گه‌ڕان

Shadow Shadow
سیاسه‌تی

موچە بە دۆلار

دارایی پەرلەمان مشتومڕی دابەشکردنی موچەی بە دۆلار یەکلاییکردەوە

2021.04.04 - 09:21
App store icon Play store icon Play store icon
دارایی پەرلەمان مشتومڕی دابەشکردنی موچەی بە دۆلار یەکلاییکردەوە

ناس کورد-
لیژنەی دارایی پەرلەمان وەڵامی پێشنیازی دابەشکردنی موچەی بە دۆلار دایەوە و دەڵێت، حکومەت پابەند نییە بە پێشنیازی پەرلەمانتارانەوە، ڕاوێژکاری سەرۆک وەزیرانییش بۆ کاروباری ئابوری جەخت دەکاتەوە کە ئەوە کارێکی "عەیبەیە" و زیان بە ئابوری وڵات دەگەیەنێت.

کەناڵی ناس کورد لە تێلیگرام جۆین بکە   

 

عەدنان زورفی، ئەندامی لیژنەی دارایی پەرلەمانی عێراق بە ڕۆژنامەی سەباحی فەرمی وتووە، "حکومەت پابەند نییە بە پێشنیازەکانی پەرلەمانتارانەوە، مەرج نییە ئەو پێشنیازانە حکومەت جێبەجێان بکات یاخود کاریان پێی بکات، پێشنیازەکان دەبێت لە کاتی تاوتوێکردنی پڕۆژەیاسای بودجەدا پێشکەش بکرێت".


زورفی ئەوەشی وتووە، "جێبەجێکردنی ئەو پێشنیازانە پەیوەندی بە حکومەت وبانکی ناوەندیی عێراقەوە هەیە کە ئامانج لێی بەرەوپێشچوونی ئابوریی عێراقە، نەک بۆ ڕازیکردنی خواست وهیوای پەرلەمانتاران".

 

لای خۆشییەوە عوبید مەحل، ڕاوێژکاری ئەنجومەنی وەزیران بۆ کاروباری داریی بە ڕۆژنامەکەى وتووە، "دابەشکردنی موچە بە دۆلار، وەک ئەوەی پێشنیازکراوە، کارێکی عەیبەیە و نادروستە و زیان بە ئابوری وڵات دەگەیەنێت، چونکە پرسی دراو پەیوەندی بە سەروەری دەوڵەتەوە هەیە، دەوڵەتانی خاوەن سەروەریش مافی ئەوەیان هەیە خۆیان دراوی خۆیان دەربکەن وکاری پێی بکەن".

 

مەحل ئەوەشی وتووە، "لە مادەی 60دا جەخت لەوەکراوەتەوە ئەو کەسانەی پڕۆژەیاساکە ئامادە دەکەن تەنیا سەرۆک کۆمار وئەنجومەنی وەزیرانن، تا ئێستا نازانین چ گۆڕانکارییەک لە بودجەدا کراوە.


ئەوە لەکاتێکدایە، ئەرشد ساڵحی، سەرۆکی کۆمسیۆنی مافی مرۆڤی پەرلەمانی عێراق داوای لە حکومەت کردووە موچەی سێ مانگی داهاتوو بە دۆلار بدرێت بە فەرمانبەران.


سەرۆکی لیژنەی مافی مرۆڤی پەرلەمان هۆکاری داواکەی بۆ حکومەت گەڕاندەوە بۆ "ئەوەی زیانی هاوڵاتیان کەم بێتەوە، ئەوەش دەبێتە هۆی زیاتر بەرزبوونەوەی بەهای دیناری عێراقی".

 

لە لایەکی ترەوە جێگری سەرۆکی پەرلەمانی عێراق ڕایگەیاند، پێدەچێت ئەم هەفتەیە یاسای بودجە بەمەبەستی پێداچوونەوە ڕەوانەی سەرۆک کۆمار بکرێت بۆ پەسەندکردنی و بڵاوکردنەوەی لە ڕۆژنامەی فەرمی.

 

بەشیرحەداد، جێگیری سەرۆکی پەرلەمانی عێراق ( 4ی نیسانی 2021) بە ڕۆژنامەی سەباحی فەرمی ڕاگەیاندووە، "دوای پەسەندکردنی بودجە، وەزارەتی کاروباری پەرلەمان ماددەکانی یاساکە دەپشکنێت پێش ئەوەی ڕەوانەی سەرۆکایەتی کۆماری بکات".