گه‌ڕان

Shadow Shadow
سیاسه‌تی

مەسرور بارزانی پەیوەندی بە مستەفا کازمییەوە کرد

2021.04.25 - 12:03
App store icon Play store icon Play store icon
مەسرور بارزانی پەیوەندی بە مستەفا کازمییەوە کرد

ناس کورد-

مەسرور بارزانی، سەرۆکی حکومەتی هەرێمی کوردستان پەیوەندیی بە مستەفا کازمی، سەرۆک وەزیرانی عێراقەوە کرد و هاوخەمی خۆی بۆ کەسوکاری قوربانیانی ڕووداوی ئاگرکەوتنەوەکەى نەخۆشخانەی "ئیبن خەتیب" دەربڕی.

کەناڵی ناس کورد لە تێلیگرام جۆین بکە   

 

بەپێی ماڵپەڕی حکومەتی هەرێم، ئەمڕۆ یەکشەممە (25ی نیسانی 2021) مەسرور بارزانی لە پەیوەندییەکی تەلەفۆنیدا لەگەڵ مستەفا کازمی "پرسە و هاوخەمی خۆی بۆ کەسوکاری قوربانییانی ڕووداوی دڵتەزێنی نەخۆشخانەی ( ابن الخطيب)ی بەغدا دەربڕی و ئامادەیی دامودەزگاکانی حکومەتی هەرێمی کوردستانیشی بۆ پێشکەشکردنی هەموو جۆرە هاوکاریی و یارمەتییەک ڕاگەیاند و هیوای خواست، کارەساتی وا دووبارە نەبێتەوە."

 


دەشڵێت، "سەرۆک وەزیرانی فیدراڵ سوپاس و پێزانینی خۆی بۆ هاوخەمی و پەرۆشی سەرۆکی حکومەتی هەرێمی کوردستان دەربڕی."

 

هاوکات ڕێکخراوی مافی مرۆڤ لە عێراق ڕایگەیاند، بەپێی دواین ئاماری ڕووداوەکە، 58 کەس مردوون و ژمارەیەکی زیاتریش بریندار بوون.

 

درەنگانی شەوی ڕابردوو لە شاری بەغدا ئاگر لە نەخۆشخانەی ئیبن خەتیب کەوتەوە و چەند بووتڵێکی ئۆکسیجینی نەخۆشخانەکەش بەهۆی ئاگرەکەوە تەقیونەتەوە، تائیستا ئاماری فەرمی لەلایەن وەزارەتی تەندروستییەوە ڕانەگەیەنراوە.

 

هەر زوو، مستەفا کازمی، سەرۆک وەزیرانی عێراق فەرمانیکرد، سەرجەم بەرپرسانی نەخۆشخانەکە دەستبەسەربکرێن و قوربانییەکانی ڕووداوەکەش بە پلەی شەهید هەژماربکرێن، ڕاشیگەیاند، دەبێت هۆکاری ڕووداوەکە لە ماوەی 24 کاتژمێردا ئاشکرابکرێت و ئەوانەشی کەمتەرخەم بوون لێپێچینەوەی تووندیان لەگەڵدا بکرێت.