گه‌ڕان

Shadow Shadow
سیاسه‌تی

زانیاریی زیاتر

پەرلەمانتارێکی گۆڕان: پارتیبوون پەتا و واهیمەیە

2021.04.20 - 21:25
App store icon Play store icon Play store icon
پەرلەمانتارێکی گۆڕان: پارتیبوون پەتا و واهیمەیە

ناس کورد- 

کاوە محەمەد، پەرلەمانتاری هاوپەیمانیی هیوا لە فراکسیۆنی گۆڕان لە پەرلەمانی عێراق پشتیوانی خۆی بۆ قسەکانی ئاڵا تاڵەبانی لەسەر "مەرجەع نەبوونی مەسعود بارزانی" دەربڕی و ڕایگەیاند، بەشێک لەپارتییەکان خۆیان تووشی ئەو واهیمەیە کردووە و چەندیش هەوڵیناتوانن بیکەن بە ڕاستی، دەشڵێت، پارتیبوون پەتایەکە و رێگە بەوە نادات ئەو بەشە لەئەندام و کادیرانی، لەو واهیمەیە رزگاریان بێت.

کەناڵی ناس کورد لە تێلیگرام جۆین بکە   

 

لە ڕاگەیەنراوێکدا کاوە محەمەد، ئەندامی هاوپەیمانیی هیوا لە پەرلەمانی عێراق(سێشەممە 20ی نیسانی 2021) ڕایگەیاند، "سەرەڕای جیاوازیی حزبیمان و ناکۆکبوونمان لەهەندێ جار و پرس-دا، بەڵام ئاڵا تاڵەبانی بۆ من هەمیشە خوشکێکی ئەزیز بووە و لەزۆر کات و قۆناغدا بەیەکەوە کارمانکردووە و هاوهەڵێستی یەکتربووین." 

 

ئاماژەی بەوەشکردووە، "دوایین هەڵوێستی ئاڵا تاڵەبانی سەبارەت بە مەرجەع نەبوونی مەسعود بارزانی بۆ هەموو هەرێمی کوردستان؛ تەنها باسکردنی ڕاستییەکە کە لەخۆر درەوشاوەترە و بەشێک لەپارتییەکان خۆیان تووشی ئەو واهیمەیە کردووە و چەندیش هەوڵی بۆ دەدەن نەک ناتوانن بیکەن بە ڕاستی، بەڵکو هەڵسوکەوتی تەسکی حزبیانەی سەرۆکی حزبەکەیان، رۆژ بەڕۆژ زیاتر ئەو قسەیەی ئەو و ئێمە و زۆرانی دیکەش دەسەلمێنێت، بەڵام پارتیبوون پەتایەکە و رێگە بەوە نادات ئەو بەشە لەئەندام و کادیرانی، لەو واهیمەیە رزگاریان بێت." 

 

ئەوەشی خستووەتەڕوو، " جگە لەوەش پەراوێزخستنی دامەزراوەکان، کە بەدرێژایی دەیان ساڵی رابردوو، بۆتە پێناسێکی زەقی پارتی و کارکردن بۆ مەرجەعکردنی تاکە کەسێک، مەترسییەکی گەورەی دیکەیە بۆ سەر سەروەریی یاسا و دامەزراوەکان و رێک ئەمە بەشێکە لەپیشەسازیی دروستکردنی دیکتاتۆر کە زۆر لەوڵاتانی ناوچەکە و دنیا بەهۆیەوە دووچاری ماڵوێرانی و کارەساتی گەورەبوون." 

 

کاوە محەمەد باسی لەوەشکردووە، "لەهەموو ئەوانەش ناشیرینتر، ئەوەیە کە کەناڵێکی سووکی میدیایی پارتی بێت و پەلاماری کەسێتیی و ژنێتیی پەرلەمانتارێکی وەک  ئاڵا تاڵەبانی بدات و بێرێزی بەرامبەر بکات، ئەو مێنتاڵێتییە ئاستنزم و بێ مۆڕاڵەی لەپشت ئەو کەناڵە و کەناڵەکانی دیکەی هاوشێوەیەتی و رۆژانە و شەوانە پەلاماری ئێمەی پەرلەمانتارانی رەخنەگر و چالاکوان و رۆژنامەنووسان دەدەن و بەردەوام ناو و ناتۆرەمان بۆ دەهۆننەوە، باشترین بەڵگەیە کە نە پارتی ئەو حزبەیە بە قەد ساڵانی تەمەنی و ژمارەی کورسییەکانی لەپەرلەمان سەنگین بێت و نە سەرۆکەکەیشی هی ئەوەیە ببێت بە مەرجەعی هەموو هەرێمی کوردستان." 

 

ئەو پەرلەمانتارە ئاماژەی بەوەشكردووە،"بۆیە لێرەوە پشتیوانی خۆم بۆ قسەکانی ئاڵا تاڵەبانی دەردەبڕم و هیوادارم ئەمەش تەنها هەڵوێستی ئەو و بەشێکی یەکێتی نەبێت، بەڵکو هی هەموو یەکێتییەکان بێت، چونکە ئەمە پرسێکی ترسناکە و هەر کەس و حزبێک خۆی بە دیموکرات و ئازادیخواز بزانێت، دەبێت دژی بوەستێتەوە و بە هەموو توانایەک رێگری لێ بکات." 

 

لە ماوەی ڕابردوودا ئاڵا تاڵەبانی، سەرۆکی فراکسیۆنی یەکێتی لە پەرلەمانی عێراق ڕەتیکردەوە، مەسعود بارزانی، سەرۆکی پارتی دیموکراتی کوردستان بە مەرجەعی کورد بزانێت. 

 

قسەکانی ئاڵا تاڵەبانی، کاردانەوەی توندی میدیای پارتی بەدوای خۆیدا هێنا و هێرشێکی میدیایی توندیان کردەسەر ناوبراو، ئەوەش کاردانەوەی جیاوازی لێکەوتەوە و تائێستاش کاردانەوەکان بەردەوامن. 

 

لە نوێترین کاردانەوەشدا، قوباد تاڵەبانی، جێگری سەرۆکی حکومەتی هەرێم پشتیوانی خۆی بۆ ئالا تاڵەبانی ڕاگەیاند و لە بڵاوکراوەیەکدا ئاماژەی بەوەکرد، "ناكۆكییە سیاسییەكان چەندە قوڵ و فراوان بن، بۆچوون و تێبینییەکانمان چەندە دوور و دژبەیەك بن، نابێت ببنە بیانوو و بەھانە بۆ بێ ئەدەبی و تێپەڕاندنی سنورەكانی ئەخلاق، لەوەش خراپتر ئەو عەقڵییەتەیە کە بە بیانووی ناکۆکی سیاسی هێرش دەکاتە سەر کەسێتیی و جەستەی ژنە سیاسییەک."