گه‌ڕان

Shadow Shadow
سیاسه‌تی

ڤیدیۆکەى ببینە

’’ڕێزى خۆت بگرە با نەتکەمە دەرەوە’’.. گرژى نوێ لە کۆبوونەوەى پەرلەمان دروستبوو

2021.04.07 - 12:16
App store icon Play store icon Play store icon
’’ڕێزى خۆت بگرە با نەتکەمە دەرەوە’’.. گرژى نوێ لە کۆبوونەوەى پەرلەمان دروستبوو

ناس کورد-

لە دانیشتنى پەرلەمانى کوردستادا گرژى لەنێوان سەرۆکى پەرلەمان و فراکسیۆنى نەوەى نوێدا دروستبوو، لەبارەى بڕیارى رێگریکردن لە کازم فاروق سەرۆکى فراکسیۆنەکە بۆ بەشداریکردنى لەدانیشتنەکانى پەرلەمان.

کەناڵی ناس کورد لە تێلیگرام جۆین بکە   

 

لە کۆبوونەوەکەدا چەند پەرلەمانتارێکى نەوەى نوێ داواى هەڵوەشاندنەوەى بڕیارەکەیان کرد، بەڵام سەرۆکى پەرلەمان جەختیکردەوە بەدەنگدانى پەرلەمان نەبێت ناتوانن بڕیارەکە هەڵبوەشێننەوە.

 

هەروەها داواشى لە فراکسیۆنى نەوەى نوێ کرد لۆبى بکەن بۆ هەڵوەشاندنەوەى بڕیارەکە، جەختیشکردەوە تا کازم فاروق داواى لێبوردن نەکات رێگەى پێنادرێت بەشدارى دانیشتنەکان بکاتەوە.

 

قسەکانى سەرۆکى پەرلەمان پەرلەمانتارەکانى نەوەى نوێی رازینەکرد، مژدە مەحمود پەرلەمانتارى فراکسیۆنەکە جەختى لە هەڵوەشاندنەوەى بڕیارەکە کردەوە، سەرۆکى پەرلەمانیش پێی وت "ڕێزى خۆت بگرە، حەزناکەم بتکەمە دەرەوە".

ڕۆژی 31ی ئازاری 2021، کازم فاروق پێڵاوى گرتە ڕێواز فایەق، سەرۆکى پەرلەمان دواى ئەوەى سەرۆکى پەرلەمان نەیهێشت قسەکانى تەواو بکات. هەر دوای ئەو ڕووداوە، پەرلەمانی کوردستان بە دەنگی 73 پەرلەمانتار بڕیاری دا بە سزادانی کازم فاروق بە بێبەشکردنی لە بەشداریی دانیشتنەکان تا داواى لێبوردن دەکات.

 

کازم فاروق ئەمڕۆ دواى رێگریکردنى بۆ بەشداریکردن لەکۆبوونەوەکە وتى "پۆلیسەکانی بەردەم باڵەخانەکەی پەرلەمان وتویانە کە فەرمانیان بۆ هاتووە تا نەهێڵن بچێتە ژوورەوە."


وتیشی، "من نوێنەری خەڵکی دهۆک، هەولێر و سلێمانی و شوێنەکانی دیکەم، سەرۆکایەتی پەرلەمان مافی ئەوەی نییە رێگریم لێبکات".



باسی لەوەشکرد، حزبەکانی دەسەڵات "ئەم وڵاتەیان وێرانکردووە" کەچی رێگە لە چوونەژوورەوەیان دەگرن و دەشڵێت، "هاوڕێکانم لە ژوورەوە سەرسەختانە بەرگری لە خەڵکی دەکەن".



ئەوەشی وت، "سەرۆکایەتی پەرلەمان دەبێت تاوەکو رۆژی قیامەت چاوەڕێی ئەوەبن داوای لێبوردنیان لێبکەم".



وتیشی، رێگریکردن "لە چوونەژوورەوەی بۆ ناو باڵەخانەی پەرلەمان لە پەیڕەوی ناوخۆدا نەهاتووە، بڕیارەکەی ئەوان بۆ ئەوەیە بەشداری دانیشتنەکان نەکەم، نەک هەر مافی چوونەژوورەوەم نەبێت بۆ ناو باڵەخانەکەش".