گه‌ڕان

Shadow Shadow
سیاسه‌تی

وردەکاریی

’’سەرۆکایەتی هەرێم دانی پێدادەنێت کە حزبەکان ڕێگرن لە جێبەجێکردنی چاکسازی’’

2021.04.06 - 18:03
App store icon Play store icon Play store icon
’’سەرۆکایەتی هەرێم دانی پێدادەنێت کە حزبەکان ڕێگرن لە جێبەجێکردنی چاکسازی’’

ناس کورد-

لیژنەی کاروباری پێشمەرگە و سەرۆکایەتی هەرێم کۆبوونەوە و ئەندامێکی لیژنەکەش دەڵێت، ئەمەریکا و هاوپەیمانان فشاریان بۆ هەرێم هێناوە بۆ ڕێکخستنەوەی هێزە چەکدارەکان، بەڵام سەرۆکایەتی هەرێم دانی پێداناوە کە حزبەکان ڕێگرن لە یەکگرتنەوە و چاکسازیکردن، دەشڵێت، ژمارەی هێزی چەکداری هەرێم لە 17 وڵاتی ئەندامی ناتۆ زیاترە.

کەناڵی ناس کورد لە تێلیگرام جۆین بکە   

 

ئەمڕۆ سێشەممە 6ی نیسانی 2021، لیژنەی کاروباری پێشمەرگە لە پەرلەمانی کوردستان لەبارەی کێشەکانی (بندیواری، چاکسازیکردن، خواردنی هێزەکانی پێشمەرگە، جیاوازی دەوام و چەند پرسێکی دیکە) لەگەڵ سەرۆکایەتی هەرێمی کوردستان کۆبووەوە. 

 

ئەبوبەکر هەڵەدنی، ئەندامی لیژنەکە لە لێدوانێکدا بە "ناس کورد"ی ڕاگەیاند، "کۆبوونەوەکە بۆ بەدواداچوون بووە لەسەر ئەو کێشانەی پێشمەرگە بەتایبەت ڕێکخستنەوەی هێزەکانی پێشمەرگە و چاکسازیکردن تیایدا، چونکە ژمارەیەکی زۆر پێشمەرگەی بندیوار هەن دەوام ناکەن و موچەکانیان لەگەڵ فەرماندەکانیان بەش دەکەن، پێشمەرگەی ڕاستەقینەش دەبێت دەوامەکانیان بکەن."

 

وتیشی، "ناکرێت هەرێمێکی چوار پارێزگایی زیاتر لە 400 هەزار هێزی چەکداری هەیە کە لە ژمارەی هێزە چەکدارەکانی 17 وڵاتی ئەندامی ناتۆ زیاترە، بەڵام تائێستا خاوەنی هێزێکی ڕێکخراو نییە و دەیان هێزی لەژێر چەندین ناوی جیاوازدا هەیە و هەریەکێک لەو هێزانە فەرمان لە کەسێک و لایەنێک وەردەگرن."

 

هەڵەدنی ئاماژەی بەوەشکرد، "لە کۆبوونەوەکەدا سەرۆکایەتی هەرێم دانیان بەوەدانا کە چەندین کێشەی زیاتر لەو کێشانە بوونیان هەیە و حزبەکانیش ڕێگرن لە یەکگرتنەوەی هێزەکان و ڕێکخستنەوە و چاکسازیکردن تێیدا."

 

"یاسای چاکسازی نەک لەسەر پشتی کیسەڵ لەسەر، بەڵکو لەسەر پشتی مێرولە دەڕوات و هیچ چاکسازییەک لە ناو هێزەکانی پێشمەرگە دەستیپێنەکردووە و وەک وتم، سەرۆکایەتی هەریمیش دان بەوەدا دەنێن حزبەکان ڕێگرن لە ئەنجامدانی چاکسازی، چونکە بەرژەوەندی خۆیان و بەرپرسەکانیانی تێدایە."، هەڵەدنی وادەڵێت.

 

باسی لەوەشکرد، "لەئێستادا هاوپەیمانان فشارێکی زۆریان بۆسەر حکومەت دەستپێکردووە و وتوویانە هاوکاریکردن و ناردنی پارەی پێشمەرگە بەندە بە چاکسازیکردن و یەکخستنەوەی سەرجەم هێزە چەکدارەکان، بۆیە بڕیارمانداوە ئەم کۆبوونەوانە بەردەوام بن."

 

جەختیشیکردەوە، "بەدواداچوونەکانمان لەوبارەیەوە و بەردەوام دەبێت، هەروەها هەوڵدەدەین فشار بکەین بۆ باشکردنی خواردن و جلوبەرگ و چەکی پێشمەرگە و هەروەها یەکسانکردنی دەوامەکانیان، جگە لەوەی داوامان کردووە گۆڕانکاری لە پێوەرەکانی شەهیدی پێشمەرگە بکرێت."

 

لەم خولەی پەرلەمانی کوردستان، یاسای چاکسازی پەسەندکرا و حکومەتی هەرێمی کوردستانیش یاساکەی خستەبواری جێبەجێکردنەوە و بەگوێرەی یاساکە چاکسازی لە ڕیزەکانی هێزەکانی پێشمەرگە دەکرێت و موچەی بندیوارەکان دەبڕدرێت.