گه‌ڕان

Shadow Shadow
سیاسه‌تی

زیاتر لە 460 هەزار بەرمیل داوا دەكات

لیستەكەی مالیكی لە دوا ساتەكانی گفتوگۆكان شەش مەرج بۆ بودجە ڕادەگەیەنێت

2021.03.29 - 00:15
App store icon Play store icon Play store icon
لیستەكەی مالیكی لە دوا ساتەكانی گفتوگۆكان شەش مەرج بۆ بودجە ڕادەگەیەنێت

ناس كورد_

لیستی دەوڵەتی یاسای نوری مالیكی لە كۆنگرەیەكی ڕۆژنامەوانیدا و لەدوا ساتەكانی چاوەڕوانیی گرێدانی دانیشتنی بودجە شەش مەرج و هەڵوێست رادەگەیەنێت بۆ جەماوەری خۆی كە هەندێكیان پەیوەندیان بە نرخی دۆلار و پشكی هەرێمی كوردستانەوە هەیە. 

کەناڵی ناس کورد لە تێلیگرام جۆین بکە   

 

لیستی دەوڵەتی یاسا لە كۆنگرەكەیدا نیوە شەوی  (28/ 29 ئازاری 2021) كە "ناس كورد" بەدواداچوونی بۆ كردووە، جەختی لە شەش داواكاریی كردەوە كە بریتین لە:

1_ دابەشكردنی خشتەكانی بودجە بەر لەدانیشتنی دەنگدان

2_ گێڕانەوەی نرخی دۆلار بۆ نرخی پێشووی خۆی

3_ زیادكردنی مەرجی ڕادەستكردنی هەر بڕە نەوتێك لەسەروو 460 هەزار بەرمیلەوە بەرهەم بێت لە كوردستان بۆ ئەوەی ئاودیو نەكرێت.

4_ هەڵوەشاندنەوەی بەكەرتی تایبەت كردنی هەندێ سێكتەری دەوڵەت

5_ هەڵوەشاندنەوەی قەرزی بیانی بەتایبەت كە نرخی نەوت بەرز بووەتەوە

6_ قەدەغەكردنی بەخشینی سیفەتی شەهید بەچەكدارانی داعش.

 

پەرلەمانتاری لیستی سائیرونی سەدر بەدر زیادی  لە بەیاننامەیەكدا ڕایگەیاند: سیمای دانیشتنی پەرلەمان لەبارەی بودجە ڕوون نییە و ناكۆكییەكان بەردەوامن تەنانەت لەپارەی پشكی هەرێمیشەوە رێككەوتنی 100% نەكراوە.   

پاش ئەوەی شەممەی رابردوو دانیشتنی پەسەندكردنی بودجە خراپە شەممە 27 ئازار، جارێكیتر بۆ یەكشەممە 28 ئازار دواخرا و لە ئێستاشدا كات چووەتە ناو ڕۆژی دووشەممە (29 ئازار) كەچی هێشتا چارەنووسی دانیشتنەكە دیار نییە. 

مەریوان نادر پەرلەمانتاری یەكێتی ڕایگەیاند، ئه‌وه‌ی رێگری سه‌ره‌کییه‌ له‌به‌رده‌م ئه‌نجامنه‌دانی دانیشتنی په‌رله‌مان کێشه‌ی نێوان لیستەكانی سوننه‌ و به‌شێک له‌ شیعه‌یه‌ گێڕانەوەی حەشدە دوورخراوەكان و بڕینەوەی مووچە بۆ كەسوكاری بێسەروشوێنكراوەكانی پارێزگا سوننەكان.  

سەبارەت بەپشكی هەرێمی كوردستانیش پەرلەمانتارەكەی یەكێتی دەڵێت "ئه‌و ده‌قه‌ جێگیر کراوه‌ که‌ حکوومه‌تی هه‌رێم پێی رازییه‌".   

هەروەها ئەوەشی وتووە "هه‌رچه‌نده‌ بڕیاره‌ کاتژمێر ١ ی ئه‌م به‌ره‌به‌یانییه‌ دانیشتنی په‌رله‌مان گرێ بدرێت، به‌ڵام ئاماژه‌کان وای نیشان ده‌ده‌ن که‌ له‌مڕۆدا ئه‌م دانیشتنه‌ گرێ نادرێت".