گه‌ڕان

Shadow Shadow
سیاسه‌تی

ڕاستی ڤیدیۆی ’’بەقاچاخبردنی ڤاکسینی ڤایزەر لە کوردستانەوە بۆ ئێران’’

2021.04.21 - 13:40
App store icon Play store icon Play store icon
ڕاستی ڤیدیۆی ’’بەقاچاخبردنی ڤاکسینی ڤایزەر لە کوردستانەوە بۆ ئێران’’

ناس کورد-

تۆڕى هەواڵى بی بی سی فارسی مشتومڕەکانى لەبارەى ئەو گرتە ڤیدیۆییەوە یەکلاکردەوە کە بەناوى ئاژانسەکەوە بڵاوکرابووەوە لەبارەى بەقاچاخبردنى ڤاکسینى ڤایزەر لە هەرێمەوە بۆ ئێران، هەرچەندە تەندروستیی هەرێم رەتی دەکاتەوە.

کەناڵی ناس کورد لە تێلیگرام جۆین بکە   

 

 

 

لەدوێنێ سێشەممەوە گرتەیەکى ڤیدیۆیی لە تۆڕە کۆمەڵایەتییەکان بەناوى بەشی فارسی بی بی سییەوە دەستاودەست دەکرێت لەبارەى بەقاچاخبردنى ڤاکسینى ڤایزەر لە هەرێمەوە بۆ ئێران، بەڵام تا نیوەڕۆى ئەمڕۆ ڤیدیۆکە لە هەژمار و پێگەى فەرمى کەناڵەکە بوونى نەبوو.

 

ناس کورد لەرێگەى نامەوە پەیوەندیکرد بە کەناڵى بی بی سی یەوە لەبارەى راستى و دروستى ڤیدیۆکە، دواتریش بی بی سی ڤیدیۆکەى لەسەر هەژمارى فەرمى خۆى لە فەیسبوک بڵاوکردەوە.

 

ڤیدیۆکە کە ماوەکەى یەک خولەک و 27 چرکەیە، باس لە بەقاچاخبردنى ڤاکسینى جۆرى ڤایزەر دەکات لە هەرێمەوە بۆ ئێران.

 

بی بی سی فارسی لەسەر ڤیدیۆکە نوسیویەتی، "بڵاوبوونەوەى گرتەی ڤیدیۆیی کردنەوەى ڤاكسینی ڤایزەر له ئێران كاردانەوەی زۆری هەبووە."

 

دەشڵێت،  "بەپێی ئەو زانیارییانەى کە لەلایەن بی بی سی فارسییەوە پشتڕاستکراوەتەوە ڤاکسینی ڤایزەر لە عێراقەوە هاتووەتە ناو ئێرانەوە. بەپێی سەرچاوەیەکی ئاگادار، هەر یەکێک لەو بەرادانە شەش ژەم ڤاکسینی تێدایە کە بە هەزاران دۆلار لە بازاڕی ڕەش فرۆشراون."


بی بی سی لە زاری کیانوش جهانپور، وتەبێژی دامەزراوەى خۆراک و دەرمانی ئێران دەڵێت، ناتوانرێت ڕاستی ڤیدیۆکە پشتڕاست بکرێتەوە بەڵام لەوانەیە ڤاکسینەکە بچێتە ناو ئێرانەوە."

 

لاى خۆیەوە، وەزارەتى تەندروستى حکومەتى هەرێم ئەمڕۆ چوارشەممە ڕەتی کردەوە ئەو ڤاکسینە بەقاچاخ برابێتە ئێران.

 

ڕەهێڵ فەرەیدوون، بریکارى وەزارەتى تەندروستى ئەمڕۆ چوارشەممە بە "ناس کورد" ى راگەیاند، ئەو ڤاکسینانەى لەبەغداوە هێنراون بە ناو و ژمارەى ئەوانەى وەریدەگرن دەدرێنەوە بەبەغدا.

 

وتیشى، "لەلایەن ئێمەوە بەهیچ شێوەیەک ئەوە نەکراوە و دزەى پێنەکراوە بۆ شوێنى تر، بەتایبەتى ڤاکسینى ڤایزەر کە رێوشوێنى پاراستنى توندوتۆڵە".

 

رەهێڵ فەرەیدوون باسى لەوەشکرد، هەموو ئەو بڕە ڤاکسینانەى بەکارهێنراوە تۆمارکراون و مۆرى فەرمى لێدراوە.