گه‌ڕان

Shadow Shadow
سیاسه‌تی

وردەکاری

سبەینێ پەرلەمانی عێراق دەنگ لەسەر پڕۆژەیاسای بودجە دەدات

2021.03.30 - 21:11
App store icon Play store icon Play store icon
سبەینێ پەرلەمانی عێراق دەنگ لەسەر پڕۆژەیاسای بودجە دەدات

ناس کورد-

محەمەد حەلبوسی، سەرۆکی پەرلەمانی عێراق بانگهێشتی پەرلەمانتارانی کرد کە سبەینێ چوارشەممە کاتژمێر یەکی پاشنیوەرۆ دانیشتن ئەنجام دەدرێت بۆ دەنگدان لەسەر پڕۆژەیاسای بودجەی ساڵی 2021.

کەناڵی ناس کورد لە تێلیگرام جۆین بکە   

 

حەلبوسى لە بانگەوازێکدا بۆ ئەندامانى پەرلەمانی عێراق ئاماژەى بەوەداوە، پڕۆژەیاساى بودجەى ساڵى 2021 یەکێکە لە هەنگاوە گرنگەکان و ڕاستەوخۆ پەیوەندى بە بەرژەوەندى هاوڵاتیانەوە هەیە و چەندین بڕگەى تێدایە کە پێویستیەکانیان بەشێوەیەکى ڕاستەوخۆ چارەسەر دەکات.

 

ڕوونیشیکردووەتەوە، ئەوەش سەرەڕاى ئەوەى هاوکارى حکومەت دەکات بۆ ئەوەى بەرنامەکەى جێبەجێبکات و پشتگیرى پڕۆژە خزمەتگوزارییەکان بکات کە پەیوەندیان بە ژیانى ڕۆژانەى هاوڵاتیانەوە هەیە.

 

حەلبوسى لە بەشێکى ترى بانگەوازەکەیدا جەختی لەوەکردووەتەوە، بۆیە داوا لە ئەندامانى پەرلەمان دەکەین کە کاتژمێر 1ى پاشنیوەڕۆى ڕۆژى چوارشەممە ئامادەبن لە دانیشتنى دەنگدان لەسەر پڕۆژەیاساى بودجە، چونکە درێژەى کێشاوە و هەروەها ئاگادارتان دەکەینەوە کە ناوى ئەوانەى ئامادە دەبن و ئامادە نابن بۆ ڕاى گشتى بڵاودەکەینەوە.

 

سەرۆکى پەرلەمان هێماى بۆ ئەوەشکردووە، هەروەها لە بەرنامەى ڕۆژى چوارشەممەدا داواکارى هێزە سیاسیەکان بۆ هەڵوەشانەوەى پەرلەمان کە 172 پەرلەمانتار واژۆیان کردووە پێشکەش دەکرێت، ئەوەش وەک وەڵامدانەوەى داواکارى جەماوەریى بۆ ئەنجامدانى هەڵبژاردنى پێشوەخت.

 

لە بەشێکی دیکەی ڕاگەیەندراوەکەی سەرۆکایەتی پەرلەمانی عێراق ئاماژە بەوەدراوە کە داواکاریی هێزە سیاسییەکان کە بە واژووی 172 پەرلەمانتار پشتیوانی لێکراوە بۆ هەڵوەشاندنەوەی پەرلەمان بەپێی ماددەی 64 لە دەستوری عێراق پێشکەش کراوە، خراوەتە بەرنامەی کاری دانیشتنەکەی سبەینێ، ئەمەش وەک بەدەمەوەهاتنی خواستی گەل بۆ ئەنجامدانی هەڵبژاردنی پێشوەختەیە.

 

لە ڕاگەیەندراوکەدا ئاماژە بەوەشدراوە کە پەرلەمانی عێراق سەرجەم پێویستییەکان و هەنگاوە کردارییەکانی بۆ ئەنجامدانی هەڵبژاردنی پێشوەختە گرتووەتەبەر لەوانە پێکهێنانی کۆمیسیۆنی باڵای سەربەخۆی هەڵبژاردنەکان لە دادوەران و دەرکردنی یاسای نوێی هەڵبژاردنی ئەنجوومەنی نوێنەران و دەنگدان لەسەر هەمواری یاسای ژمارە 30 ساڵی 2005ی دادگای باڵای فیدڕالی.

 

 بڕیاربوو لە دانیشتنی ئاسایی ڕۆژی یەکشەممەی ڕابردووی پەرلەمانی عێراق پڕۆژەیاسای بودجە پەسەند بکرێت، بەڵام بەھۆی بەردەوامی ناکۆکییەکان لەسەر ژمارەیەک ماددەی دیکەی نێو پڕۆژەیاساکەوە، نەیتوانی بیخاتە دەنگدانەوە.