گه‌ڕان

Shadow Shadow
سیاسه‌تی

وردەکاریی خۆرادەستکردنى

یەکەم وتەى باوکى دوو کچە کوژراوەکەى چەمچەماڵ

2021.03.30 - 13:15
App store icon Play store icon Play store icon
یەکەم وتەى باوکى دوو کچە کوژراوەکەى چەمچەماڵ

ناس کورد – هەڤاڵ غالب

 

تۆمەتبارى کوشتنى دوو کچەکەى چەمچەماڵ کە باوکیانە جەختدەکاتەوە کە ئەو کچەکانى نەکوشتووە و تۆمەتەکەى خستووەتە ئەستۆى کوڕەکەى، ئەگەرچى نەیشاردووەتەوە کە ئاگادارى تاوانەکە بووە.

کەناڵی ناس کورد لە تێلیگرام جۆین بکە   

 

دواى شەش مانگ لە کوژرانى دوو خوشکى قەزاى چەمچەماڵ بەناوەکانى ئاوارە و هێلین، ئەمرۆ باوکیان خۆى رادەستى پۆلیس کرد، کە بە "تۆمەتبارى سەرەکى" دادەنرێت لەو رووداوەدا.

 

ئەو تۆمەتبارە لەدواى رووداوەکە هەڵهاتبوو، هەر ئەوکات دەزگا ئەمنیەکان فەرمانى گرتنیان بۆ دەرکرد، لەئێستاشدا بەوتەى قائیمقامى قەزاکە لەژێرفشاردا خۆى رادەستى پۆلیس کردووە.

 

سەرچاوەیەکى بەرپرس لە پۆلیسى چەمچەماڵ بۆ ناس کورد وتى"باوکى ئەو دووکچە تائێستا دانى بەتاوانەکەدا نەناوە بەڵام ئاگادارى رووداوى کوشتنەکەیە".

دەزگا ئەمنییەکان بەدرێژایی شەش مانگى دواى رووداوەکە بەدواى باوکى ئەو دوو کچەوە بوون تا ئەمڕۆ کە دواى گرتنى سەرجەم رێگاکانى دەربازبوونى ناچاربوو خۆى رادەست بکات.

 

رەمک رەمەزان، قائیمقامى چەمچەماڵ و سەرۆکى لیژنەى ئەمنى قەزاکە بۆ ناس کورد وتى "دواى فشارەکانمان بۆ خۆ رادەستکردنى ئەو تاوانبارە لە چەمچەماڵ و شۆرش و کەرکوک، هاوکات لەرێگاى جێگرى سەرۆکى حکومەتەوە داوامانکردن لە سنورى پارێزگاى هەولێرش ئەو تۆمەتبارانەى فەرمانى گرتنیان هەیە دەستگیربکرێن، سەرەنجام ئەو تۆمەتبارە هیچ رێگایەکى بۆ دەربازیوون نەبوو خۆى رادەستى هێزەکانى پۆلیس کرد".

 

 تۆمەتبارەکە ناوى (ف، ح، ش) ەو تەمەنى 44 ساڵە، پێشتر دانیشتووى گەرەکى سەنگاوییەکانى ناحیەى شۆرش بووە.

قائیمقامى چەمچەماڵ وتى "لە لێکۆڵینەوە سەرەتاییەکاندا دەڵێـت ئەو کچەکانى نەکوشتووە بەڵام ئاگادارى تەواوى رووداوى کوشتنەکەیە و دەڵێت کورەکەم ئەو کارەى کردووە، بەڵام کورەکەى دەستگیرنەکراوە".

 

ئاوارە و هێلین رۆژى  9ى ئەیلول  تەرمەکانیان کە لە چاڵێکى نزیک یەکێک لە گوندەکانى سنورى چەمچەماڵ شاردرابوونەوە دەرهێنرایەوە، هەر ئەوکاتیش ئیدارەى قەزاى چەمچەماڵ لە مەراسیمێکدا تەرمەکانیانى بەخاکسپارد.

 

قوباد تاڵەبانى جێگرى سەرۆکى حکومەتى هەرێم ئەمڕۆ سێشەممە لە پەیامێکدا کە وێنەیەکى دەست "ناس کورد" کەوتووە رایگەیاند "لەدەمی تاوانەكەدا بەڵێنمان دا تا ئاشكراكردنی تاوانباران و ڕووبەڕووكردنەوەیان لەگەڵ یاسا كۆڵ نەدەین، ئەمڕۆ ئاسوودە بووم بە دەركەوتنی ڕاستییەكان و داننانی دەستگیركراو بەتاوانە قێزەونەكەی".

 

ئەو دوو کچە پێش کوژرانیان پەڕاویان هەبووە لە نوسینگەى چەمچەماڵى توندوتیژى خێزانى لەبارەى "خراپى مامەڵەى کەسوکاریان لەگەڵیان"، دواتر لە 17 /7 /2020 رەوانەى شەڵتەرى ژنان کران.

دواى ماوەیەک مانەوەیان لە شەڵـتەر و سەردانیکردنى باوکیان، ئەو دوو کچە رازى بوون سازش لە سکاڵاکەیان بکەن و بە بڕیارى دادوەر لە 11 /8 /2020 دواى پڕکردنەوەى بەڵیننامە رادەستى باوکیان کرانەوە.

 

سکاڵاى ئەو دوو کچە بەپێی مادەى 7ى خێزانى بووە کە تایبەتە بە خراپى مامەڵەکردن لەگەڵیان.

 

ئاوارە تەمەن 19 ساڵ و هێلین تەمەن 17 ساڵ دانیشتووى گەرەکى سەنگاوییەکانى ناحیەى شۆرش بوون و هاوکات ماڵێکیشیان لە گوندى برایم ئاغاى  سنورى چەمچەماڵ بووە کە هەر لەو گوندە تەرمەکانیان لە چاڵێکدا شاردرابوویەوە.