ناس کورد-
کونسوڵخانەی ئەمریکا لە هەولێر ناڕەزایەتی خۆی بۆ هەڵمەتی دەستگیرکردنی هاوڕەگەزخوازان لە سلێمانی دەربڕی و دەڵێت، "بە نیگەرانییەوە چاودێری دەکەین."
کەناڵی ناس کورد لە تێلیگرام جۆین بکە
کونسوڵخانەی ئەمریکا لە هەولێر لە تویتەری خۆی ڕایگەیاندووە، "بە نیگەرانیەوە چاودێری ڕووداوەکانی سلێمانی کە وادەردەکەوێت بۆ دەستگیرکردنی ئەندامانی کۆمەڵگەی LGBTI (هاوڕەگەزخوازان)."
We are watching with concern the events in #Sulaymaniya that seem to be targeting members of the #LGBTI community for arrest. pic.twitter.com/bPiBXu7WZh
— U.S. Consulate General Erbil (@USConGenErbil) April 3, 2021
دوێنێ ئاسایشی سلێمانی ڕایگەیاند، هەڵمەتەکەى شەوی پێنجشەممەیان لە گەڕەکی سەرچنار بۆ نەهێشتنی دیاردەى لەشفرۆشی لەسەر داوای خەڵکی ئەو گەڕەکە بووە و مەبەستیان "هیچ توێژ و چینێکی تر نەبووە."
بەڕێوەبەرایەتی ئاسایشی پارێزگای سلێمانی لە ڕوونکردنەوەیەکدا کە کۆپییەکی دەستی "ناس کورد" کەوتووە (2ی نیسانی 2021) ئاشکرای کردووە، "شەوی ڕابردوو هێزەکانمان هەڵمەتێکیان دەستپێکرد بۆ نەهێشتنی دیاردەی لەشفرۆشی لە یەکێک لە ناوچەکانی سلێمانی لەسەر داوای زۆرێک لە هاوڵاتیانی ئەو گەڕەکەى کە دیاردەى تێدا زۆر بوو بوو، هەروەها بوو بووە هۆی بێزارکردنیان."
دەشڵێت، "بۆیە ئێمەش وەک پیشە و ئەرکی هەمیشەییمان و لەپێناو سەقامگیری و چوون بەدەم داواکاری هاوڵاتیان، هێزەکانمان هەڵمەتێکیان ئەنجام دا تەنها بۆ نەهێشتنی ئەو دیاردەیە و مەبەست و ئامانجمان هیچ توێژ و چینێکی تر نەبووە."
ئەوە لەکاتێکدایە شەوی پێنجشەممە (1ی نیسانی 2021) عەمید پشتیوان بەهادین کە سەرپەرشتی هەڵمەتەکەی کرد بە "ناس کورد"ی ڕاگەیاند، "دوای وەرگرتنی ڕەزامەندی دادوەری لێکۆڵینەوە هەستاوین بە ئەنجامدانی هەڵمەتێک بۆ دەستگیرکردنی ئەو کەسانەی کە هاوڕەگەزخوازن و هەروەها پەروەردە کردنەوەیان."
بەڵام لە ڕوونکردنەوەکەی ئاسایشدا هاتووە کە ئەوان مەبەست و ئامانجیان "هیچ چین و توێژێک" نەبووە، وەک ئاماژەیەک بۆ هاوڕەگەزخوازان.
