گه‌ڕان

Shadow Shadow
سیاسه‌تی

زانیاریی زیاتر

کازمی فەرمانیکرد سەرجەم بەرپرسانی نەخۆشخانەکەی بەغدا دەستگیربکرێن

2021.04.25 - 08:51
App store icon Play store icon Play store icon
کازمی فەرمانیکرد سەرجەم بەرپرسانی نەخۆشخانەکەی بەغدا دەستگیربکرێن

ناس کورد-

لەدوای کەوتنەوەی ئاگرەکەی نەخۆشخانەی ئیبن خەتیب لە بەغدا، سەرۆک وەزیرانیی عێراق فەرمانیکرد، سەرجەم بەرپرسانی نەخۆشخانەکە دەستبەسەربکرێن و قوربانییەکانی ڕووداوەکەش بە پلەی شەهید هەژماربکرێن، ڕاشیگەیاند، دەبێت هۆکاری ڕووداوەکە لە ماوەی 24 کاتژمێردا ئاشکرابکرێت و ئەوانەشی کەمتەرخەم بوون لێپێچینەوەی تووندیان لەگەڵدا بکرێت.

کەناڵی ناس کورد لە تێلیگرام جۆین بکە   

 

درەنگانی شەوەی ڕابردوو لە شاری بەغدا ئاگر لە نەخۆشخانەی ئیبن خەتیب کەوتەوە و چەند بووتڵێکی ئۆکسیجینی نەخۆشخانەکەش بەهۆی ئاگرەکەوە تەقیونەتەوە کە بەهۆیەوە بەپێی زانیارییە سەرەتاییەکان سێ کەس گیانیان لەدەستداوە.

 

مستەفا کازمی، سەرۆکوەزیرانی عێراق ( 25ی نیسانی 2021) بەرەبەیانی ئەمڕۆ لە کۆبوونەوەیەکی بەپەلەدا لەبارەی ڕووداوەکەوە، ڕایگەیاند، " ئاگرکەوتنەوە لەنەخۆشخانەکە کارەساتێکی دڵتەزێنە، بۆیە پێویستی بەوە کرد بەم بەیانی  زووە کۆبینەوە، فەرمانمان کردووە قوربانییەکانی ڕووداوەکە بە پلەی شەهید هەژماربکرێن و بریندارەکانیش لە ناوەوە و دەرەوەی عێراق چارەسەریان بۆ بکرێت".

 

وتیشی، " رووداوەکە پەیوەستە بە ئاسایشی نیشتیمانی وڵاتەوە و نابێت بە ئاسانی تێپەرێت، بۆیە فەرمانمان کردووە بەرپرسانی نەخۆشخانە هەموویان دەستبەسەر بکرێن و دەستبەجێ دەست بکرێت بە لێکوڵێنەوەیەکی گشتگیر و فراوان".

 

سەرۆک وەزیرانی عێراق ئاماژەی بەوەشکرد، " دەبێت تیمێکی هونەری لە هەموو وەزارەتە پەیوەندیدارەکان پێکبهێنرێت بۆ وردبینی لە ڕێکارەکانی سەلامەتی لە هەموو نەخۆشخانەکان، میوانخانەکان و شوێنە گشتییەکان لەماوەی یەک هەفتە و لەسەرەتاسەری عێراقدا".

 

کازمی داواشی کرد ئەنجامی لێکۆڵێنەوەکان لەماوەی 24 کاتژمێردا ئاشکرا بکرێت وئەوانەشی کەمتەرخەمبوون بەتووندی سزابدرێن .

 

بەڕێوەبەرایەتی بەرگریی شارستانی عێراقیش،  لەراگەیێندراوێکدا رایگەیاند، "ئاگرەکە هێندە گەورە بوو زیاتر لە 20 تیمی ئاگرکوژێنەوە بەشداربوون لە کوژاندنەوەی، ئێستاش هەوڵەکانی بەرگری شارستانی بەردەوامن بۆ تەواو کوژاندنەوەی ئاگرەکە و دەرکردنی نەخۆشە خەوێندراوەکان لە نەخۆشخانەکە."

 

بەگوێرەی زانیارییە سەرەتاییەکان بەهۆی رووداوەکەوە تائێستا سێ کەس گیانیان لەدەستداوە و 13 کەس دیکەش تووشی کێشەی هەناسەدان بوون و دۆخی ژمارەکەیان ناجێگیرە.