گه‌ڕان

Shadow Shadow
سیاسه‌تی

پێنج کەس دەستگیرکران

ئاسایشی گەرمیان؛ ژنێک لەلایەن باوک و هاوسەر و دوو برایەوە کوژرا

2021.03.30 - 16:36
App store icon Play store icon Play store icon
ئاسایشی گەرمیان؛ ژنێک لەلایەن باوک و هاوسەر و دوو برایەوە کوژرا

ناس کورد-

وتەبێژی ئاسایشی گەرمیان دەستگیرکردنی بکوژی ئەو ژنە 25 ساڵەی ڕاگەیاند کە لە سەرەتای ئەم هەفتەیە لەلایەن براکەیەوە کوژرا و ئاشکراشی دەکات 4 کەسی دیکەش لەسەر کەیسەکە دەستگیرکراون کە باوک و برا و هاوسەری ژنەکەن.

کەناڵی ناس کورد لە تێلیگرام جۆین بکە   

 

عوسمان عەبدولكەریم، وتەبێژی ئاسایشی گەرمیان لە کۆنگرەیەکی ڕۆژنامەوانیدا کە "ناس کورد" بینیویەتی (30ی ئازاری 2021) ڕایگەیاند، دوای ئەوەی لە سێ ڕۆژی ڕابردوو لە گوندی چەوری سنوری ناحیەی نەوجول ئافرەتێکی تەمەن 25 ساڵ کە دایکی دوو منداڵ بوو کوژرا دەست بەجێ هیزەکانی ئاسایش دەستیانکرد بە لێکۆڵینەوە و بەدواداچوون و لەماوەی کەمتر لە 72 کاتژمێردا توانرا تۆمەتباری سەرەکی ڕووداوەکە دەستگیر بکرێت و لە لێکۆڵینەوەکانیش دانی بەتاوانەکەیدا ناوەو ئەوەشی وتووە، کە باوکی و براکەی و زاواکەیان کە دەکاتە هاوسەری ئەو ژنە هاوکاری بوون.

 

باسی لەوەشکرد، "تاوانبارەکە لە سنوری ناحیەی نەوجولەوە هەڵاتبوو بۆ سنوری ناحیەی کۆکز و خۆشبەختانە ئێوارەی دوێنێ لە زاڵگەی کەلار دەستگیرکراوەو کەسێکیش کە خزمی خۆیەتی و هاوکاری کردووە لە داڵدەدانی و شاردنەوەی ئەویش دەستگیرکراوە."

 

ئەوەشی وت، "بەوەش پێنج کەس بەتۆمەتی کوشتنی ئەو ئافرەتە 25 ساڵە کە دایکی دوو منداڵ بووە دەستگیرکراوەو چوار لە تۆمەتبارەکان بە پێی مادەی 406 لە یاسای سزادانی عێراقی ڕاگیراوەو یەکێکیش بە تۆمەتی داڵدەدانی بەپێی مادەی 273 لە یاسای سزادان ڕاگیراوەو ڕێککارەکانی لێکۆڵینەوە بەردەوامەو ئەگەری هەیە ئەوکەیشەش ڕوانەی پۆلیس بکرێت.

 

پێشتر لە ڕاگەیەنراوێکدا بەڕێوەبەرایەتی پۆلیسی گەرمیان (شەممە 27ی ئازاری 2021) ڕایگەیاند، "ئێوارەی ئەمڕۆ شەممە لەگوندی چەوری سەربە ناحییەی نەوجول لە قەزای کفری گەنجێک خوشکێکی خۆی  بە گولـلە کوشت و هەڵات."  

  

ئاماژەی بەوەشکردووە، "ئافرەتەکە بەناوی (ه . م . ک )  تەمەنی 25 ساڵ و دایکی دوو منداڵە بووە."  

  

ئەوەشی خستووەتەڕوو، "لەئێستادا تەرمی ناوبراو ڕەوانەی پزیشکی دادوەری قەزای کەلارکراوە و پۆلیس پەڕاوی لێکۆڵینەوەی بۆڕوداوەکە کردووەتەوە و  بەپێی مادەی 406 فەرمانی دەستگیرکردن بۆ تۆمەتبار دەرچووە و گەڕان بەدوایدا دەستی پێ کردووە."