گه‌ڕان

Shadow Shadow
سیاسه‌تی

تەندروستى هەرێم ئەگەرێک بۆ قەدەغەى هاتوچۆ رادەگەیەنێت

2021.03.30 - 15:47
App store icon Play store icon Play store icon
تەندروستى هەرێم ئەگەرێک بۆ قەدەغەى هاتوچۆ رادەگەیەنێت

ناس کورد-

 

وتەبێژى وەزارەتى تەندروستى هەرێم رایگەیاند، ئەگەر پابەندبوون بە رێكارەكانی خۆپارێزی وەك پێویست نەبێت قەدەغەی هاتوچۆ بە هەماهەنگ لەگەڵ لایەنە پەیوەندیدارەكان یەكێك لە ئەگەرەكان دەبێت.

کەناڵی ناس کورد لە تێلیگرام جۆین بکە   

 

ئاسۆ حەوێزى لەراگەیەنراوێکدا کە وێنەیەکى دەست "ناس کورد" کەوتووە ئاماژەى بەوەکردووە، ئەگەر قەدەغەکە گشتیش نەبێت ئەوا بە سنورداری دەبێت.

 

هەروەها داوادەکات  هەموو لایەك هاوكاربن بۆ تێپەڕاندنی ئەم دۆخە سەختە، بڕیارەكانی لێژنەی باڵا وەك خۆی جێبەجێ بكەن تا نەگەینە قۆناغی كەرەنتینی گشتی یان سنوردار .

 

لیژنەى باڵاى روبەڕوبوونەوەى کۆرۆنا کۆبووە و چەند بڕیارێکى دەرکرد، لەوانە بەردەوامى داخستى قوتابخانە و زانکۆ و پەیمانگاکان تا 10 ى مانگى داهاتوو.  

 

سامان بەرزنجی وەزیری تەندروستی حکومەتی هەرێمی کوردستان لە کۆنگرەیەکی ڕۆژنامەوانیدا وتی "بڕیاردرا بە بەردەوامی داخستنی قوتابخانەو خوێندنگەو زانکۆو پەیمانگا حکومی و ناحکومییەکان تا وەکو ڕۆژی 10ی 4ی 2021 جگە لەو قۆناغانەی ئێستا تاقیکردنەوەیان هەیە بە جێبەجێکردنی رێککارەکانی تەندروستی بەردەوامبن".

 

وتیشى هەروەها بڕیاردراوە بە ڕاگرتنی کۆڕو کۆبوونەوەو ئەو کۆنفرانسانەی هەبووە و نەهێشتنی ئاهەنگ و بۆنەکۆمەلایەتی و پرسەو کۆڕو کۆبوونەوەکان تا ماوەیەکی دیاریکراو. 

 

سامان بەرزنجی باسی لەوەشکرد، بڕیاردراوە بە داخستنی هۆڵەکانی بۆنەکان و شانۆو وەرزش شوێنە گشتییەکان و سینەماکان لەگشت شوێنەکان، جگە لەوەش بازگەکانی نێوان هەرێم و شارەکانی دیکەی عێراق لە رۆژانی پێنج شەممەو هەینی و شەممە هاتوچۆی تێدا ڕادەگیرێت جگە لە هاتوچۆی بازرگانی و شاندە فەرمییەکان ئەویش بەرێککاری تەندروستی.

 

ڕاشیگەیاند، کافتریاو شوینە گشتییەکانی دیکەی پێشکەشکردنی نێرگەلە لە کاتژمێر 6ی بەیانی تا کاتژمێر 9ی شەو کراوە دەبن و دوای ئەو وادەیە دەبێت دابخرێن، بۆ ئەوەش دەبێت شوێنی کراوە بەکاربهێنن یاخود دەبێت ژمارەی مێزەکان بەپێی ڕێککارەکانی تەندروستی دابنرێن و کار بە هاواگۆڕکێ بکەن و هەرکەسێکیش ببیتە هۆکاری کۆبوونەوەو بەکار نەهینانی سزای بۆ دیاری دەکرێت.

سەبارەت بە دەوامی فەرمانگەو وەزارەتەکان وەزیری تەندروستی وتی، "نابیت قەرەباڵغی لە نێوان فەرمانبەران و سەردانیکەران دروستبکرێت و جگە لەوەش دەبێت بەرێوەبەری فەرمانگەکان ڕێککارەکان جیبەجێ بکەن و کار بە بەستنی ماسک بکەن".

 

لەبارەی دەوامی فەرمانگەکانیشەوە، ئاشکرایکرد، ڕۆژانی پێنج شەممە دەکرێتە پشوو واتە هەفتانە لە ڕۆژانی 1 شەممە تاوەکو 4 شەممە دەوام دەکرێت.

 

بەرزرنجى ئەوەشى خستەڕوو، ئەوان پێیان باش بوو قەدەغەی هاتوچۆی نیمچەیی ڕابگەیەنرێت، بۆ ئەوەش ڕۆژی پێنج شەممە کراوەتە پشوو تاوەکو هاتوچۆ کەمبکرێتەوەو لە قۆناغەکانی داهاتووش ئەگەر پێویست بکات و ئامارەکانی توشبوو زیاتر بکات بێگومان ئەوە ئەگەرێکی کراوەیە لەبەردەستیان.