گه‌ڕان

Shadow Shadow
چیرۆكه‌كانمان

یەکێتى بەشدارى مەراسیمى سوێندخواردنى نێچیرڤان بارزانى دەکات؟

10ى مانگ لایەنە ناکۆکەکان لەسەر خوانى نێچیرڤان بارزانى کۆدەبنەوە [تایبەت]

2019.06.04 - 21:08
10ى مانگ لایەنە ناکۆکەکان لەسەر خوانى نێچیرڤان بارزانى کۆدەبنەوە [تایبەت]
ناس کورد - وریا حسین   بەگوێرەى وتەى کەسانى نزیک لەنێچیرڤان بارزانى بێت هەموو لایەنە سیاسیەکان بەبێ جیاوازى بانگهێشتى مەراسیمى سوێندخواردنى سەرۆکى هەرێم دەکرێن، بەڵام تائێستا نازانرێت یەکێتى بەشدارى مەراسیمى سوێندخواردنەکە دەکات یان بایکۆتى دەکات؟. . بەگوێرەى بانگهێشتنامەى پەرلەمانى کوردستان، ڕۆژى دووشەممە 10ى حوزەیران 2019 سەرجەم پەرلەمانتاران بانگهێشتراوون بۆ دانیشتنى ئاسایى ژمارە (7)ى پەرلەمانى کوردستان کاتژمێر (11)ى پێش نیوەڕۆ تایبەت بە مەراسیمى سوێند خواردنى سەرۆکى هەرێمى کوردستان لە هۆڵى سەعد عەبدوڵا لە هەولێر.   . دڵشاد شەهاب، ئەندامى سەرکردایەتى پارتى دیموکراتى کوردستان و ڕاوێژکار و کەسایەتى نزیک لە نێچیرڤان بارزانى ئەوەى بۆ ناس کورد پشتڕاستکردەوە بۆ مەراسیمى سوێندخواردنى سەرۆکایەتى هەرێم هەموو لایەنەکان بانگهێشتکراوون، وتى:"بۆ مەراسیمى سوێندخواردنى کاک نێچیرڤان هەموو لایەنە سیاسیەکان بانگهێشت دەکرێن بەبێ جیاوازى".   . شەوى ڕابردوو، لەنێوەندى ئەو گرژیانەى کە هەن لەنێوان یەکێتى و پارتى نێچیرڤان بارزانى پەیوەندییەکى تەلەفۆنى لەگەڵ بەرهەم ساڵح سەرۆککۆمارى عێراق ئەنجامدا و بەفەرمى بانگهێشتى مەراسیمى سوێندخواردنى سەرۆکایەتى هەرێمى کرد، ئەوەش دۆخى گرژییەکانى چەند ڕۆژى ڕابردووى دابەزاند. . عەتا شێخ ئەحمەد وتەبێژى پارتى لەسلێمانى لەو بارەیەوە زانیارى زیاترى بەناس کورد-دا وتى: "مەراسیمى سوێندخواردنى سەرۆکى هەرێمى کوردستان مەراسیمێکى گەورە دەبێت نوێنەرى وڵاتان و ناوخۆ و ناوچەکە و لایەنە سیاسیەکان و تەنانەت لەئاستى ئەوروپاش هەندێک کەسایەتى بانگهێشتکراوە". . تا ئێستا ئەوەى دیارە پەرلەمانتاران بەفەرمى بانگهێشتکراوون بۆ مەراسیمى سوێندخواردنى نێچیرڤان بارزانى بەبێ جیاوازى، لەئاستى لایەنە سیاسیەکان پارتى پێش شەوى ڕابردو قسەیان لەسەر بانگهێشتکردنى یەکێتى هەبوو بەڵام ئێستا ئەو قسانە نەماوون، ئەوەى نادیارە ئەوەیە، ئایا یەکێتى بایکۆتى پڕۆسەکە ناکات؟. . زیاد جەبار ئەندامى پەرلەمانى کوردستان لەفراکسیۆنى یەکێتى ئاماژە بۆ ئەوە دەکات لەئاستى فراکسیۆن ئێمە بەفەرمى بانگهێشتین بۆ مەراسیمى سوێندخواردنى سەرۆکى هەرێمى کوردستان، بەڵام دڵنیایى نەبوو لەئاستى مەکتەبى سیاسى کەس بەشدارى دەکەن یان نا، وتى:"دواى پەیوەندییە تەلەفۆنیەکەى کاک نێچیرڤان و سەرۆککۆمار و پاشان ڕاگرتنى شەڕى ڕاگەیاندن هیوایەک دروستبووە دۆخەکە بەرەو ئارامى بڕوات". . وتیشى:"ئەگەر بانگهێشنامە بڕوات بۆ مەکتەبى سیاسى دەڕوات، تەسەور دەکەم نێردرابێت". . پەرلەمانتارەکەى یەکێتى نیشتمانى کوردستان هیواى خواست دۆخەکان باشتربن لەوەى پێشتر ڕویداوە لەنێوان هەردوو پارتەکە، وتی:"ئێمە پابەندى بڕیارى مەکتەبى سیاسین و بڕیار لەوانەوە وەردەگرین بچین یان نەچین". . سەرچاوەیەک لەپارتى دیموکراتى کوردستان بەناس کورد-ىوت، تەنها تیمى پڕۆتۆکۆڵى پەرلەمان دەزانن یەکێتى بەفەرمى بانگهێشتى مەراسیمى سوێندخواردن دەکرێت یان نا، بەڵام دڵنایى دا یەکێتى بەشدارى مەراسیمەکە دەکات. . هاوکاتى یەکێتى، نەوەى نوێ کە هێزێکى تازە دروستبووە، تەنها لەئاستى فراکسیۆنى پەرلەمانى بانگهێشتى مەراسیمەکە کراوون، ئاماژە بۆ ئەوە دەکەن، بۆ چوون و نەچوون چاوەڕێى سەرووى خۆیان دەکەن. . کاوە عەبدولقادر پەرلەمانتارى فراکسیۆنى نەوەى نوێ لەپەرلەمانى کوردستان جەختى لەسەر ئەوە کردەوە، وەکو پەرلەمانتارى نەوەى نوێ بانگهێشتى دانیشتنەکە کراوین بەڵام نازانین ئایا وەکو حیزب یان سەرۆکى جوڵانەوەکە بانگهێشت کراوین یان نا، وتیشى"بەشداریکردن یان بایکۆتکردنى مەراسیمى سوێندخواردنى سەرۆکى هەرێمى کوردستان بەدەستى جوڵانەوەى نەوەى نوێیە". . "دەستپێشخەرى نێچیرڤان بارزانى بۆ ئاسایکردنەوەى پەیوەندییەکان لەگەڵ سەرۆککۆمارى عێراق سەرەتاى دەرکەوتەیەکى نوێى ئیجابین بۆ ڕێککەوتنى یەکێتى و پارتى لەبارەى پرسى کابینەى نۆهەمى حکومەتى هەرێم و بەغداد و پرسى پارێزگارى کەرکوک" هەروەکو پەرلەمانتارەکەى یەکێتى جەختى لەسەر کردەوە. .