بە پشت بەستن بەو بەڵگانەی بەردەستیان هەوڵی چەند كەسێكە بۆ تێكدانی سەقامگیری و، ئاسایشی هەرێمی کوردستان كراوەتە ئامانج، "بۆیە باشترە لێگەڕێین دامەزراوە یاساییەكان كاری خۆیان بكەن و ڕێز لە ڕۆڵیان بگرین."

 

مەکتەبی سیاسیی پارتی هەڕەشە دەکات و دەڵێت، "ئەگەر هەوڵەكان بەو ئاڕاستەیە بن بابەتەكان بەسیاسی بكرێن و زیاتر وەكو بانگەشەی هەڵبژاردن و چەواشەكاری بخرێنە بەرچاوی هاوڵاتیان، ئێمەش لە پارتی دیموكراتی كوردستان زۆر بابەت هەیە باسیان بكەین."

 

جەختی کردووەتەوە کە "هیوادارین ئاڕاستە و لۆژیكی پاراستنی سەقامگیری و ئاسایشی هەرێمی کوردستان لە پێشەوەی هەموو هەوڵێكی دیكەوە بن."

 

لە ڕۆژانی ڕابردوودا لەسەر دۆسیەی شەش ڕۆژنامەنوس و چالاکوان کە پێشتر دەستگیرکرابوون و سزای شەش ساڵ زیندانیایان بۆ دیاریکرا بەتۆمەتی هەبوونی پەیوەندی لەگەڵ وڵاتان و جاسوسی، دۆسیەکەیان لە دادگای پێداچوونەوە بوو بەڵام لەلایەن ئەو دادگەیەوە سزاکەیان ڕەت نەکرایەوە و پەسەندکراو، دەبێت دۆسیەکە ڕەوانەی سەرۆکایەتی هەرێم بکرێت بۆ واژۆکردنی، بۆ ئەوەش داوا دەکرێت لەلایەن نیچیرڤان بارزانی، سەرۆکی هەرێمی کوردستان سزاکە واژۆ نەکرێت و ڕەت بکرێتەوە.


لەسەر ئەم پرسەش نیگەرانی زۆر دروستبووە و لایەنە سیاسییەکانی هەرێمی کوردستان بێ هەڵوێست نەبوون و داوای ئازادکردنیان دەکەن و تەنها پارتی دیموکراتی کوردستان بە تۆمەتباری سزادانی ئەو ڕۆژنامەنوسانەش دیاریدەکرێت.